Неень шкане кода сыретнень, истя од ломантнень ютксояк ламо кортамот, кода седе видестэ ванстомс прянть коронавирусонь педиця ормадонть.
Течи минек ловныцятненень вакцинанть лезэвчидензэ ёвтни Мордовия Республикань Здравоохранениянь министерствань гериатриянь аволь штатной прявт специалистэсь, «РГЦ»-нь МР-нь ГБУЗ-нь прявт врачось Светлана Рафиковна Смакаева:
– Минек республикасо, кода Россиянь келескак, ковидэнь орманть коряс тевтне пек стакат. Эрьва чистэ ламолгадыть коронавирусной инфекциясо сэредицятне. Сындест республикасонть кармасть улеме 90 седе ламо. Ормась вейке ломаньстэ омбоцес юты пек куроксто. Тенень тувталтнэ: эрицятнень ёндо санитарно-эпидемиологиянь вешематнень атопавтомась, экшендемань орматнень самонь шкась, алкине вейсэнь иммунитетэсь. Пек седе ламолгадсть сеть сэредицятне, кинень 65 иеде седе ламо. Кода свал эрси, неть ломантнень ормась юты пек стакасто. Текенень поладсынек, сынст сеедьстэ эрсить эштё ламо лия ормаст. Масторлангсо COVID-19 ормадонть кулыцятнестэ 90 % истят сэредицятне. Сеедьстэ эрси, сыре ломантнень те ормась юты салавине, прянь апак невте. Редяви ансяк сестэ, кода стакалгады ёжось.
Кода невтить ванкшноматне, сеть сыре ломантне, кить путовтыть шкастонзо прививкат, куш ормалгадыть коронавируссо, ялатеке ормась юты ков седе шождасто. Тень ловозь, весе масторлангсо вакцинациянть ютавтомсто сыре ломантне васень таркасот.
Ули мелем тешкстамс, сыре ломантне ков седе шождасто марить пряст прививканть теемадо мейле.
Эрьва ломанентень мереви теемс куш кодамо вакцина, конась кемекстазь РФ-нь территориясо, ды мереви сонзэ путомс сыре ломантненень.
Пек ламо иетне, гериатрической синдромось ды уликс ламо орматне а теить пирявкс вакцинациянтень. Сон тунь а стакалгавты икелень орматнень. Вакцинациядонть икеле башка анокстамо а эряви. Мереви сонзэ путомс сахарной диабетэнть, тевелявонь хронической орматнень пингстэяк.
Ормаменькстнэнь лангс аллергиятне истя жо а лоткавтыть вакцинациянть. А мереви сынст путомс ансяк сестэ, зярдо ломаненть стакасто юты аллергиянь ормазо. Сеть, кить сэредсть COVID-19 ормасонть, вакцинась путови кото ковонь ютазь шумбрачист витемадо мейле.
Теке марто пачтятано: вакцинадонть мейлеяк прянть эряви ванстомс (маскат ды социальной дистанция кирдема). Истя жо путовтома прививкат гриппте ды пневмококковой инфекциядо.
Тееде прививкат коронавирусной инфекциядо – ванстынк эсенк прянк ды малавиксэнк!
Анокстызе Валентина Юдина