Коронавирусто вакцинациясь эрязасто моли Мордовиянь оштнева ды районтнэва. Прививкань путомо эрицятнень ней учить аволь ансяк поликлиникатнесэ, истя жо велетнень медпункттнэсэ аравтозь графикень коряс.
Отяжелень центральной районной больницянь мобильной ФАП-сь, конась явозель медучреждениянтень мелят «Здравоохранение» национальной проектэнть лувсо, чинь-чоп чары лангсо. Сонзэ ветницясь Сергей Михайлович Хомяков эрьва чистэ арды сядодо ламо вайгельбеть райононь велетнева вейсэ дежуриця участковой терапевтэнть ды медсестранть марто. Аволь умок минь вастынек те мобильной ФАП-нть, арсетядо, косто? Паксясто.
Ламбаське велесэ вакцинациянть ютавтома шкасто медиктненень пачтязель, келя, омбоце компонентэнь путомо кодаяк а савить «Восток» МАПО-нь кавто важодицят. Сынст те шкане пек пси шка – нуить Трокскужонь паксятнесэ. Ансяк ФАП -сь а стяко кандтни «мобильной» лементь, ПАЗикентень паксянь китнева ардомась кодаткак мелявкст а канды ды медикень командась, конанть прявтсоль те чистэнть терапевтэсь Галина Александровна Живаева ды медсестрась Лариса Валентиновна Косолапова, сеске сась ваксозост.
КАМАЗ-нь ветницясь Александр Васильевич Паркин ды комбайнерось Александр Михайлович Киринкин колмо недлядо икеле уш путызь «Спутникень» васенце компонентэнть. Кодаткак шумбрачинь лавшомгадомат, температурань касомат сынст арасельть. Нейгак эрязасто, мельга-мельцек, шкань апак сацтне (эдь эйсэст учить машинатне ды комбайнатне) састь мобильной пунктонтень. Тесэ врачось васняяк онкстынзе температураст, сатурацияст, кевкстнинзе ежомарямодост ды медсестрась путызе вакцинань омбоце компонентэнть. Кодаткак мелявкст прививкадонть мейле сынст арасельть ды, колоньгеменьшка минутань перть оймсезь, важодицятне поладызь роботаст. Медиктне жо сыргасть Низовка велев, тосояк эйсэст учость эрицятне.
Марина Девятова