Вторник, ноября 29, 2022
Важное
Сентябрянь 24-це чистэ Саратова ёнксонь Петровской райононь Оркина велесэ ютась «Шумбрат» кенярксчи. Те ёнкссонть эрить аволь аламо эрзят ды мокшот. Сынь сравтовсть зярыя районга: Петровской, Ершовской, Энгельсской. Велетнесэ човор эрить эрьва кодат раськеть, секскак аволь эрьва таркасо ванстовсь тиринь келесь, ломантне рузыясть. Ды ялатеке а стувтнить, кодамо сынь раськень.
Паро, улить ютксонок ломанть, кинь седеест пиить-палыть ды мелявтыть келенть, культуранть, койтнень кисэ. Истяттнэнь ютксоль Александр Сергеевич Кузнецов, конадонть пачтятано седе тов.

Неень вастовомась ушодовсь Ине Отечественной войнасо чавовозтнень ледстнемга кеврунгонтень цецянь путомасо. Седе тов весе пурнавкшность Оркинань культурань кудонть ваксс. Тесэ панжозель Александр Сергеевич Кузнецовонь ледстнемга мемориальной лаз. А. С. Кузнецов – РФ-нь велень хозяйствань заслуженной роботник, сон ульнесь Оркинань «Кучугуры» фольклорной ансамблянь ветицякс ды аккомпаниаторокс. Кода пачтясть пурнавозтне, сон весе эрямонзо алтызе велень хозяйствантень ды культурантень. Александр Сергеевич явсь покш мель раськень тевтненень: сон пурнась Эрзянь культурань ды бытэнь информационно-культурной центра, вешнесь ды таштась Оркинань краеведениянь музеев экспонатт; вастневсь эсензэ ёнксонь ды томбалень эрзятнень марто; кирдсь кеме сюлмот лия региононь эрзянь ды мокшонь вейсэндявкстнэнь марто. Кортыть, сонзэ вийсэ аштесь Оркинань весе культурань эрямось. Мелят, 2021 иень октябрянь 19-це чистэ, А. С. Кузнецов тусь юткстонок…Мемориальной лазонь панжомсто лембе валт ёвтасть «Финнэнь-угрань раськетнень Саратовань вейсэндявксось (СОФУН)» правлениянь прявтось П. Ф. Чатуров, Кузнецовонь тейтерезэ Людмила Александровна. Тесэ алкукс пек вечксть те ломаненть, ламонь эзть кирдеве сельведест.

Велень культурань кудонь омбоце этажсо ашти краеведениянь музеесь. Инжетнень туртов экскурсия ветясь Кузнецовонь низэ Александра Николаевна. Ней сон полады мирдензэ тевенть. Ды кодат ансяк экспонатт тесэ арасть! Истят кезэрень ламо ули-парот неят бути ансяк республикань покш музейтнесэ. Мезе парось, ламо экспонаттнэсэ сёрмадозь, кие азорось, кие ды кодамо иестэ максызе ванстомс музеев. Тесэ ули токарной станок, крахмалонь теемань инструмент (тёрка марто), ламо пряхат, утюгт, эрьва кодат кринкат, 1914 иень горобия ды ламо мезе лия, весе сынст мельспаро ванкшномс!
«Шумбрат» покшчись панжовсь раськень штатолонь кирвазтемасо. Сонзэ кирвазтизе Нина Лаврентьевна Шнякина. Авась умок морси «Кучугуры» ансамблясонть, соды, вансты ды пачти лиятненень минек койтнеде-кирдатнеде. Сонензэ 82 иеть.

Лембе валт ёвтасть покш инжетне: Петровской райононь прявтось А. А. Гречихо, Саратовань Областной Думань депутатось С. Н. Чередников, Мордовиянь Эрзянь ды мокшонь раськень регионъютконь общественной вейсэндявксонь прявтось Ю. А. Мишанин, «Шумбрат» Саратовань Эрзянь ды мокшонь национально-культурной центрань прявтось В. И. Кривошеева.

