Суббота, декабря 03, 2022
Важное

Эрьва ие мартонь колмоце недлячистэ эсь профессиональной кенярксчист – Эрицятнень бытовой обслуживаниянь ды жилищно-коммунальной хозяйствань важодицятнень чинть – тешкстыть ломантне, кинь важодемаст сюлмавозь услугатнень максомань сферанть марто, сынст ютксот ЖКХ-нь важодицятнеяк.


Неень шкань эрямонть стака неемс коммунальной службатнень свалшкань, чинек-венек важодемавтомост – китнень-янтнэнь ванськавтыцятнень ды цецянь-тикшень озавтыцятнень, мастертнэнь ды кияксонь шлицятнень, слесартнень ды сантехниктнень, диспетчертнэнь ды электромонтёртнэнь, водительтнень ды отраслянь лия представительтнень. Ламот алтызь профессиянтень весе эрямост, кандыть вахтаст эрьва чистэ, кенярксчитнестэяк, кодамо илязо уле пертьпельксэсь ды шкась.

Миненек, эрицятненень, мекс-бути аволь свал неяви коммунальщиктнень важодемаст. Зярдо куротне, ютамо таркатне ды китне урядазь, эрямо кудотнень подъездтнэ ванькст, весе ошось ваясь цецянь мазычис – тень кияк а реди. Бути жо ловось аламодо валинзе китнень эли тия-тува апак уряда шукшось – сёвномань-сюдомань валт ёвты малав эрьвась.

Течи эсь ловныцятненень минь ёвтнетяно жилищно-коммунальной отраслянь сеть важодицятнеде, кить аволь ансяк вадрялгавтыть минек эрямонть, сынь эсь тевсэст кепедить мельёжонть ды кемекстыть ёвтамонть: коммунальщиктнень ютксояк улить ёроковт, эсь тевенть вадрясто теиця профессионалт. Видькстатано, алкукс улить. Истятнэ важодить Саранск ошонь «ЖРСУ Октябрьского района» муниципальной предприятиясонть, конань прявтсо ёроков, эсь тевензэ парсте содыця ды топавтыця специалистэсь Михаил Владимирович Струёнков.
Неень шкане «ЖРСУ Октябрьского района» МП-нть вановт ало 149,47 вайгельбеть магистральной кить (покшолмась весемезэ 1 977 570 кавонзазь метрат), 457,43 вайгельбеть второстепенной кить (2 183 616 кавонзазь метрат), 278,97 вайгельбеть ютамо таркат (729 326 кавонзазь метрат), 299 ошонь транспортонь лотксема таркань павильонт ды 5 890 340 кавонзазь метрат пиже зона. Эряви меремс, предприятиясь важоди аволь ансяк Октябрьской районсо, сонзэ вановт ало ошонь весе районтнэ. Муниципальной предприятиянть прявт тевезэ – ошонь куротнесэ ваньксчинь ды мазычинь кирдемась.

Наталья НИКОЛАЕВА: «БУТИ ТЕВЕСЬ МЕЛЕНЬ КОРЯС, СТАКАЧИТНЕ
А МАРЯВИТЬ»

Наталья Юрьевна Николаева жилищно-коммунальной хозяйствань ёнкссонть важоди ветешка иеть. Ушодокшнось «Горремдорстрой» МП-сто, мейле роботась «Спецавтохозяйство» ошонь муниципальной предприятиясонть ды меельце зярыя иетнень перть труди Октябрьской райононь ЖРСУ-со. Авась топавты килангонь робочеень тевенть – сонзэ вановт ало общественной транспортонь лоткамо таркань зярыя павильонт.

– Телень шкасто важодемань чись минек ушодови валскень 4-5 чассто, – ёвтни Наталья Николаева. – Общественной транспортонь якамо шкантень лотксема таркатнень эрявить ванськавтомс ловонть эйстэ, почодомс чуваронь-салонь човорявкссо, штобу кияк аволь нолашто. Седе тов, валскень 8 чассто, важодеманок поладови предприятиянь бригадатнень юрсо, конатнень марто вейсэ важодтяно ошонь куротнесэ – ванськавттано китнень, ютамо таркатнень, ошонь площадтнень, истя жо почодтано эев таркатнень салсо-чуварсо.

Кода тешксты авась, кизна тевтнеде седеяк ламо. Маень 9-це чинтень шлить-одкстомтыть китнень кувалт аштиця пирявкстнэнь, общественной транспортонь лоткамо таркатнень, витнить, бути мезеяк кольсь-каладсь, белить чувтотнень, шлить-ванськавтыть ошонть рудазонть ды шукшонть эйстэ. Неть тевтне поладовить кизэнь перть.
Весе стакачитнень лангс апак вано, Наталья Николаева тешксты: важодемась сонензэ мелень коряс.

