Неть читнестэ Республикань Культурань кудосо ютавтовсь торжественной промкс, конась алтавсь Раськеютконь медицинской сестрань кенярксчинтень. Мордовиянь сехте покш залонтень пурнавкшность те тевенть топавтыцятне республикань весе районтнэстэ, Саранск ошонь весе больницятнестэ.

МР-нь Прявтонть пельде поздоровонь ёвтамо сыненст сакшнось МР-нь Правительствань Председателень полавтыцясь Галина Лотванова. Сон ёвтась седейшкавань поздоровт весе пурнавозтненень ды медицинасо сеть важодицятненень, кить эрьва чистэ, эрьва чассто ды кенярксчистэсткак топавтыть эсь профессиональной долгост, максыть седейшкавань лезкс сэредицятненень.

– Здравоохранениянь отраслянть стака неемс тынтеменк, мельвановикс медицинской сестрат! – мерсь Галина Алексеевна. – Вейкеяк больниця, вейкеяк клиника эли ковидэнь госпиталь тынтеменк а важодеви, а топавтовить тосо уликс ламо тевтне. Лавтовонк лангс путозь покш канст, ансяк тынь, сиземанк лангс апак вано, свал аноктадо максомс лембенк. Эсенк оймавтыця валсонк лецятадо сэредицятнень.

Сон тешкстась, неень шкане республикань медицинской организациятнесэ важодить малав 7 тёжат средней медицинской образования марто специалистт. Кавто иеде ламо шкань перть масторлангонь эрицятне майсить коронавирусонь ормадонть. Паро, ней аламодо энгамсь те ормась. Ламот медицинасо важодицятне сэредицятнень лецямсто, сынст эрямост идемстэ, сынськак аволь весть сэредсть те апаро ормасонть. Ансяк стакачитнень лангс апак вано, сынь весе содамочист, виест макссть ды нейгак максыть эрямотнень идемантень, шумбрачинь каземантень.

Кода мерсь Галина Лотванова, эпидемиянь сехте стака шкастонть Мордовиясо панжозельть кемголмово ковидэнь госпитальть, косо витсть шумбрачист 2780 сэредицят.

Неень шкане те ормасонть сэредицятне шумбрачист витить ансяк кавто ковидэнь госпитальтнесэ, косо путозь стационарной отделениятнес 270 ломанть, кить сэредить коронавирусонь ормасонть.

Галина Алексеевнань валонзо коряс, неень шкане те ормасонть сэредицятнень киртямосо покш путовксост медицинасо важодицятнень. Те тевенть витемга ламо тейсть медицинской сестратне.

Неть кавто меельце иетнестэ минь эсенек сельмсэ рединек, кода стака ульнесь медиктненень. Сынь прясто пильгс оршазельть ванстомань оршамопельсэ. Эзизь кайсе сынст кизэнь пси читнестэяк, зярдо лангаст чудсь ливезь, зярдо чамаваст лиснесть путкотевкст, ансяк весементь цидярдызь…

Нать, а стяко сынст тевест течи лемдить алкуксонь героизмакс ды, сюкпрянь валтнэнь ёвтазь, сюконить тенст карксамос.

Паронь арсемань валтнэнь ёвтамсто Галина Алексеевна мерсь тенст ванстомс аволь ансяк ормалгадозтнень, истя жо эсест прясткак.

Медицинасо важодицятненень те чистэнть ламо лембе валт ёвтась Мордовия Республикань Государственной Собраниянь Председателень полавтыцясь, Социальной политикань коряс комитетэнь прявтось Наталья Долматова.

Покш питне медицинской сестрань тевентень путсь МР-нь Здравоохранениянь министрась Олег Маркин:

– Тынк важодемась пек стака, кода кедьвийсэ, истя психологиянь коряскак. Ансяк тень лангс апак вано, седейшкава топавттадо эсь профессиянь долгонть. Тынь свал кадовтадо седеймарицякс, мелявтыцякс, весенень паронь арсицякс. Покш сюкпря те а шожда тевенть кочкамонзо, ормалгадозтненень седей лембенк явоманзо кисэ, – мерсь Олег Валентинович.

Кода свал эрси профессиянь кенярксчитнестэ, сехте партнэнень максозь государственной казнеть.

МР-нь Прявтонть Указонзо коряс «За самоотверженный труд» отличиянь знаксо казезь Республиканской инфекционной клинической больницянь процедурной кабинетэнь медсестрась Елена Орлова ды С. В. Катков лемсэ республиканской клинической больницянь палатной медсестрась Вера Ушмаева.

«Заслуженный работник здравоохранения Республики Мордовия» почётонь лемесь максозь Рузаевкань центральной райбольницянь чачтомань отделениянь старшей акушеркантень Татьяна Ашуркованень ды медицинань куроконь лезксэнь максомань станциянь фельдшерэнтень Светлана Тужилкинанень. Истя жо казезь медицинасо ламо лия парсте важодицят.

Меельцекс Мордовской государственной филармониянь артисттнэ невтсть мельстуиця концерт.

 Валентина Юдина