Сонзэ эйсэ кучсть тонавтнеме врачокс, ансяк од тейтересь кочкизе велесэ эрямонть. Кармась важодеме фельдшерэкс. Ды эзь марявояк, кода ливтясть 40 иетне. Ульнесть ламо ризнэмат, талномат, ульнесть кенярксто пешксе читькак. Сынь поладовить нейгак. Зярдо тевесь ойметь коряс, зярдо теят сонзэ весе седейстэ – сестэ весемесь маряви шождасто.
Татьяна Дугушкина важоди Орданьбуень Низовка велесэ фельдшерэнь-акушерэнь пунктонь прявтокс-фельдшерэкс. Сон чачсь теке райононь Чукало велесэ. Пелагея Васильевна ды Андрей Яковлевич Адушкинтнэнь семиясо сон ульнесь кавксоце эйкакшокс. Авазо чачтызе 45 иесэ. Сисем иеть ульнесть тензэ, кода тусь эрямосто вечкевикс тетязо. Вишка Таня свал чарыль перьканзо. Уш эйкакш пингестэ саезь сон ульнесь пек эряза, кенерсь эрьва ков. Школасо тонавтнемась саевсь шождасто, тонавтнесь ансяк ветес. Вечкилинзе тонавтыцятнень, кунсолось ды сайсь превс эрьва валост. Прядынзе кавксо класстнэнь. Лелязо мерсь: «Таня, азе тонавтнеме медучилищав». Сон пурнась-сэрнясь, ютызе медосмотранть ды ськамонзо мольсь документэнзэ кандомо. Приемной комиссиясо вастызе Н.Д. Аксенов педагогось. Варштызе вадря аттестатонзо ды мизолдозь кевкстизе: «Паряк, кочкасак фельдшерэнь специальностенть?»
Ней Татьяна Андреевна пейдезь ледстни теде. Сестэ жо сон васенцеде маризе «фельдшер» валонть, бажась улемс медсестракс. Истя кармась тонавтнеме фельдшерэкс. Н.Д. Аксенов ветясь тенст математика, студентэнь стройотрядсо ульнесь командирэкс, Татьяна – комиссарокс. Медучилищасояк тонавтнемась сонзэ туртов пек мельстуицяль, зяро лия енов а молиця предметт! Тонавтнемань ниле иетне прядовсть ды сонзэ кучизь важодеме фельдшерэкс Низовка велев. Теде икеле медучилищасто макснесть тензэ врачокс тонавтнеме направления. Ансяк сон эзь моле. Низовкасо вастызь пек парсте. Тесэ сонзэ уш содылизь эйкакш шкасто саезь. Кода истя лиссь? Низовкасо школась ульнесь кавксо иень, покш классонь тонавтницятне якасть Чукалов, тосо сынь эрясть Танянь бабанзо кедьсэ.
ФАПсо Татьяна Андреевна ушодсь роботамо Валентина Степановна Дугушкинань пшти вановтонзо ало. Сон ламо мезес тонавтсь од тейтеренть. Васня важодсть кавонест, седе тов мартост ульнесь эйкакшонь медсестра, акушерка. Ней умок уш сон важоди ськамонзо. Эрьва кодамо шкане сонензэ пшкалить медицинань лезкс мельга. Тонадсь роботамо чинек-венек.
– Велень эрицятнень стардыть давления, кинь кузи, кинь жо, мекевлангт, валги, седеень-санонь ормат, экшендемань ормат, ковидтэ мейле ламонь шумбрачись лавшомгадсь. Мон жо пштистэ ванан эрицятнень шумбрачист мельга. Эряви шкастонзо тейнемс прививкат, профосмотрат, диспансеризация ютамс. Весе ютавольть флюорография. Вановтон ало малав 60 эйкакшт, кинень эзть топоде 18 иеть. 2024 иестэ велесэнек эзь чачо вейкеяк эйкакш. Те пек ризнэвти, – корты фельдшерэсь.
Татьяна Андреевна теи-топавты весементь, мезе кармавтыть сэредицятненень врачтне: путни прививкат, уколт, тейни перевязкат. Якси кудова, ков тердить. Весе неть иетнень перть эрсесь эрьва мезе. Фельдшерэсь эзь карма ледстнеме а стувтовиця тевтнень, ансяк мерсь, лиясто ломаненть кенжепеде таргасак, идесак. Теде мейле тонськак аволь сеске сат ежос. Тонавтыцятне вана ветить панжадо урокт, а сонзэ эрьва тердемась теке панжадо урок.
– Сюкпря евтавлинь минек Орданьбуень районной больницянтень. Свал ветян консультация фельдшертнэнь, врачтнень ды участковой терапевтэнть марто, нама, бажан токшемест аволь сеедьстэ, ансяк зярдо эряви лезкс. Сынст превс путомаст пек лездыть. Вана весть ульнесь лавтовонь томбавома. Шкась веть. Гайгстынь приемной покойс, кортась мартон сонсь прявт врачось, сон мерсь ускомс ломаненть сыненст. Молинек тов, эйсэнек уш учость врач ды рентгенолог. Нурька шкас лавтовонть витизь, тейсть снимка. Неень шкане седе шожда, медицинань тевтне ладязь парсте, – евтни Татьяна Дугушкина.
