Минек масторось певтеме. Лангсонзо эрицятнень сизят ловозь. Пазонть пельде эрьвась казевсь кодамояк ёрокчисэ. Истя, минек ули меленек ёвтнемс ловныцятненень 1-це № Эйкакшонь искусствань школань тонавтыцядонть – Илона Дмитриевна Гаушевадо.
Аванть чачома-касома тарказо – Саранск ошось. Тесэ сон ютавтызе эйкакш пингензэ, прядызе школанзо ды теке ошсонть тонавтнесь Н. П. Огарёв лемсэ МГУ-нь Национальной культурань институтсо «Народная художественная культура» ёнксонть коряс, седе тов тонавтнеманзо поладокшнызе М. Е. Евсевьев лемсэ педагогикань университетсэ, конань прядомадо мейле ушодсь важодеме эйкакшонь тонавтыцякс.
– Монь эйс шкинемань васенце толнэсь кирвазсь школасо тонавтнемстэ. Уроктнень прядовомадо мейле монень вечкевсь якамс «Парикмахерское дело» кружоков, косо минек тонавтсть черень нарамо. Някань чертнень лангсо котьмамось тукшнось мельс. Мон свал арсилинь кодаткак од стрижкат. Тонавтыцясь шныль эйсэнь, – ёвтни Илона Дмитриевна.
Истя жо тейтерьканть туртов пек вечкевсь артомась. Секскак ютко шкасто сон якиль 7-це № Эйкакшонь искусствань школав.
– А сёпан, минек кудораськесэ ули те тевсэнть ёроков ломань – те монь крёстной авам. Сон течинь чис важоди Московсо артыцякс. Паряк, монень сонзэ пельде сатотсь шкинемань сяткинесь. Зярдо эштё эйкакшокс яксинь тонавтнеме артомо, маринь прям пек уцяскавокс. Арсян, се шкань эйкакшонь превесь эзь чарькоде, што артовксонть вельде мон панжан эсень ёрокчинть туртов кенкшт. Ды ансяк шкань ютазь, 11-це классо тонавтнемстэ, алтынь эсень туртов – мезеяк лангс апак вано, седе тов сюлмамс эрямом кодамояк шкинема марто. Секскак кувать эзинь арсе, ков молян тонавтнеме. Школанть прядомадо мейле конёвон сеске кандынь Национальной культурань институтов, – ледстни авась.
Студентэнь эрямось пек куроксто ливтясь. Те шканть Илона Дмитриевна ледсти покш мельспаросо. Эдь самай студентэкс сон васенцеде теевсь содавиксэкс гончаронь тевенть ды художественной керамиканть марто.
– Сёвоненть васенцеде кедьс саия 3-це курссо тонавтнемстэ. Монь мельс пек тукшнось важодемс сонзэ марто. Ледстяса, кода паратнень прядовомадо мейле ялган туильть кудов, мон жо чоподас котьмилинь университетэнь мастерскойсэ. Тонавтнинь тейнеме стака эрьва кодат фигурат. Ды мезесь пек талновтсь эйсэнь, те се, кода кунсолось эйсэнь сёвонесь. Мон кортылинь мартонзо, а вана сонзэ каршовалокс ульнесь монь кунсоломась. Меельце курссо тонавтнемстэ художественной ветицян Светлана Сергеевна Борисова ды Михаил Васильевич Салдаев ёвтызь эсь мелест теемс дипломной важодевксэм кодамояк стака фигурань столь лангс путомань сервиз, конасонть улест чайник, кружкат, квасникть ды локсеень ёнов молиця пиалат, ды весе сынь кармить артозь эрзянь-мокшонь орнаментсэ. Те мелесь тень пек вечкевсь. Ды мон топавтыя сонзэ ветес, – мельспаросо ёвтни Илона Дмитриевна.
Университетэнть прядомадо мейле тейтеренть сеске тердизь важодеме Эйкакшонь искусствань школав, нама, тенень кенярдсь ды течинь чис важоди тосо покш мель марто.
