Неть читнестэ минь ульнинек инжекс Лямбирень райононь Черемишева велесэ, косо вана уш 2017 иестэ саезь важоди «Лездамо» кооперативесь. Кода чачсь ды кода важоди организациясь – теде миненек ёвтнесь сонзэ прявтось Пётр Павлович Гришанин.
Пётр Павловичень чачома-касома тарказо – Краснослободскоесь, школанть прядомадо мейле тонавтнесь Краснослободскоень ветеринарной техникумсо.
– Ветеринариянтень седеем панжия пиже цёрынекс. Ледстяса, кода весть шабранть буказо повавсь умарьс, монь тердимизь идемензэ. Авась пшкадсь тень: «Петя, тонь кедеть човинеть, кувакат, инескеть, тонгик вазонть кирьгапарезэнзэ ды таргик тосто умаренть!» Вишка пингестэ пелемат кодаткак арасельть, мон кунсолыя аванть ды ушодынь идеме. Ансяк пайстомо ракшась лездамодон седеяк тандадсь ды сускизе кедем истя – сельместэнь сяткот ливтясть, тень лангс ванозь, шабрам кувать апак арсе сускизе ракшанть, нать, истя бажась идемс монь буканть кургосто, – пейдезь ледстни Пётр Павлович.
Ледстясынек, икелень шкатнестэ кой-кона студенттнэнь марто велень хозяйстватне сёрмадыльть трудовой договорт, штобу студентэсь тонавтнеманть прядомадо мейле саволь важодеме те хозяйствантень. Лиссь истя, што Пётр Павловичень тонавтнема шкасто Краснослободскоень хозяйстватнесэ важодицятнеде ламольть. Сестэ цёранть авазо, Светлана Борисовна Гришанина, кона чачсь-кассь Кочкуровань райононь Семилей велесэ, гайневтсь сазоронзо туртов, кона се шкантень ламо иеть важодсь «Норов» Агрофирмасо, ёвтнизе весементь, кода ули, ды секе чистэнть цёрантень муевсь важодема тарка.
Аламонь-аламонь цёрась ютынзе профессиянь весе кузтематнень. Васняяк, 2003 иестэ саезь Петянь аравтызь ветеринарной врачокс, зярыя иень ютазь кассь прявтонь полавтыцякс. Ве шкасто важодеманть марто Пётр Павлович заочна тонавтнесь Н. П. Огарёв лемсэ МГУ-нь Аграрной институтсо.
– «Норовсо» важодинь 2010 иес. Ды туинь тосто а ськамон: козяйка марто. Ирина Николаевна се шкастонть важодсь тинге лангсо. А сёпан, кода васенцеде неия, сеске меринь цёратненень: «Вана те тейтерькась карми монь никс!» Шкань ютазь, 2006 иестэ, истя лисськак. Минь урьвакстынек», – ёвтни Пётр Павлович.
Неень шкасто цёранть улить кавто эйкакшонзо: кеветее иесэ тейтерьказо Ева ды кевейкее иесэ Никита цёрынезэ.
Пётр Павловичень эрямонь кинзэ лангсо вастневсть ламо ломанть. Понгонесть истяткак, конатне пряст тейнесть тензэ паро ялгакс, ансяк секе-тев арсесть цёранть туртов апаро. Ды неть раужо ойме ломантнень ютксто муевсь ды течинь чис кадовсь вейкесь, конань Пётр Павлович лемди алкуксонь оякс ды вить кедекс.
Кортамось поладови прявтонь полавтыцядонть, конань лемезэ Дмитрий Владимирович Проничкин. Цёрась чачсь-кассь Саранск ошсо. Школанть прядомадо мейле тонавтнесь фельдшерэкс. Мейле тусь нинзэ марто эрямо Московов. Тосо кирдевсь а куватьс, нинзэ ульнесь покш мелезэ чачтомс тиринь ошсо, секскак од семиясь велявтсь Мордовияв.
– Пётр Павлович марто минь теевинек содавиксэкс, кода ульнинек студентэкс. Сонь вечксь ракшань лецямо, а мон – ломанень. Эйстэнек эрьванть седейсэ жо палсь лездамонь-идемань толнэсь, арсян, те, паряк, вейсэндимизьгак, – ледстни Дмитрий Владимирович.
Мордовияв велявтомадо мейле Дмитрий Владимировичень ульнесь мелезэ варчамс прянзо кодамояк лия ёнкссо, ансяк лецямонь тевентькак ве ёнов а кадомс.
Истя, шкань ютазь, 2011 иестэ, кавто ялгатнень чачсь вейсэнь васенце тевест: сынь панжизь «Идемс» ООО-нть.
Бути Пётр Павлович велень хозяйствасо марясь прянзо теке кал ведьсэ, Дмитрий Владимировичнень савсь ламо ливезь валомс, эдь цёрась те тевентень чопавтсь васенцеде.
