Мордовиянь Прявтонь тевтнень топавтыцясь Артём Здунов чадыковонь 9-це чистэ ВКС-нть лувсо ютавтсь коронавирусонь инфекциянть профилактикань ды седе тов а нолдамонь коряс региононь оперативной штабонь промкс. Кортавсть эпидемиологиянь тевтне, COVID-19 каршо ливксэнь путомась, региононь шумбрачинь ванстомань системанть тевдеемась, санитарно-эпидемиологиянь вешематнень топавтоманть мельга ванномась.

Мордовиянь Прявтонь тевтнень топавтыцясь тешкстызе: ковонь перть республикасонть коронавируссо сэредицятнень невтевкстнэ аштить вейке уровнясо: чинь-вень перть ормалгадыть 36-38 ломанть. Ковидэнь стационартнэсэ аштить малав 600 ломанть, кудосо ОРВИ-нть ды пневмониянь шожда форманть эйстэ лецявить 1300 ломанть.

Поладови эрицятненень коронавирусонь од инфекциянть каршо ливксэнь путомась. Региононтень пачтязь вакцинань малав 100 тёжат комплектт. «Течинь чине ливксэнь путомась - COVID-19 эйстэ прянь ванстомань сехте лезэв ёнксось, сон лезды а нолдамс орманть седе тов, - мерсь Артём Здунов. – Пачтямотнень покшолматнень кастоманть вельде чинь-венть перть путовить 2500 ливкст. Неть темпатнень эряви кастомс седе тов».

Весе специалисттнэ прыть вемельс: коллективной иммунитетэнть саемс, эпидемиологиянь тевтне куш-кона шкастонть, паряк, полавтовить. Секскак ограничениянь тевтне а каявить.

«Лембелгадоманть марто ломантне кармить сеедьстэ яксеме паркс ды скверс, эйкакшонь площадкатнес, ламолгадыть межмуниципальной, дачань маршруттнэсэ ардтницятне, - тешкстызе Мордовиянь Прявтонь тевтнень топавтыцясь. – Тень кувалма общественной транспортсонть ды ламо ломанень пурнавома таркатнесэ эряви ванстомс дезинфекциянь виевгавтозь режименть».