Четверг, марта 28, 2024
Важное

Мордовиянь Прявтось Артём Здунов ожоковонь 28-це чистэ видеосвязенть вельде ютавтсь коронавирусонь инфекциянть профилактикань ды контролень коряс региононь оперативной штабонь промкс. Кортамось мольсь эпидемиологиянь тевтнеде, COVID-19 каршо ливксэнь путомадо, региононь шумбрачинь ванстомань системанть тевдеемадонзо, санитарно-эпидемиологической вешематнень топавтомаст мельга ваномадонть.

Региононь руководителесь тешкстызе, Мордовиясо пек стакат тевтне коронавируссо сэредеманть коряс. "Эрьва чистэ ормалгадыть малав 150 ломанть, те пек ламо республиканть туртов, - тешкстызе Артём Алексеевич. - Президентэсь яволявтсь аволь важодемань читнестэ од ограничениятнеде. Мордовиясо зярыя уш кемекстазь. Лезэ канды маскань режимень топавтомась, общественной таркатнень дезинфекциясь, башка организациятнес QR-кодтнэнь коряс совамось. Башка условият теезь сыре ломантнень ды покш пеке аватнень туртов, сынь важодить дистанционной лувсо. Республикасонть ламо ломанть каявить больницятнес". 

Вице-премьерэсь Галина Лотванова тешкстызе, недлянть перть больницятнес каязь 1388 ломанть. Кислород ало аштить 1600 ламо ломанть, 130 ламо - ИВЛ ало. 

Эпидситуациянть мельсэ кирдезь оперативной штабсонть кемекстазь од тевть:

  1. Келейгавтозь объекттнэнь спискась, конатнес совамонть туртов эряви QR-код. Сынст юткс кандовить 400 кавонзазь метрадо седе покшт микшнемань комплекстнэ.

  2. Эрицятненень, кинень а мереви теемс ливкс, неть объекттнэс понгомс эряви невтемс ливксэнь а путомань коряс справканть эли ПЦР-тестэнть, конань теемадо мейле ютасть 72 часто аволь седе ламо.

  3. Важодемань дистанционной лувонтень ютавтовить сеть ломантне, кить эзть путовто ливкс ды сынст улить хронический ормаст (сахарной диабет, бронхиальной астма, почкань ормат, онкология) ды кить печтясть инфаркт эли инсульт. 

Теде башка, аволь важодемань читнестэ, ожоковонь 30-це чистэнть саезь сундерьковонь 7-це чинть видьс, кемекставить од ограниченият:

  1. Ожоковонь 30-це чистэнть саезь сундерьковонь 7-це чинть видьс тевдеемаст лоткавтсызь ресторантнэ, кафетне, столовойтне, буфеттнэ, бартнэ ды общественной ярсамопелень лия организациятне. Ярсамопеленть мереви миемс ломантнень марто эли пачтямс заказт. 

  2. Ожоковонь 30-це чистэнть саезь сундерьковонь 7-це чинть видьс 60 иеде седе сыретненень эряви аштемс кудосо самоизоляциясо, сыненст мереви пшкадемс медицинань лезкс мельга ливтемс ушов кудонь ракшат, молемс лавкав, истя жо важодемань таркав, бути те эряви. 

Оперштабсонть истя жо путозь тевть:

  1. Общественной транспортсо ломантне аштест вейкест-вейкест эйстэ 1,5 метрадо ве енов. Тень топавтомс ошонь ды межмуниципальной маршруттнэнь коряс ардтниця транспортонь единицатнень ламолгавтоманть вельде. 

  2. Виевгавтомс общественной транспортсо ды ламо ломанень пурнавомань лия таркатнесэ маскань канднемань режимень топавтоманть мельга ванноманть. 

  3. Важодема таркань максыцятне явост важодицятненень коронавирусонь од инфекциянть каршо ливксэнь путомадо мейле оймсемань пандовиця кавто чить. 

