И. Д. Воронин лемсэ краеведениянь музейсэ ютась Равчирень федеральной округонь культурань сюпавчинь таркатнень ванстомаст коряс специалисттнэнь туртов окружной семинар-промкс. Саранскоев сакшность Россиянь ёнкстнэстэ ламо инжеть.
Лембе валт марто инжетненень пшкадекшнесь МР-нь Культурань, национальной политикань ды архивень тевень министрань васенце полавтыцясь А. И. Карьгин. Кортамосонзо сон пачтясь, Мордовиясо улить культурань сюпавчинь 1290 объектт, сынст вансты государствась, юткстост 97 – федеральной значениянь, 757 – региональной, 436 – тешкстазь культурань сюпавчинь таркакс. 441 кеврунго путозь Ине Отечественной войнасо чавовозтненень. Республикасонок свалшкане ваныть памятниктнень мельга. Культурань сюпавчинь (историянь ды культурань памятникть) государственной вейкине реестрас совавтозь Мухинтнэнь кудось (артыцянь) ды Саранскоень духовной училищань зданиясь.
«Развитие культуры» государственной программанть коряс ютавтовить витнемат-петнемат Иоанно-Богословской кезэрень церьковасонть. Теде башка, седе тов арсеви витнемс Темниковань Санаксарской монастыренть ды Трехсвятительской церькованть (1761 иень).
Мордовиясо тевс нолдави «Легенды дворянских усадеб» проектэсь (сонзэ вети «Мордовиянь культурань волонтёрт» организациясь). Теде башка, вете этапсо паролгавтови винань складонь ташто зданиясь – тосо карми «Арт-завод» креативной кластер. Те топавтови грантонь ярмактнень лангс.
– Равчирень федеральной округсо теевсь паро коекс ютавтнемс окружной вастовомат, конат алтавить культурань сюпавчинь таркатненень. 2009 иестэ ПФО-ка Культурань министерствань Управлениясь свал ютавтни истят семинарт прявттнэнь ды специалисттнэнь туртов. Истя жо тей тердевкшнить региононь правительствань важодицятне, конат ветить те ёнксонть. Минек вастовоматнень прявт мелесь – важодемасонок содамочиденек кортамось, ванкшномс кевкстематнень ды стакачитнень, конат сюлмавозь культурань сюпавчинь таркатнень ванстомаст коряс, – пачтясь ПФО-ка Минкультурань Управлениянь прявтось Г. А. Петухов.
– Минек масторонь югось ды Северной Кавказось пек сюпавт культурань сюпавчинь таркатнень коряс. Ламот содасызь Дагестанонь Дербентэнь памятниктнень, Херсонесэнь кезэрень шкань кеврунготнень ды лия таркатнень, кода а ледстямс Волгоградсо «Родина-мать зовёт!» Сталинградонь тюремантень алтазь монументэнть ды Севастопольсэ героической оборонань музеенть. Округсонок кеветее регионт. Эрьвасонть улить башка программат, конат важодить культурань объекттнэнь коряс, мельгаст ванкшнотано, витнетяно-петнетяно, топавттано РФ-нь Президентэнть кармавтоманзо. Сюкпря ёвтавлинь коллегатненень тей тердеманть кис, вейсэ миненек ули мезде кортамс, – тешкстызе Южной ды Северо-Кавказской федеральной округтнень Россиянь Культурань министерствань Управлениянь прявтось Денис Проценко.
А. С. Неверовец ёвтнесь, кода ванстовить Дальневосточной федеральной округсо культурань сюпавчинь таркатне. Ульнесть ламо лия мельстуиця кортамот. Нама, инжетне содавтовсть минек ошонть, И. Д. Воронин лемсэ краеведениянь музеенть ды лия таркатнень марто.
Татьяна МАТОРКИНА