– Видьстэ меремс, тейтяно ламо мезе. Ансяк монь туртов неть тевтне кода-бути а марявитькак, роботам пек вечкса, – тешксты Наталья Юрьевна. – Коллективенек пек вадря, эсь тевень содыцят ды чарькодицят прявттнэ. Мон аволь Саранск ошсо чачозь, сынь тей Орданьбуестэ. Васень шкастонть савкшнось эрямс сиведезь квартирасо. Мейле предприятиясь лездась, макссь служебной квартира, седе шожда кармась. Покш сюкпря тень кисэ!

ВАЖОДИТЬ ЛОМАНТНЕНЬ ЛЕЗЭС

Ошонть ваньксчисэ кирдемань ды вадрялгавтомань коряс «ЖРСУ Октябрьского района» МП-сонть важоди Александр Иванович ТЕНЯЕВ. Сон предприятиясонть аволь умок, весемезэ колмо иеть. Эрямонзо перть жо савсь ютамс аволь вейке организация ды тонавтнемс аволь вейке профессия.

Александр Теняев чачсь-кассь Ромодановань районсо. Школадо мейле служась Забайкальской крайсэ, ульнесь пограничной войскасо. Армиядо мейле велявтсь Мордовияв, важодсь Саранск ошонь Телевизионной заводсо, зярсыя роботась экскаваторонь теема заводсо. Мейле эрямось ладявсь истя, сталмонь кандтницякскак (грузчик) савсь роботамс ды ламо лия эрьва кодат тевть топавтомс.

– Мейле арсезевинь: саты ве таркасто омбоцес кирнявтнемс, эряви муемс свалшкань важодема тарка. Истя понгинь Октябрьской райононь ЖРСУ-в, – корты Александр Теняев. – Ды тень коряс овсе а янксян. Важодемась тень вечкеви, кадык лиясто стакаяк эрси. Седе пек тельня, зярдо ловось чинек-венек моли. Ансяк урядасак, ванат, сон уш таго янонть вельтизе. Ялатеке эсь тевем вечкса, эдь минь тейтяно эрявикс тев.

Александр Теняевень вановт ало общественной транспортонь лоткамо таркань кавто павильонт. Теке марто сон важоди бригадасо. Сынст бригадась роботы ошонь Пролетарской районсо, ды сынь теить весементь тесэнь куротнесэ, китнесэ-янтнэсэ, площадтнесэ ваньксчинть ды мазычинть кирдемга.

ЭРЬВА ТЕВЕСЬ – ЭРЯВИКС

Неень шкань од ломантненень минек геройтнень профессияст марявить аволь престижноекс, ансяк вана сынь истя овсе а арсить. Столяронть Равиль Абдулахатьевич МЕНЯЕВЕНЬ предприятиясонть ловить кедьчелькев ломанекс, сонензэ виень коряс куш кодамо тевесь. Ды бути эряви мезеяк керямс, пилямс, строгамс-теемс, свал анок.
ЖКХ-нь ёнкссонть важодемадо Равиль Меняев эзь арсекшнеяк. Школадо мейле тонавтнесь Астраханень мореходной училищасо, бажась сюлмамс эсь эрямонть иневедень тевенть марто. Эзь лисе. Мейле прядызе Саранск ошонь электромеханической колледженть. Зярсыя роботась профессиянь коряс. 2013 иестэ сась «ЖРСУ Октябрьского района» МП-в ды важоди те шкас.

– Васняяк иешка, паряк, роботынь дворникекс, – корты Равиль Меняев. – Мейле предприятиянтень эрявсь столяр, арсия варчамс. Ёрокчим те тевсэнть ульнесь, секскак ушодынь шождасто. Ней жо апак кавтолдо мерян – важодян эсь тевсэнь.
Эряви меремс, предприятиянтень течияк эрявить важодицят. Тесэ покш мельсэ учить механизаторт, водительть, килангонь важодицят ды лия специальность марто роботникть. Бути кинь ули мелезэ теемс минек ошонть седе вадрякс, важодемань коряс пшкадеде «ЖРСУ Октябрьского района» МП-в.

Юлия ЕРЕМИНА.
Фототне: Эдуард РЕТУНСКИЙ

Мельвановикс ялгат, ЖКХ-нь отраслянь ветерант! Жилищно-коммунальной сферасо важодицятнень тевест свал ульнесь а шожда, ансяк тынь машттадо сонзэ топавтомо куроксто ды вадрясто, тынь тейтядо эрямонть седе вадрякс ды шождакс.
Покш сюкпря тенк важодеманть кисэ! Арсян тенк уцяска, сэтьме эрямо, од мельть-арсемат, конат лездыть жилищно-коммунальной сферанть вадрялгавтомасо-виевгавтомасо. Уледе шумбрат!

М. В. СТРУЁНКОВ,
«ЖРСУ Октябрьского района» МП-нь прявт.
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».