«Равось – ояксчинь лей. Рав чирень раськетнень культуратнень вейсэнь кортамось» XXI-це экспедициянть анокстыцятнестэ вейкесь – те Россиянь Национальносттнень тевтнень коряс Федеральной агентствась.
Колмо иеть уш те фестиваленть участникекс ды семинаронь спикерэкс эрси ФАДН-нь прявтонь полавтыцясь Станислав Бедкин. Тедеде сон ветясь «Актуальные вопросы реализации Стратегии государственной национальной политики Российской Федерации» теманть коряс семинар. Тешкстама, Станислав Бедкин сакшнось фестивалентень викшневкс марто ашо панарсо. Сон толковизе, келя, те мазычинть тензэ казизь Мордовиясто ды сон мельспаросо оршизе экспедицияв, зярдо марясь, тесэ эряви прянть невтемс национальной оршамопельсэ. Минь вастовинек Станислав Анатольевич марто «Федор Достоевский» теплоходсонть ды кевкстнинек, кода топавтови те Стратегиясь, ды вечкеви-арась тензэ этноэкспедициянть ютавтома лувось.
– Станислав Анатольевич, тедедень этноэкспедициянть прявт мероприятиятнестэ вейкекс кармась кортамось Государственной национальной политикань Стратегиянть топавтомадо. Ёвтнеде, инескеть, мезе тееви Федеральной Агентствасонть тень коряс, кодат сехте прявт кевкстематне?
– Минь совинек Россиясо Государственной национальной политикань Стратегиянть меельце этапонтень, кода содатадо, сон моли 2025 иес. Кемекстынек сонзэ топавтомань аравтлувонть: те од программной документ, конась пек келей ды ламос бажиця. Келейгадсть сонзэ топавтыцятне, минек ФАДН-нть башка, юткозост совасть аволь ансяк коень коряс гуманитарной ёнксонь ведомстватне, истя жо Миноборонась, МЧС-сь. Минек командантень совась Минвостокразвитиясь. Нама, эрямось аравтлувтнес совавты од тешкст, сеть тевтне, конатне ней молить масторлангонть келес, кармавтыть минек васенце таркас ливтемс Россиянь раськетнень ютксо вейсэндявоманть, седеяк пек кемекстамонть. Аламодо полавтовсть аравтлувтне, конатне сюлмазельть омбо мастортнэнь вейсэнь важодеманть марто. Ялатеке, тедеде мастортнэсэ коренной раськетнень кельтнень ванстомаст, виевгавтомаст туртов ушодозельть кемень иень перть ютыця мероприятият. Минь васенцекс весе мастортнэнь ютксто панжинек национальной комитет, кемекстынек планонть федеральной уровеньсэ. Аволь умок тень коряс ютавтынек раськеютконь конференция, максынек ушодкс те кемень иень шкантень. Весе мелявкстнэнь лангс апак вано, эйзэнзэ сакшность 40 масторонь представительть. Кода нетядо, задачатне икеленек аштить пек покшт ды минь карматано эйсэст топавтомо!
– Кода тенк «Равось – ояксчинь лей» этноэкспедициянть-фестиваленть аравтлувось?
– Мон уш колмоцеде те этноэкспедициясонть ды, мелем коряс, те сехте паро ды шкастонзо ютыця мероприятия, конанть вельде ломантненень пачтявить государственной национальной политикань од «трендтнэ» ды се, мезе тееви властень органтнэнь вийсэ. Ванодо, тедеде топодсть кемень иеть, кода лиссь «Россия. Национальный вопрос» Российской Федерациянь Президентэнть В. В. Путинэнь статьязо. Тосо сон тешксты, государственной национальной политикась топавтови аволь чиновникень сэтьме кабинеттнэсэ, а самай истят мероприятиятнесэ.
Арсян, экспедициянь участниктне тесэ свал муить мезеяк од, од ялгат-оят, кадык Рав леенть чиресэ эриця раськетнень вейсэнь кортамотне кармить седеяк кемекстамо ютксост ялгаксчинть!
Станислав Бедкин семинаронть ютавтома шкасто эштё тешкстызе истямо ёнксонть: келень тонавтнеманть коряс весемесь ашти эсенек эйстэ, кода карматано кастомо-трямо эйкакшонок семиясо. «Минь, зярдо кортатано келенть коряс, свал учотано чиновниктнень пельде, сынь примить закон ды весень кармавтсызь кортамо тиринь кельсэ. А кудосо эйсэнзэ а кортатано… Законось – те аволь панацея. Весемесь, мезе тееви «закононь буквакс», ёмавтсы моральной питнейчинть… Монь койсэ, весемесь ашти семиястонть, кода тынь эйкакшонк туртов толковасынк келенть эрявиксчинзэ. Кода, невтемакс, монень тетям тень пачтизе, истя бажангак эрямо. Ды кодаяк те лувось апак сюлма законодательстванть марто эли се шкатнень марто, конат ульнесть ютазь пингень 90-це иетнестэ, ды се тарканть марто, косо мон важодян», – седейшкава ёвтнесь Станислав Анатольевич.
Марина ДЕВЯТОВА