Музыкантень вечкемась, маряви, чачсь мартонзо. Уш вишка шкасто саезь сон явсь мель моротненень. Морамо вечкить весе малавиксэнзэ: тетязо-авазо, бабазо. Сынь нейгак, зярдо пурнавить вейс, серьгедьсызь ламо вайгельсэ морамонть. Кие соды, паряк, эйстэнзэ лисевель сцена лангсо покш морыця, ансяк сон кочкизе театранть – ёвксонь тарканть, косо налкси эйкакшонь спектаклясо ды сёрмады путовкстнэс музыка.
Ирина Рахманова важоди МР-нь Някань государственной театрасо актёрокс-кукловодокс. Эзь арсеяк, эрямонзо сюлмасы театранть марто, ды нейгак теде ледстни мизолкс марто.
Ирина чачсь Саранскойсэ. Тонавтнесь ошонь 5 № школасо. Яксесь 4 № эйкакшонь музыкальной школань фортепианонь классов. Эйкакшпингстэ сеедьстэ ардтнесь оймсеме Темниковань районов, косо эрясь вечкевикс бабазо. Школасо тонавтнемстэ киштсь ансамблясо, морсесь хорсо. 11-це классонть прядомадо мейле мольсь тонавтнеме Н. П. Огарёв лемсэ МГУ-нь Национальной культурань институтов. Кочкизе «дирижирование» специальностенть. Вузсо тонавтнемстэ ялгатнень марто пурнасть «Ленинэнь проспект» группа, седе тов – «Пала роса» коллектив. Од тейтертне морсесть раськень морот, явсть мель фольклоронтень, тейнесть музыкальной обработкат, морсесть акапельной ды эсест валост лангс морот. Пелькстасть морамонь конкурссо.
Вуздо мейле Ирина сась важодеме эсензэ 4 № эйкакшонь музыкальной школав. Теке жо шкасто роботась Национальной культурань институтсо эстрадань отделениясо морамонь ансамблятнень коряс педагогокс. Сень лангс апак вано, сонсь ансяк-ансяк прядызе вузонть. Школасо эйкакштнень марто важодемась пек тукшнось мелезэнзэ. Ансяк сонзэ сайнизь ломанень таркас, кона тукшнось декретс. Зярдо сон лиссь, тарканть савсь чамдомс. Стака седей марто кадынзе эйкакштнень, пек тонадсь тенст. Од тейтересь мусь важодема офиссэ. Ансяк цидярдсь кавто недлят ды тусь: аволь оймензэ коряс те тевесь.
– Ирина, кода тон сыть важодеме театрав?
– Театрадо, нама, эзинь арсекшне. Някань театрасо сеедьстэ ульнинь вишка пингстэ, вечкилия, те шкас мельсэнь кирдевсь, кода гайги баягинесь (сон нейгак теке), кода нолдави шаршавось. Тевесь ульнесь тельня, маринь, Од иень невтематнес тей эрявить Ловняськеть. Совинь ды видьстэ кевкстинь: «Ловняськеть тенк эрявить? Саемизь!» Бажинь аволь куватьс, ансяк Од иень кенярксчитнестэ важодемс, кадовинь жо куватьс. Ней уш кемень иеть мон Ловняське.
Эряви меремс, Ирина Рахманова, теке мерят, алкукс ёвкссто сазь Ловняське, кона ашти Якшаматянть вакссо. Мазый, валдо черь, сэнь сельме марто, чамасонзо свал мизолкс, варштавксозо лембе, корты чевте вайгельсэ. Эйкакштне педязь педить тензэ. Нама, аволь ансяк Ловняськекс кадовсь важодеме, сонзэ саизь труппав, совавтызь молиця спектаклятнес. Теде икеле кармасть тонавтомонзо кирдемс някатнень, важодемс сцена лангсо.
– Кувать савсь тенень тонадомс. Школасояк яксинь театрань кружокс, профессиональной тевесь жо тунь лия. Монь эйсэ тонавтсть сценань ветеранось Галина Якушина, МР-нь заслуженной артисткась Галина Максутова, Иван Чиндяйкин. Отпусконь шкастояк эрьва чистэ ульнесть занятият. Мон ёвтан тенст покш сюкпря. Васенцекс налксинь «Клочки по закоулочкам» спектаклясонть, покш ролень ульнесть «Серебряный колокольчик», «Мышонок-озорник» путовкстнэсэ. Меельцентень сёрмадынь музыка. Режиссёрось мельспаросо вастызе тень. Тешкстаса, минек театрасо паро мельсэ максыть ки одтнэнень, кинь улить кодаткак од мельть, од тевть – ансяк важодть.
– Ирина, кода чачни спектаклятнес музыкась?