– А сёпса, 2011 иестэ мон васенцеде неия ды чарькодия, мезе те истямось – скалось. Од порасто саезь тонадынь лецямо ансяк ломанть, а неть сёргов-моргов сюро ракшатнень марто мон а содылинь, мезе теемс ды кода сынст марто ветямс прянть, бути сынст эсест келест – космосонь. Секскак, минек вейсэнь тевсэнек прявтокс кармась Пётр Павлович, а мон седе ламо карминь важодеме конёв марто, – ледстни Дмитрий.
Цёратне эсест вейсэнь тевсэст лездасть фермертнэнень ды эсь подсобной хозяйствань кирдицятненень оборудованиянь ды комбикоромонь коряс. Предприятиятне вишкинеть, поставщиктне сыненст мель а явить. Фермертнэнь аволь свал ульнесть ярмакост пандомс: пандсть сюросо, тикшесэ, лиясто вазсо.
Седе тов цёратнень чачсь мелест варчамс кодамояк седе покш тев. Истя 2017 иестэ панжозель «Лездамо» кооперативесь.
– Ушодынек чаво таркасто, чарькодеви, теинек ламо ильведькст, сынтемест а кода. Васня сивединек аволь покш помещеният. Раминек дробилка, карминек нолдамо комбикором ды миемензэ фермертнэнень. Седе тов раминек кавто тёжат кавонзазь метрас эсенек склад. Сон ашти Лямбирень райононь Черемишевасо, тесэ минь самай важодтянояк. Нама, васенце шкастонть эзинек сода, кода касомс седе тов, мезе теемс. Истя сась мель пшкадемс Компетенциянь центрав. Тосо се шкастонть важодсь «Кооперациянь школась». Мон ушодынь тонавтнеме те проектэнть коряс. Ды вана 2023 иестэ тенек макссть покш грант – 16 млн целковойть. Тень лангс ней рамсетяно комбикоромонь нолдамс эрявикс оборудования. Теде башка, сюронь ванськавтомань ды кирдемань оборудования. Сонзэ вельде арсеви вейке часос нолдамс ниле тоннат комбикором. 2023 иестэ эйстэдензэ нолдынек 221 тонна. Сонзэ микшнинек Мордовиянь районтнэва, Нижегородской, Ульяновской областтнева ды Татарстанов. Минек вельхозкооперациянть ули вейке ООО-зо, 5 КФК-т, 10 ЛПХ-т. Раминек 250 пряс животноводческой комплекс ды ракшат. Нама, седе тов арсетяно ансяк касомо ды келейгадомо. Ды мезе илязо уле важодемань кинть лангсо, сехте эрявиксэсь, нама, вечкема тевенть, а минек эйсэ те ули! – тешксты Пётр Павлович.
Истя жо эряви ёвтнемс сеть ломантнеде, конатне важодить цёратнень вановтост ало. Важодицятнеде весемезэ кемень ломанть. Ды эрьвась эйстэдест топавты ды соды тевензэ пек вадрясто. Ютксост водительть, трактористт, комбикоромонь гранулировщикть.
Ютксост сехте од специалистэсь Андрей Александрович Жидкин, кона чачсь-кассь Кочкуровань райононь Семилей велесэ. Тетянзо-аванзо свал важодсть колхозсо, секскак цёрынькась аванзо ловсо марто кармась содамо, мезе истямось певтеме сюронь паксятне, фермань ракшатне ды велень хозяйствань техникась. Тень лангс апак вано, школанть прядомадо мейле цёрынькась тусь лия киява, ульнесь мелезэ варчамс прянзо поварокс. Истя сон прядызе Саранскоень политехнической техникумонть, конань прядомадо мейле зярыя иеть важодсь поварокс «Таки-маки» рестобарсонть. Цёрантень те важодемась мельс эзь тукшно. Сон кармась вешнеме лия тарка. Ды апак учне сон вастовсь Пётр Павлович марто, кона тердизе важодеме эсест кооперативентень. Ды вана уш кода котоце ие Андрей важоди тесэ трактористэкс.
– Важодемась монень вечкеви. Алкуксонь цёрань тев топавтан. Вишка пингестэ саезь содаса те тевенть. Нейгак сельмень икеле минек колхозонть эрямозо. Пиже цёрынекс свал ардтневтилинек прянок лелятнень кедьстэ, эцилинек трактористтнэнь юткс, ульнесь покш бажамо: чарькодемс техниканть келензэ. Ды ней вана мельспаросо важодян «Лездамо» кооперативсэнть, – корты Андрей Александрович.
Нама, Пётр Павлович ды Дмитрий Владимирович бажить ютамо седе икелев ды варчамо эсест пряст седе покш ды виев тевсэ. Истя, Дмитрий Владимирович те иестэ арси изнямс весероссиянь пелькстамосо грант.
Кемтяно, цёратнень весемесь лиси ды топавтови. Бути седейсэ эри алкуксонь вечкема важодема тевентень, а те минек геройтнень ули, сестэ сынст сатыть виест цидярдомс эрьва кодамо стакачитнень каршо.
Алена Артемьева
Фототне Эдуард РЕТУНСКИЕНЬ