Низовкасо неень ФАПонть стявтызь 2013 иестэ «Комплексное развитие сельских территорий» национальной проектэнть вельде. Кадык сон аволь модульной, ялатеке теезь парсте. Улить зярыя кабинетт: приемной, смотровой, процедурной, эйкакшонь. Тесэ свал ваньксчи, ули эрявикс оборудования. ФАПонть перька азоравась касты цецят, теи мазычи.
– Весе пингем юты тесэ. Пек вечкса роботам, вечксынь ломантнень, – апак покшкавтне корты фельдшерэсь.
Ламо иень перть важодеманть кисэ Татьяна Дугушкина аволь весть казевкшнесь. 2008 иестэ тешкставсь «Лучший по профессии» конкурссо. 2018 иестэ изнясь колмоце тарка «Лучший фельдшер фельдшерско-акушерского пункта» весероссиянь пелькстамосонть. Ансяк сехте пек эждить аванть ломантнень пельде сюкпрянь лембе валтнэ. Сонськак потмованзо кецни, зярдо ломаненть шумбрачизэ витеви, зярдо сон шкастонзо пшкадсь медицинань лезкс мельга. Мезть сепомс, велень эрицятне а капшить молемс больницяв, кирдить сэредьксэст.
Аволь ансяк леци, морсияк!
Татьяна Андреевна, лецямонь тевтнеде башка, пек вечки морсеме. Ледстни, кода сась Низовкав, васенцеде тердизь морамо велень клубов Колхозникень чистэ. Тосо маризь мазый вайгелензэ ды куроксто тердизь морамо «Цековне» фольклорной ансамбляв. Те ульнесь 1984 иестэ, сон морси тосо те шкас. Музыкантень вечкемась, нать, ютась тетянзо пельде. Сон седиль гармошкасо. А вана морсицясь сынст покш семиясто Татьяна ськамонзо. Юткошкастонзо сон вечки ваномо музыкальной пелькстамот, косо ломантне невтить морамонь ерокчист. Татьяна Андреевнань вайгелезэ виев, мазый. Мекс эно те шкас эзизь терде Андрей Малаховонь передачас? «Цековненть» марто сон косо ансяк эзь морсе. Ансамблясь эрьва иестэ ардтни «Шумбрат, Мордовия!» раськень творчествань республикань фестивалев.
– Мельсэнь ашти, сундерьгадозь ютатано роботасто, учить кудонь тевть, пиреть, эйкакшт. Дивсян, кода кенеринек морсеме ды ардтнеме эрьва кодамо кенярксчив? Эно ульнинек одт, виевть! – корты авась.
Семиязо – кеме неже
Татьяна Андреевна ды Иван Алексеевич Дугушкинтнэнь кеме, паро семияст. Сынь чачтсть-кастсть кавто тейтерть. Ульяна важоди англань келень тонавтыцякс, сон семиянзо марто эри Тольяттисэ. Ксения прядызе Н. П. Огарев лемсэ МГУ-нь светотехнической факультетэнть, эри Саранскойсэ. Сынь казсть тетяст-аваст туртов ниле нуцькат: кавто тейтернеть ды кавто церынеть. Вейке нуцькинесь яви покш мель киштематненень. «Кредо» ансамблянзо марто весероссиянь пелькстамосо сайсть Гран-при. «Эйкакштне ды нуцькатне максыть теть ламо вийть. Кода илязат сизе, сынст неемстэ, мартост кортамсто ежот свал паролгады», – мерсь минек героинясь.
Татьяна Андреевна – эрзянь мазый ава. Кши-сал марто сон аволь весть вастсь районсо покш инжеть. Эрьва чи тейни зарядка. Ваны шумбрачинзэ мельга ды максы превс путомат лиятнененьгак. 45 иесэ сон мольсь тонавтнеме машинасо ардтнеме, получась прават ды озась руль экшс. Теде сон икеле эзь арсеяк. Ормалгадозтненень чийнесь ялго, мейле озась велосипедс, седе тов ардтнесь скутерсэ. Шкань ютазь Иван Алексеевич рамась нинзэ туртов од машина. Татьяна Андреевна ардтни састо, ней седеяк куроксто теи тевензэ, бажи свал озавтомс ялго ютыцятнень.
Низовкань эрицятне евтыть седейшкавань сюкпря Татьяна Дугушкинанень. Сонзэ телефонозо а эрси лоткавтозь. Эрьва кодамо кевкстема марто пшкалить тензэ, весень бажи оймавтомс, лездамс валсо ды тевсэ. Кадык весе парось, зяро тейсь лиянень фельдшерэсь, велявты кавтонькирда!
Татьяна Маторкина