– Течинь кенярксчись юты областень Правительстванть ды Раськетнень тевтнень коряс федеральной агентстванть лезксэст вельде. Минь покш мельсэ васттано Мордовия Республикань, Пензань ды Саратовань ёнкстнэнь инжетнень. «Шумбрат» кенярксчись Оркинасо ютавтневи 2017 иестэ саезь. Те шканть перть витнезель-петнезель Национальной центрась (культурань кудось), морыцятнень туртов стазь од оршамопельть. Ды тагояк ули меленек ледстямс А. С. Кузнецовонь. Кемтяно, сонзэ тевезэ поладови. Сюкпря весенень, кить анокстызь те покшчинть, – кортась Петровской райононь прявтось А. А. Гречихо.

МР-нь Эрзянь ды мокшонь раськень регионъютконь общественной вейсэндявксонть пельде Благодарностьсэ казевсть сетне, кить явить мель тиринь культурань ванстомантень.

Сынст ютксо Мария Ивановна МИГАЧЁВА пингензэ перть эри Оркинасо. Школанть прядомадо мейле тонавтнесь зооветеринарной техникумсо. Зярс ульнесь колхоз, ламо иеть роботась зоотехникекс. Мейле важодсь клубонь прявтокс, социальной роботникекс. Сон 22 иеть морси Оркинань «Кучугуры» народной ансамблясо. Вана мезе авась ёвтнесь тенек веледензэ.

– Тедеде Оркинась тешкстынзе 310 иензэ. Кодат ансяк кезэрень легендат арасть минек веледенть! Сонзэ вакссо эрясть розбойникть. Мекс Оркина мерить? Кортыть, Орька атя сась тей эрямо Пенза ёндо, сайсь модат ды кадовсь теске. Веленть лемдясть Рождественскоекс, истя жо минек веленть лия велень эрицятне лемдить «Кучугурт». Рождество Христово церькованок стявтозь 1844 иестэ, сон умонь. Советэнь шкатнестэ тосо ульнесь склад. Мейле потмозо витнезель-петнезель одс ды панжовсь. Ней кадовсь теемс колокольня. Икеле велесэнек ульнесть ламо эрицят, малав сисем тёжат. Ней кадовсть, паряк, 400. Весе тукшныть паро эрямонь вешнеме, тесэ важодемс а косо. Ули вейксэ иень школанок, эйдень кужо. Пек паро культурань од кудонок, теке дворец. «Кучугуры» ансамблянтень, косо мон морсян, 25 иеть. Икелень составстонть кадовинек кавтонек. Эштё ули «Лисьмине» ансамблянок. Эрьва покшчисэ культурань кудосо морсетяно. Эрзянь кенярксчи эрси иезэнзэ весть. Кода минь сонзэ учотано! Вана течияк, зяро инжеть пуромсть, ломантне састь семиянек, натой ошсто састь. Мельспаро тенек, – кортась Мария Ивановна.

А вана Нина Васильевна Снегирева чачсь Мордовиянь Ицялбуень Селищасо. Тонавтнесь Орданьбуень медучилищасо. Прядызе 1990 иестэ, лиссь тей мирденень. Мирдензэ ундоксонзо Селищань. Нина Васильевна 30 иеть эри Саратова ёнксонь Советской посёлкасо, важоди процедурной медсестракс. Истямо кенярксчисэ сон васенцеде. Валонзо коряс, мельспаро неемс эсь раськень ломанть, марямс тиринь кель, кунсоломс эрзянь морот. Мордовиясо эрить авазо, сазоронзо-ялаксонзо, ансяк пачколи тей аволь сеедьстэ. Видькстась, покш мелезэ самс эрямо тиринь ёнксов.

«Шумбрат» кенярксчисэнть важодсть декоративно-прикладной творчествань, ярсамопелень выставкат, эйкакштнень ды од ломантнень туртов ютасть морамонь, киштемань, викшнемань мастер-класст.

Ушодовсь мельстуиця концертэсь. Васняяк сцена лангс лиснесь «Мерема» этнографической фольклорной студиясь, седе тов – Артём Мамаев, лембестэ вастозельть Рузаевкань «Тяштеня» фольклорной ансамблясь, Оркинань «Кучугуры» ды «Лисьмине» коллективтне. Истя жо сцена лангсо ульнесть Саратова ёнксонь Советской, Хвалынской, Ершовской ды лия райононь артисттнэ, Пензань областень инжетне. Оркинань ломантне мерсть: «Тынь казиде тенек алкуксонь кенярксчи!».

Татьяна Маторкина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».