Аволь умок Мордовия Республикань Пресс-центрасо ютавтовсь вастовома, конась алтавсь коронавирусонь сэредицятненень ды те ормадонть ванстомань тевтненень. Журналисттнэнь кевкстемаст лангс каршо валт макссть: МР-нь Правительствань Председателень полавтыцясь Галина Лотванова, МР-нь здравоохранениянь министрань тевтнень топавтыцясь Олег Маркин, МР-нь информатизациянь ды связень министрась Игорь Вольфсон, МР-ва Главной санитарной врачось Татьяна Харитонова, МР-со трудонь коряс главной государственной инспекторось Денис Фролов, МР-нь экономикань, торговлянь ды предпринимательствань министрань полавтыцясь Сергей Агишев.
Вастовомасонть таго пштистэ кепедезель вакцинань путомадо кевкстемась. Неень шкане Мордовиясо прививкат путовтсть 330 тёжадо ламо ломанть. Кода мерсь МР-нь Здравоохранениянь министрань тевтнень топавтыцясь Олег Маркин, эряви 517 тёжат. Олег Валентинович пачтясь седе, кода стака савкшны неень шкане медицинасо важодицятненень. Минек республикасо 4,5 тёжат медиктнень ютксто эрьва нилецесь сэредсь те ормасонть эли ней сэреди.
Пресс-конференциясонть башка мель явовсь QR-кодонтень, конань республикасо васенцеде тевс ушодсть нолдамо октябрянь 15-це чистэнть саезь. Сынь эрявить весенень, кить молить общественной питаниянь, спортонь, культурань ды лия заведениятнес.
Вастовомантень пурнавозтнень пачтямост коряс, вакцинациясь (кода минек масторсо, истя республикасо) ютавтови аволь истя, кода бу эряволь коллективной иммунитетэнть теевемга. Теде башка, сёксень-телень ковтнестэ уш пелема ормалгадомс сеске кавто ормасо: гриппсэ ды ковидсэ.
МР-со Главной государственной санитарной врачось Татьяна Харитонова республикасо коронавирусонь ормасо сэредицятнень коряс эпидемиологиянь лувонть лемдизе пек стакакс кода сыретнень, истя од ломантнень ютксо. Тень ловозь, сон кемекстась постановления, косо кортави эпидемиологиянь невтевкстнэнь коряс башка группань эрицятнень ютксто профилактикань прививкань теемадо. Истя, ковидтэ обязательной вакцинась эряви теемс микшнемань-рамамонь, мазычинь салононь, банянь, саунань, физкультурно-оздоровительной центрань, фитнес-клубонь, бассейнань, банконь, МФЦ-нь, транспортонь, образованиянь, здравоохранениянь, правань ванстыця органонь, соцзащитань, эйдень центрань ды ламо лия учреждениятнесэ важодицятненень. Нурькинестэ, весе сетненень, кинь важодемаст сюлмавозь ламо ломань марто. Тешкстазель, неень шкане Мордовиясо улить весе условиятне, штобу путовтомс прививкат ды теньсэ ванстомс эсь ды малавикстнэнь шумбрачист.
Кудосо тонавтнемась – аволь каникулат…
Вастовомасонть мольсь кортамо республикань школатнесэ тонавтнемадо.
– Дистанционной лувсо кой-кона школатнесэ ушодсть тонавтнеме башка класстнэ ды эйдень кужов якиця башка группатне, – мерсь МР-нь Правительствань Председателень полавтыцясь Галина Лотванова.
Теке шкасто сон тешкстась, дистанционной тонавтнемась – те аволь каникулат! Сеть эйкакштне, конат кармить тонавтнеме кудосо, сыненст истя жо эряви топавтомс ванстомань весе вешематнень. Лиякс меремс, а якама ушова ды образованиянь дополнительной учреждениятнев.
Кармить ваномо пштистэ
Кода вере ледстинек, Мордовиясо ожоковонь 15-це чистэ общественной таркатнес якицятне нолдавить ансяк QR-кодонь эли вакцинациянь ютамодо, эли те ормасонть сэредемадо документэнь невтезь. Седе, кода кармить ванкшномо кодтнэнь, пурнавозтненень пачтясь Информатизациянь ды связень министрась Игорь Вольфсон.
Валонзо коряс, документтнэде башка, общественной таркас сыцятненень эштё мартост улезэ паспорт. Весе неть документтнэ невтевить контролёронтень.
Виде, неень шкане ломантнень талновты истямо кевкстемась, кода куроксто медицинань важодицятне Госуслугань порталс путсызь QR-кодтнэнь, кода вакцинациянь результат. Специалисттнэнь валост коряс, сынь путовить прививкань теемадо мейле ниле чинь ютазь.
Кинень а путови прививкась?
Те кевкстеманть лангс каршо валт ёвтась МР-нь Здравоохранениянь министрань тевтнень топавтыцясь Олег Маркин. Истятнэнь юткс совавтовить од ломантне, кинень арась эштё 18 иеть, пешксесэтне, кинь шкаст 22 недлядо седе аламо, аллергиясо стакасто сэредицятне ды сеть, кить ормалгадсть экшендемань ормасо (ули температураст, козыть, судокстомо тенст). Медицинской комиссиянть коряс сыненст максови справка.
Сеть ломантне, кинень максови олякстома прививкань путомадонть, седеяк пек ванстома прянть, а якама истят таркатнева, косо ламо ломанть, свал кандтнема маска ды истя седе тов.
Виде карми улеме, бути сынст нолдасызь тевест топавтомо кудов.
Важодема таркасто а паневить
Кода мерсь МР-со трудонь Главной государственной инспекторось Дмитрий Фролов, бути ломаненть арась мелезэ путовтомс прививка, сонзэ важодема таркасто панемазо эли зарплатанзо вишкалгавтомазо карми улеме закононь коламокс. Тевень максыцянть ули правазо истямо ломаненть лоткавтомс важодеманзо. А зярс сон а роботы, ярмакт тензэ а пандовить.
Вастовомасонть ламоксть ледстязель истямо ёнксось, бути ломаненть ули прививкань сертификатозо, справказо эли QR-кодозо, ялатеке тензэ эряви якамс маскасо ды топавтомс прянь ванстомань весе вешематнень.
Валентина Юдина