Кезэрень шкатнестэ саезь минек масторонок рашты ёроков кедь ломанть, конат теить тамашань тевть эли мазылгавтыть перькаст эрямонть. Минек ёнксось сюпав виртнесэ, секскак шкинемасо содавикс важодемакс тесэ ловови чувтосто керсемась. Нама, те седе пек ловови цёрань тевекс. Ловт, эрьва велесэ муевить кедьчелькевть чувтосто керсемань коряс, ансяк аволь эрьва косо теить дивавтыця мазычи.
Орданьбуе ёнксонь Редкодубье велесэ чачозь лелят-ялакст, Олег ды Михаил Бодровтне, умок кочкасть эстест седейвитиця тев – фанерасто тейнить эрьва кодамо мазычи. Кода сынсь видькстыть, те тевесь канды тенст кеняркс ды мелень витема. Ансяк эйстэдест эрьвась важоди эсензэ лувсо: вейкесь – нихромонь уськесэ, омбоцесь – лобзиксэ. Сынст важодемаст марто теевинек содавиксэкс Редкодубье велень покш чистэ, зярдо кедьчелькев эрицятне эсь теевкстнэстэ анокстасть выставкат. Васняяк кортнинек Олег Бодров марто.
– Олег Петрович, кода ды зярдо тынь кармиде тееме истямо мазычи?
– Школасо тонавтнемстэ минек ульнесь трудонь уроконь пек вадря тонавтыцянок. Лемезэ – Павел Михайлович Виноградов. Вечксь весементь тееме мазыйстэ ды кепедезь ёжосо. Сон сыремтизе мелем чувто марто важодемантень ды тонавтымим лобзиксэ керсеме. Васенце теевксэм ульнесь вишка горобиине (руз. шкатулка). Ней весе юткошкам ютавтан керсемань тевсэ.
– Кодамо инструментсэ керсетядо фанеранть? Ды стака-аволь тень теемс?
– Ушодынь керсеме лобзиксэ, ней нихромонь уськесэ – эйсэнзэ 12 вольтонь напряжения. Сон каляви электричества вельде якстерьгадомас ды мейле кери куш кодамо чувто. Стакась мезеяк арась, стака анокстамс карандашсо артовкс фотографиянь коряс. Карандашто башка карми эрявомо линейка. Весемесь онкстневи, тешкстави конёв лангс, ды ансяк теде мейле ушодови фанера марто важодемась. Вана те покш кудыненть целанек монсь артыя, кодамояк фотос апак вано. Тешкстнемантень тусь пельчи. Мейле колмо чить керсинь эйсэнзэ. Фанеранть саян лавкасто, эрьва кодамо эчкелмань.
– Фанерадо башка мезе марто эштё важодтядо?
– Теян эрьва кодат кедьгеть. Уськестэ кодан эрьва кодамо тюсонь кептернеть. Кавто иеде икеле ушодынь тееме узереть. Васня тонавтнинь минек велень мастерэнть пельде, кона важоди кшни марто. Сынь кудов, варчия, тевем тусь. Вана те секирасонть пек вадря лазномс пенгеть. Сон шождыне, пек вадрясто пезны чувтос. Те вана катана, стака, алкуксонь… Ламова эйсэст теян исторической коллекциянь кис, лиясто, бути вешить, микшнянгак.
Тешкстасынек, секирась – кезэрень кувака лезвия марто лазыця кедьёнкс, аламодо моли узере ёнов. Неень шкасто эйсэнзэ нолдыть тевс велень тевтнень топавтомсто: правтыть чувтот, лазныть пенгеть, чувтонть лангсто урядыть керь, валакавтыть лазт ды седе тов.
Катанатне ульнесть самураень тюрема кедьёнксокс. Сонзэ кувалмозо кирдемапеленть марто метрадо цють седе ламо, косояк 1 м 10 см, сталмозо малав кавто килот. Эйсэнзэ тюрсть кода вейке, истя жо кавто кедьсэ кирдезь.
