Республикань паксятнесэ ушодовсть тундонь видемань тевтне. Велень хозяйствань ламот предприятиятнесэ уш прядозь малав весе тевтне озимой сюротнень ды ламо иень тикшетнень подкормканть коряс, таркань-таркань кундасть яровой сюротнень видемантень. Икельцетнень ютксо «Птицефабрика «Атемарская» ОАО-сь.
Неть читнестэ минь содавтынек те предприятиянть. Роботась хозяйствасонть лаказь лаки, весе тевсэть. Кода мерсь «Птицефабрика «Атемарская» ОАО-нь прявтось Александр Валентинович Щемеров, видемантень весемесь анок, шканть таргсеме а кармить.
«Птицефабрика «Атемарская» ОАО-нть сюронть алов моданзо весемезэ малав 13 тёжат гектарт. Истя, 3456 гектарт явозь шужонть алов, 921 гектар лангсо видеви товзюро, 887 – кснав, 1477 гектарт хозяйствасонть максозь сюрокс кукурузанть алов, эштё 428 гектарт – силосокс кукурузанть. Ламбамо якстерькайденть те иестэ кемекставсь видемс 735 гектарт. Теде башка, видевить малав 2000 гектарт соя ды 900 гектарт ламо иень тикшеть.
Кода мерсь Александр Валентинович, видьметнень анокстамонтень хозяйствасонть свал явовкшны башка мель. Секскак, кода икелеяк, тедеде седе покш пельксэсь эйстэст элитнойть.
– Сортонь одкстомтоманть туртов минь эрьва иестэ рамсетяно элитной видьметь кода озимой, истя яровой культуратнень. Ды истя жо тевс нолдатано эсенек васенце ды омбоце репродукциянь видьметнень. Те иестэ сортонь одкстомтомга раминек шужонь, кснавонь ды товзюронь видьмень элитной партия. Эряви тешкстамс, видьметнень коряс анокстамотне сёксня уш весе теезь. Секскак рамамонть ды сынст пачтямонть коряс мелявкст арасельть, – кемексты Александр Щемеров.
Теке марто хозяйствасонть ули весе эрявикс удобрениясь, ГСМ-сь ды техниканть вадрясто важодеманзо туртов эрявикс пелькстнэ. Те весемесь анокстазь аволь ансяк видемантень, сюротнень нуема шкантеньгак. Тень коряс роботась ветязь домка.
– Бути жо кортамс озимой сюротнеде, теленть видьметне ютавтызь а беряньстэ ды нейгак пек вадрят, – ёвтни Александр Валентинович. – Недляшкадо икеле озимойтнень ды истя жо ламо иень тикшетнень подкормканть коряс весе тевтнень прядынек. Сеске ушодынек яровой сюротнень видеманть алов минеральной удобрениятнень кайсеманть ды изамонть. Ней жо весе вийтне максозь видемантень.
Эряви меремс, сюронь видемань-нуемань шкатненень анокстамга, хозяйствась одкстомтызе тракторонь-машинань парконтькак. Истя, «Росагролизинг» АО-нь «Эсенектнень а кадтано» программанть коряс рамазь кавто «Кировец» тракторт. А «Раннее бронирование» программанть лувсо хозяйствась рамась ACROS 585 комбайна ды KSU-1 косилка. Техникась виев ды вадря. Арсеви, сонзэ марто тевтне кармить молеме седе эрязасто.
– Покш сюкпря республикантень ды федеральной министерствантень, велень хозяйствань предприятиятненень лездамга улить истят программат, – корты Александр Щемеров. – Теде башка, сынст юрсо важоди льготной программась, конань коряс кредитэнть пандомазо седе шождалгавтозь.
ТРУДИЙ ЛОМАНТЬ
Кода тешкстызе Александр Щемеров, предприятиянть касомасо-виевгадомасо покштояк покш путовксост тесэ важодиця ломантнень. Эрьва специалистэсь – предприятиянть нежезэ, хозяйстванть вандынь чизэ.