  4. Банктнесэ покш очередтнень лангс пеняцямотнень мельсэ кирдезь финансонь кредитэнь организациятненень кармавтозь теемс условият клиенттнэнь аштемаст туртов, виевгавтомс дезинфекциянть, пштистэ ваномс маскань канднемань режименть ды социальной дистанциянь кирдеманть топавтомаст мельга, ванномс икелепелень сермадстомань кевкстеманть. 

  5. Виевгавтомс QR-кодтнэнь коряс объекттнэс нолдамонть мельга ванноманть. 

Мордовиянь Прявтось явсь мель Россиянь Почтасо ды Банктнесэ коммунальной пандоматнень кисэ ломантнень покш очередтнень лангс. 

"Мекс истя лисни? - пшкадсь Артём Здунов Правительствань экономикань блоконтень. - Тыненк эряви важодемс финансонь организациятнень марто. А минь мезе нейтяно? Минь кемекстатано ограниченият сыре ломантнень туртов ды теке шкане кармавтано сынст аштемс очередтнэсэ. Те лисни аволь эрьва чи, ансяк ковозонзо весть лисни. Мон сеедьстэ ванан сеттнень, ломантне пеняцить. Обед самс ломантнеде ламо, обедтэ мейле - кияк арась. Мекс а явомс ломантнень частнэнь коряс? Эли евтнемс ломантненень пандомань лия енкстнэде? Монь ацирьгавты Россиянь Почтань региононь филиалонть важодемась. Монень сави пачтямс тень коряс центральной аппаратонтень - те уш аволь васенце мурнема. Ладинк важодеманть! Ловинк вальминетнень ды специалисттнэнь ламочист. Тов якить сыре ломанть - лиятне пандыть телефонтнэстэ. Ялатеке аволь весе ютыть дистанционной пандомантень. Тонадодо важодеме тень марто. Сы ковстонть истят стакачить иляст уле!"

Вице-премьерэнтень Наталья Таркаеванень кармавтозь саемс те кевкстеманть башка ванновт алов. 

Мордовиянь Прявтось истя жо явсь мель экономикань башка отраслятненень региононь лезксэнь явоманть лангс. Мордовия Республикань Экономикань, торговлянь ды предпринимательствань министерстванть пачтямонзо коряс, ожоковонь 26-це чистэ кемекстазь мель «Антикризисный» льготань микрозаймонть кемекстамодонзо. Микрозаймонть покшолмазо - 2 млн целковойть. Процентэнь ставкась карми 1% иезэнзэ, кемекстави 6 ковтнес пандомань коряс рассрочкась. Яволявтоматнень марто мереви пшкадемс МР-нь Предпринимательствань лездамонь фондонтень. 

Теде башка, кемекстазь мель лездамс ушодыця предпринимательтненень ды совавтомс «Легкий старт» ды «Я сам» од продукт, сынст вельде залогтомо ды поручительствавтомо явови заем 200 тежат целковоень покшолмасо. Ставкась валгстозь 3,75%.

Оперативной штабсонть тешкстызь коронавирусонь каршо ливксэнь путомань коряс важодемань эрявиксчинть. Ливксэнь путомань кабинеттнэ поладсызь тевдеемаст аволь важодемань читнестэяк, а кармить важодеме ансяк ожоковонь 31-це ды сундерьковонь 7-це читнестэ. 

Оперштабсонть истя жо ваннозь эрицятнень энялдомаст аволь важодемань читнестэ эйдень кужотнесэ дежурной группатнень теемадост: МР-нь Образованиянь министерствантень ожоковонь 29-це чинть видьс эряви анокстамс мельть-арсемат. 

Саранск ошонь округонь Администрациясь евтась мель каямс автобусонь маршруттнэнь Ключаревской калмазыренть видьс сундерьковонь 6-це чистэнть, Дмитриевской субутастонть. 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».