Те иень даволковсто газетань лопатнесэ ловныцятненень пачтинек Ромодановань муниципальной райононь Сахарной завод посёлкань эрицятнень покштояк покш кенярксчидест. Сынст эрямо таркасонть панжовсь од, валдо, неень шкантень ладиця фельдшерэнь-акушерэнь пункт.
Ледстясынек, сон теезель «Здравоохранение» национальной проектэнть лувсо ды «Медико-санитарной васенце лезксэнь максомань системанть виевгавтомань» эсенек региононь проектэнть эрямос совавтоманть вельде, федеральной бюджетэнь средстватнень тевс нолдазь.
Медицинань те учреждениянь фельдшерэнть Евгения Зининань марто кортамсто савсь марямс ламо лембе валт Ромодановань райононь поликлиникань прявт врачонть Алексей Назаровонь лемс.
– Видьстэ ёвтан, фельдшерэнь-акушерэнь пунктонть строямсто, Алексей Леонидович малав эрьва чистэ сакшнось, – ёвтнесь тенек Евгения Егоровна. – Сон седейшкава мелявтсь од зданиянть кепедеманзо коряс.
Аламо шкань ютазь Ромодановань районсо уликс «Европак» ООО-нть ланга сёрмадомсто, тосонь важодицятнень пельде тагояк маринек ламо лембе валт Ромодановань райононь поликлиникань прявт врачонть коряс. Аволь умок саинек мель содамс ды ёвтнемс ловныцятненень, кие сон – Алексей Назаров?
Васень варштавкс лангс, сонзэ эрямо кизэ аламо мейсэ явови лиятнеде. Алкукс жо, те ниленьгемень иесэ цёрась кенерсь пек ламо теемс кода образованиянзо кастомасо, истя ламо ломанень эрямонь идемасо ды масторлангсо сехте питнеенть – шумбрачинть каземасо.
Эрзянь цёранть эйкакш пингезэ ютась Атяшевской райононь Ламбаськесэ. Школанзо парсте прядызе Саранскойсэ, мейле тонавтнесь Н.П. Огарёв лемсэ МГУ-нь медицинской факультетсэ «Лечебное дело» специальностенть коряс.
2006 иестэ саезь ниле иень перть важодсь МР-ва Россиянь МВД-нь медико-санитарной частень госпиталень прявтокс, лецямонь те учреждениясонть улемстэ нилексть якась командировкав Северной Кавказов, топавтсь врачонь тевенть. 2012 иестэ идесь кандидатской диссертация. Сонензэ максозь «Внутренней службань майор» званиясь. Пенсияс лисемадо мейле Алексей Леонидович сайсь мель важодемс республикань районсо. Истя, 2018 иестэ саезь сон кармась Мордовия Республикань «Ромодановская поликлиника» ГБУЗ-нь прявт врачокс.
Ламо од ды лезэв ушодкст те поликлиникасонть теевить од прявтонть самонзо марто. Юткстост сехте эрявиксэсь – райононь эрицятненень медицинань лезксэнть паролгавтомась.
– Минек васень тевесь – парсте содамс, кода ладяви важодемась велетнесэ ды райононь куншкакуросо, – ёвтни Алексей Леонидович. – Медицинань лезксэнь максомась, эряви меремс, те, васняяк, аволь седе курок сонзэ топавтомась – парсте теемась. Эсенек поликлиниканть важодемадо кортамсто тешкстан, неень шкань технологиятнень тевс нолдазь, учомань шканть минь киртинек колмоксть. Истя жо шождалгавтынек куш кодамо специалистэнтень ормалгадозтнень сёрмадоманть, кавто тёжас келейгавтынек шумбрачинь ванкшнома лувонть.
Алексей Назаровонь вановтонзо коряс, велень медицинась течи максовиця услугатнень коряс илязо явово ошонсенть эйстэ.
COVID-19 ормась совавтсь полавтомат медиктнень эрямозост ды важодема лувозост. Чарькодеви, пандемиянь шкастонть ков седе ламо сэредицят кармасть само кода ошонь, истя райононь поликлиникатнес. Покш сталмось прась васенце звенань специалисттнэнь – врачтнень ды медсестратнень лангс. Сыненст сави ванкшномс эрицятнень шумбрачист поликлиникасо, ардтнемс ормалгадозтненень кудова ды лецямс коронавирусонь симптом мартотнень.
Алексей Леонидовичень валонзо коряс, педиця орматнень профилактикась ашти васенце таркасо. Те тевенть витемга поликлиникав сыцятнень сон кармавтсь явомс ормалгадозтнень шумбратнень эйстэ. Тень кувалма нурька шкас ормалгадозтне неявиксстэ киртявсть.
– Лован, те опытэнть эряви саемс республикань весе поликлиникатненень, – корты Алексей Назаров.
Тешкстасынек, организаторской ды профессиональной ёрокчись Алексей Леонидовичнень лезды ков седе паролгавтомс медицинань лезксэнть Ромоданова ёнксонь эрицятненень. Сон, кода здравоохранениянь организатор, парсте содасы административно-управленческой лувонть. Кадратнень марто важодемась аволь шождатнестэ. Бути маштат ломань марто кель-валонь муеме, мартот важодицятнень профессиянь квалификацияст кастомо, тонавтомо, ловт, тон таркасот.
Сон свал ванкшны ды теи анализ эсест поликлиникань медицинань ды экономикань невтевкстнэнень. Эдь те корты эрьва ломаненть вейсэнь тевс путовкстонзо.
Кода неень шкантень ладиця прявт, Алексей Назаров парсте содасынзе, мезе эряви эрицятненень лецямонь-профилактикань лезксэнть максомсто, эрьва кодат икеле молиця программатнень тевс нолдамсто. Эдь сынь анокстазь медицинань лезксэнть паролгавтомс ды весенень вейкетьстэ услугатнень максомс. Эсь важодемасонзо сон свал бажи совавтомс эрямос неень шкантень ладиця лецямо лувонть, конань вельде седе куроксто лангс ливтеви куш кодамо ормась. Текенень поладсынек, Алексей Леонидович вети общественной роботат.
Аволь умок сон ушодсь невтеме ёрокчинзэ «Моя Мордовия» республикань кадровой проектсэнть, конась тевс нолдави «Россия – страна возможностей» АНО-нть лезксэнзэ вельде, максынзе документэнзэ «Единая Россия» партиянь Мордовской региональной отделенияв икелепелев вайгелень максомасо виензэ варчамга.
Алексей Назаров свал касты содамочинзэ. Кода вере ледстинек, сонзэ ули медицинской наукань кандидатонь учёной степенезэ. Неть читнестэ ушоды тонавтнеме Российской Федерациянь Президентэнть юрсо теезь Народной хозяйствань ды Государственной службань Россиянь академиясо, косо ушодовсь «Социальной сферасо управлениянь неень шкань технологиятне» дополнительной программатнень вельде профессиональной переподготовканть тевс нолдамось.
Кемеви, тосо пурназь содамочитне кандыть лезэ кода эстензэ, истя жо республикантень ды весе масторонтень.
Валентина Юдина
Фототне саезь семиянь архивстэ