Ды те алкукс истя. Зяроксть савкшнось улемс тесэнь хозяйствасонть, свал сельмес каяви, кода эсь тевест топавтыть тесэнь важодицятне. Сынь путыть оймест ды весементь теить, кода кортыть, ве кедь лангс. Ды свал кемекстыть эсь прявтост валонзо – модась а вечки мельде-валдонь тев, сонзэ марто эряви важодемс превейстэ, мелень путозь. Ды вадрясто важодемантень сынь путыть весе виест.
Алексей Александрович Годунов хозяйствасонть важоди малав ниленьгемень иеть. Сась тей сеске армиясо службанть ютамодо мейле. Весе те шканть перть сонензэ савкшнось ойсемс эрьва кодамо тракторс ды комбайнас. Ды кода тешксты, неень шкань техниканть руль экшсэ роботамось покш мельспаро.
– Минек тракторонь паркось эрьва ие одкстомтови. Покш сюкпря, Александр Валентинович тень мельга ваны пштистэ, – корты Алексей Годунов. – Ней монь техникась анокстазь ламбамо якстерькаень ды кукурузань видемантень. Неть тевтнесэ агрегатось нолдави вейке, эряви ансяк полавтомс бороздатнень ютксо тарканть келензэ. Ламбамо якстерькаень видемстэ ряднэтнень юткось 45 см, кукурузанть видемстэ седе покш – 70 см. Ды зярдо видеви вейке культурась, лиянть туртов агрегатонть калавтнемс ды лиякс пурнамс а эряви. Вете минутас весемесь полавтови. Тесэяк неень шкань техниканть вадря ёнксонзо редявить.
Эряви меремс, предприятиясонть важодить пек ламо од специалистт. Кадратнень одкстомтомантень тесэ явови башка мель. Эдь кода содатано, одтнэнь мельга минек вандынь чинек.
Од специалисттнэнь ютксо механизаторось Максим Сергеевич Горин. Сась тей колмошка иеде икеле Саранскоень политехнической техникумонть прядомадо мейле. Эряви меремс, цёрась – Горинтнэнь механизатортнэнь династиянь поладыця. Неень шкасто хозяйствасонть роботы тетязо Сергей Иванович, малав весе пингензэ тесэ важодемантень максызе сонзэ покштязояк.
Од механизатортнэнь ютксот Андрей Николаевич Фомин ды Алексей Александрович Зубенков. Сынст техникаст – «Беларус» тракторось ды Horsch видемань комплексэсь. Видемантень цёратне анокстасть вадрясто, витнизь-петнизь весементь, мезень коряс ульнесть мелявкст. Ней ансяк важодемс.
Нама, тундонь видемась – а шожда шка. Эряви весементь теемс куроксто ды мелявкстомо. Секскак предприятиясь рамась УАЗ машина ды сонзэ юрсо тейсть специальной сервис паксясо важодиця техниканть витнемга. Эйсэнзэ улить бензогенератор, газосварка ды весе эрявикс инструменттнэ ды витнемапельтне. Важодить эйсэнзэ Олег Станкевич сварщикесь ды колмо слесарть. Бути, мертяно, видема шкасто тракторонть мезезэяк калады, сервисэнь специалисттнэ куроксто ардыть паксяв ды шкань апак таргсе весементь витьсызь-тейсызь.
– Эрьва иестэ видемась юты кавто недлядо аламодо седе кувать. Нейгак сон седе ламос, арсян, а таргави, – корты предприятиянь растениеводствань ды механизациянь коряс прявтонь полавтыцясь Сергей Сотов. – Тундонь тевтнесэ минек важодить видемань ниле комплекст – колмо Amazone ды вейке Horsch. Неень шкань вадря техникась ды одкстомтоматне пек лездыть весе тевтнень прядомс шкастонзо.
Юлия ЕРЕМИНА
Фототне
Эдуард Ретунскиень