– Эйкакш марто важодемась монень вечкеви. Эйкакштне эдь а пелить эсест важодевкссэст нолдамс кодаткак ильведькст, сынст лангс ванозь, монгак лоткинь пелемеде – ды важодемась тусь седе валаня ды шожда киява. Арсян, важодемань лувом истямо: мон тонавтан ды панжан эйкакштнень, сынь жо тонавтыть монь, – корты Илона Дмитриевна.
Ютко шкасто Илона Дмитриевна ламолгавты эсензэ теевксэнзэ. Сонзэ кедензэ алдо лиссть эрьва кодат важодевкст, ютксост: квасникть, вакант, чайникть, пиалат ды кружкат. Истя жо важоди сувенирной коллекциятнень лангсо. Ютазь шкасто анокстась баягинеть-эрзяват. А вана ней таго важоди баягине лангсо. Лангозост кедьчелькевесь арси артомс тиринь масторонь эрьва кодат пейзажт.
Эряви меремс, аванть шкинемазо минек республикасо содавикс. Эдь Илона Дмитриевна свал фестивалень ды пелькстамонь участниктнень ютксо. Истя, авась аволь вейке ие невтни теевксэнзэ «Шумбрат, Мордовия!» фестивальсэнть ды «Калейдоскоп талантов», «Мастер года» республикань пелькстамотнесэ, конатнесэ свал ашти изницятнень ютксо.
Гончаронь тевденть башка, Илона Дмитриевна кармась пидеме-панеме шоколадной тантейкат. Те тевенть эсензэ туртов авась панжизе, зярдо ушодовсь декретной отпускозо.
– Мон ломанесь истямо, тевтеме аштеме а вечкан. Свал бажан панжомо кодаткак од ёнкст. Истя теевинь содавиксэкс шоколадонть марто. Минек республикасо ламот топавтыть истямо тев, эсест важодевксэст свал невтнить Интернетэнь лопатнесэ. Монгак тосто эйстэдест ловнынь. Содавикс тонавтыцянть кедьстэ раминь «Веганский шоколад» лемсэ курса. Неть истят тантейкат, конатне пидевить ловсовтомо ды сахартомо, лиякс меремс, лиси диетической шоколад, – ёвтни Илона Дмитриевна.
Тевс кундамодо икеле авась ловнось пек ламо литература ды ваннось эрьва кодат тонавтыця роликть. Шоколадонь тантейкатнень пидемстэ авась тевс нолдась ансяк натуральной продуктат, истят, кода: какао, кокосовой ды пинемень ловсо, сахаронть таркас – эрьва кодат натуральной сиропт ды фрукта марто ягодат.
– Монь теевть шоколадонть мереви ярсамс сеть ломантнененьгак, конатнень ули аллергия скалонь ловсо лангс, сахаронь диабетсэ сэредицятненень, – ёвтни авась.
Весе важодевксэнзэ сон снимсесь телефонс ды путнесь Вконтакте лопазонзо. Истя муевсть ломанть, конатне рамсесть кудосо теевть шоколадонть. Ансяк вана те тевенть Илона Дмитриевна топавтсь а кувать, декретстэ лисемадо мейле сон таго ушодсь важодеме Эйкакшонь искусствань школасо.
Тешкстасынек сеньгак, кедьчелькевенть ули семиязо. Мирдезэ, Антон Витальевич, истя жо ёроков ломань – чувтосто керсиця. Ули колмо иесэ тейтерьказо, конась пек вечки морсеме ды киштеме.
– Эсенек шкинемасонок мирдем марто свал бажатано лездамс вейке-вейкенень. Лиясто – валсо, лиясто жо ансяк вейке варштавксоськак лезды невтемс ильведьксэнть, – лембестэ корты Илона Дмитриевна.
Кода кортыть ломантне: «Превей ломанесь ёроков эрьва мейсэ!», неть валтнэ пек ладить минек героинянтень, эдь гончаронь тевденть ды художественной керамикадонть башка авась яви мель стихень сёрмадомантень. Сындест зярс таштавсть аволь пек ламо, авторось сёрмады вечкемадо ды пертьпельксэнь мазычиде. Ансяк кемтяно, стихень сёрмадомасонтькак ули поладома.
Алена Артемьева