– Васняяк юты кортамо режиссёронть марто. Сон домкасто ёвтнесы, мезе карми молеме сценанть лангсо, кие кодамо роль карми налксеме. Ламоксть ловносынек-ванкшносынек пьесанть, кодамо таркас эряви теемс музыка ды кодамо сон улезэ. Тейнян музыкань васенце наброскат ды кандан режиссёронтень. Ней, Интернетэнь шкасто, вадря, кучсак, ды сон сеске ёвтасы, косо мезе а истя, косо мезе полавтомс. Гайттне сынсь вельмить пряпотсо. Эрьва спектаклясонть ули музыка, косо сон ансяк 10 минутат гайги, косо жо малав весе путовксонть перть – 50 минутат. Чарькодеви, эрьва спектаклясь ушодови кодамояк музыкасто: ошонь гайтть эли велень, атякшонь морамо эли вармань вешкема ды седе тов. «Серебряный колокольчик» спектаклянтень базарсто раминь эйкакшонь налкшке – металлофон. Ансяк кудов самодо мейле ванкшныя, сон гайги аволь истя, кода эряви, колавкс мартоль. Тень лангс апак вано, гайгемазо лия ёнов а молиця ды сон пек ладясь спектаклянтень.
Иринань кудосо ули студия, косо сон сёрмадыяк музыканть. Музыказо гайги 22 спектаклясо. Аволь ансяк Някань театрасо, истя жо Эрзянь ды мокшонь драмтеатрасо ды лия ошсо.
МР-нь Някань государственной театрасо сон налкси 33 спектаклясо. Сехте вечкевикстнэнь ютксо – «Золотой цыплёнок», косо гайги пек ламо музыка, весе геройтне морыть. Ирина налкси Ривезенть! Эйкакштне ух кода пижнить ваномсто, бажить идемс Ципакиненть Ривезденть. Истя жо «Два клёна», «Два весёлых гуся» путовкссонть сон налкси сисем персонажт: Лейне, Каштомо, Умарина, Ванине, Каткине, Гала, Ава.
Сеедьстэ ёроков тейтерь-авантень пшкалить сёрмадомс музыка кодамояк покш тевс. Истя, С. Д. Эрьзя лемсэ республиканской изобразительной искусствань музеенть марто тейсь «Звуки и краски мордовского костюма» аудиоспектакля. Ирина невтизе прянзо кода звукорежиссёр. Някань театрань ды Нацтеатрань артисттнэ сёрмадызь вайгелест. Зярдо соват С. Д. Эрьзянь музеень декоративно-прикладной искусствань залс, косо ванстовить кезэрень ули-паротне, мереви лепштямс пульт лангс, сестэ колонкатнесэ ушодови ёвтнема, мезе невтеви витринатнесэ, эрьва экспонатось корты эседензэ, сценариесь пек мельстуиця.
Тедеде «Союз Эрьзя Фильм» студиянтень Ирина сёрмадсь сюита, конань седизе Л. П. Кирюков лемсэ музучилищань ансамблясь. Теезельть анимационной кавто фильмат, неть: «Окно в детство» артыцянть В. Попковонь живописень произведениятнень коряс ды «Отражения» – В. Шанинэнь графической артовкстнэнь коряс. Сынст ваномсто неят артыцятнень картинаст ды гайги Иринань музыказо. Сонзэ сёрмадомсто од композиторось натой морась чайникс, истя бажась муемс лия ёнов а молиця гайтть.
Теде башка, ульнесь проект «Солнечный мир Мордовии» вейсэндявксонть марто. Даунонь синдром марто эйкакштненень Ирина Рахманова ютавтсь музыкальной занятият.
Сентябрянь 16-17-це читнестэ Саранскойсэ карми «Время героев» национальной премиянь фестивалесь. Тосо Някань театрань артисттнэ невтьсызь «Сегодня в эфире» мельстуиця спектаклянть. Пьесань автортнэ – Марина Куксова ды Вика Васильева. Музыканть сёрмадызе Ирина.
Минек героинясь седи, сёрмады музыка, налкси театрасо ды морсияк. Эрьва ие Саранскойсэ ютавтневи «Поют драматические актёры» республиканской фестивалесь. Ирина кавксть изнясь Гран-при. Муевсть истят ломанть, конат тошкадсть пилезэнзэ: саты теть пелькстамс ды сайнемс изнямонь таркат. Сон эзь покордаво, ансяк тедеде уш эзь мора. Анокстась тов номер, косо морасть Някань театрань кавто актрисат. Лиссь пек мазыйстэ, тейтертненень макссть колмоце тарка.
Юткошканзо Ирина ютавты малавиксэнзэ марто. Яви покш мель цёрынензэ туртов, конанень сисем иеть, сонгак вечки сакшномо Някань театрав ды ваномо аванзо спектаклятнень.
Татьяна Маторкина
Сентябрянь 7-це чистэ МР-нь Някань государственной театрасо панжови 86-це сезонось. Вишка ваныцятнень туртов невтеви «Солнышко и снежные человечки» спектаклясь. Режиссёрось – МР-нь заслуженной артисткась Лилия Шахова, композиторось – Ирина Рахманова.