– Мезе эйсэнк кармавты тееме истямо мазычинть?
– Мон истямо ладсо оймсян важодемадо. Ней Орданьбуень больницясо важодян пидицякс. Керсема тевесь жо монень оймсемакс маряви. Ды бути лиси истямо мазычи, эстетькак мельспаро – седеесь моразь моры…
Кода карминек содамо, Олег Петровичень кавто цёранзо, ды семиязо эри учомасо – низэ ней пешксесэ, ды кода кортыть, карми тейтерька. Арсетяно шумбрачи весе кудораськензэ туртов.
Олег ды Михаил Бодровтнень важодевксэст эрьва иестэ невтневить «Шумбрат, Мордовия!» фестивальсэнть. Ней ёвтнетяно Михаил Петровичень керсевкстнэде. Ды, вай авакай, тесэ седеяк ламо мазычи! Лангозонок ваныть фанерасто керсезь каткат, пазават, каретат (конань лангсо ансяк Екатерина инязоравась ардтнесь Казань ошка), вазат, част, эрьва кодамо кедьгеть ды ламо лия мезть ладсезь столензэ лангсо. Сельметь кадовить мазычиденть. Ды сехте покш важодевксэсь, конадо весе кармасть кевкстнеме, – те метрашкань келесэ Миланонь кафедральной соборонь макетэсь. Эйсэнзэ мастерэсь керсесь кавто иень перть. Меленть саизе Интернетстэ. Неизе вишка макетэнть вейке мастерэнь фотосто. Арсезевсь: «Бути сонензэ теевсь, тееви моненьгак». Важодемась мольсь аволь шождасто. Васня теизе каркасонть. Мейле эрьва пельксэсь керсевсь башка ды путневсь каркасонтень. Эрьва пелькскенть савсь керсемс малав колмоксть. Сынь пек човинеть, лиясто сеске синдтревить, сави ушодомс тевенть одов…
Браттнэстэ бути васенцесь чувтонть керси нихромонь уськесэ, омбоцесь важоди ансяк лобзиксэ. Михаил Петрович керсевксэнзэ киненьгак а микшни, келя, а вечки тееме вейке тевенть кавксть. Секскак вейкеяк керсевксэсь а моли лиянть ёнов.
– Михаил Петрович, мейстэ тень весе тейтядо ды мезе лангсо важодтядо ней?
– Весемесь, мезенть нетядо столенть лангсо, керсезь фанерасто. Седе ламотне тесэ теезь апельсинэнь ящикстэ, конань ёртнить лавкатне. Мон пурнасынь ды максан тенст омбоце эрямо. Те фанерась пек човине, секскак вадрясто керсеви лобзиксэ.
Ней мазылгавтан кудонь стенам. Тагояк ламо шка юты тень лангс. Истя жо ули мелем керсемс псакань весе породань чачотнень. Течис керсезь ансяк сисем, весемезэ арсян теемс комсешка.
– Мезекс тынь важодтядо ды кудосонк кие эштё машты керсеме?
– Профессиянь коряс мон телемастер, ансяк важодян санитарокс минек социальной обслуживаниянь кудосонть. Керсян свал важодемадо мейле. Монь кавто тейтерень – Вера ды Полина. Нама, чувто марто озямось – те аволь тейтерь-авань тев. А вана нуцькан, Егор ды Сергей кавтаськетне, конат тонавтнить ветеце классо, Верань цёранзо, паро мельсэ мартон носкить. Ансяк уш пек куроксто сизить ды ушодыть пеняцямо: «Вай, кедем сизесь, вай, суром ёзавсь...»
Чарькодеви, тесэ эрявить вийть, цидярдома ды мель. Нама, ялатеке, кеман, эйстэдест касыть монь тевенть поладыцят.
Вана истят кавто лелят-ялакст эрить Редкодубье велесэ, конат маштыть ломантнень дивавтомо эсь ёрокчисэст. Арсетяно вастовомс мартост «Шумбрат, Мордовия!» раськень фестивальсэнть.
Марина Агафонова