Ульяновской областень Инзабуень Поддубное велень школасо ютась «Просветители и педагоги мордовского народа: от истоков до наших дней» регионъютконь кругловой столесь. Сон алтавсь эрзянь васенце просветителенть А. Ф. Юртовонь чачома чистэнзэ саезь 170 иетненень. Истямо промксонть ютавтызь Инзабуень Образованиянь управлениясь, А. С. Пушкин лемсэ библиотекась, Ульяновской областень эрзянь ды мокшонь раськень культурань автономиясь.
Лембе вал марто пурнавозтненень пшкадсь Инзабуень Образованиянь управлениянь прявтось А. В. Игнатов. Сон ёвтнесь седе, кодамо раськень эйкакшт тонавтнить районсост. Поддубное велень средней школань прявтось А. Н. Орлов ламо ёвтнесь школань историядонть, тонавтыцятнеде, тонавтомань аравтлувдонть, кодат мельть-бажамот аштить учебной заведениянть икеле.
Ульяновской областень эрзянь ды мокшонь раськень культурань автономиянь прявтось В. А. Софонов ды областень Образованиянь ды наукань министерствань «Институт развития образования» ОГАУ-нь прявт специалистэсь И. Э. Матюнина тешкстызь, кодамо покш смусть канды Авксентий Юртовонь лемезэ Ульяновской областенть туртов. Сынь ёвтасть сюкпрянь валт кругловой столень пурныцятненень, тердсть весень явомс мель вастовоматненень, конат алтазь просветителенть юбилеентень.
Кругловой стольсэнть ловнозельть докладт эрзянь ды мокшонь просветительтнеде, А. Ф. Юртовонь ды М. Е. Евсевьевень педагогической тевдест, неень шкань тонавтыцятнеде, тонавтомасо од вешематнеде ды седе тов. Филологиянь наукань докторось, доцентэсь, Н.П. Огарёв лемсэ МГУ-нь финнэнь-угрань кафедрань прявтось Ю. Г. Антонов кортась XIX пингень омбоце пельксэнь просветительствадо.
Вастовомасонть истя жо ульнесь исторической наукань докторось, педагогической наукань докторось, РФ-нь школань заслуженной тонавтыцясь В. Н. Шкунов, сон ёвтнесь Инзенской крайсэ чачозь просветительтнеде.
А. С. Пушкин лемсэ библиотекасто якасть зярыя инжеть. Филологиянь наукань кандидатось, библиотекань учёной секретаресь Н. В. Никерова (кортась «Дневник преподавателя Казанской учительской семинарии М. Е. Евсевьева…» важодемасонть эрзятнень ды мокшотнень обуцяст невтемадо). Раськень ды краеведениянь литературань отделэнь прявтось Н. В. Бочканова анокстась «А. Ф. Юртов – просветитель, учёной, педагог» теманть коряс паро доклад. 2023 иестэ топодсть 100 иеть солдатонть, писателенть, педагогонть Ф.К. Андриановонь чачома чистэнзэ саезь. Сонзэ педагогической тевтнеде ды литературань сюпавчиденть пачтясь теке отделэнь прявт библиотекаресь В. Б. Бояркина.
Вал истя жо сайнесть МР-нь Писателень союзонь правлениянь прявтось, «Чилисема» журналонь ответственной секретаресь Т. П. Швецова, филологиянь наукань кандидатось, М. Е. Евсевьев лемсэ МГПУ-нь тиринь келень ды литературань кафедрань доцентэсь М. М. Акашкин.
Меельцекс кортась РФ-нь заслуженной тонавтыцясь, Черемушкинской велень поселениянь прявтось, Инзенской райононь эрзянь ды мокшонь автономиянь председателесь И. В. Смолкин.
Поддубное велень школань тонавтницятне анокстасть мельстуиця концерт, сынь морасть эрзянь морот, тейсть инсценировкат. Инжетнень туртов ютась мельстуиця экскурсия школань этнографической музейга, сонзэ ветясть тонавтницятне, истя жо невтевсть раськень ярсамопельтне.
Лиссь лезэв, вадря кортамо, весе пурнавозтне ёвтызь мелест седе товгак поладомс Ульяновской областенть ды Мордовиянть ютксо вейсэнь важодеманть.
Надежда БОЧКАНОВА,
Валентина БОЯРКИНА
