Пятница, марта 29, 2024
Важное

Весе содатано, хоккейсэ налксить конька лангсо. Ансяк  икелень шкане а весень ульнесть ярмакост рамамас те питней ды а свал улиця товаронть, ды оштнесэ-велетнесэ эйкакштнеяк-покштнеяк сеедьстэ налксесть понань кемсэ. Отяжелень районсо мелят арсесть одов велявтомс те коенть, ледстямс вишка пингень налксематнень, эдь ревень понасто лембе кемтне нейгак вечкевикс карсемапельть эрзянь велетнесэ ды сынь улить эрьвань кудосо. Истя чачсь «Роштовань понань кем» хоккеень коряс турнирэсь, конасонть эйкакштне ды покш ломантне налксить ревень понасто кевердезь лембе кемсэ.

 

Январень 14-це чистэ те турнирэсь омбоцеде ютавтозель Кулязбуесэ. Сонзэ арсекшнизь ютавтомс кода мелят, Роштовань чистэ, ансяк виев якшамотне эзть максо теемс те тевенть, ды организатортнэ полавтызь турнирэнь ютавтома чинть. Меремга, ютазь субутаськак а пек лембетнестэль, ялатеке кельме вармась эзинзе тандавто участниктнень ды Кулязбуень  хоккеень кортонть лангс лисекшнесть теке велень «К700» (ПСШ № 2) од ломанень  командась,  «ЯНСКАТ» (сон лемдезь налксицятнень фамилияст васенце букванть коряс) тейтерькань командась ды Кулязбуе велень ветерантнэ. Кода тенек ёвтнесь Отяжелень ДЮСШ-нь тренерэсь, пелькстамонть арсицясь Евгений Модин, кубокось изницятненень теезель мелят ды тедеде сон ютась васенце таркань саицятненень. Кубоконть  сталмозо 7 килограммат, ашти мазылгавтозь понань кемстэ, ютксонзо  чувтосто керсезь клюшка, ды сынь  стявтозь чувтонь кирдемка лангсо, конанть  теицязо Отяжелень кедьчелькев цёрась Михаил Трофимов. Кемтнень чачома ёнксось – Сабанцеле велесь. «ЯНСКАТ» командань участницась Анна Артюхина мазылгавтынзе кемтнень эрзянь викшневкссэ ды сёрмадовкссо. Вейке кементь лангс викшнинзе кавто турниртнэнь командатнень лемест, омбоцентень – мелят турнирсэнть изниця команданть. 1-це, 2-це ды 3-це таркатнень саицятненень  казнекс теезельть эрзянь раськень якстере-ашо тюссо вишка кемнеть, керсизь сынст понань кендестэ, мазылгавтызь жо «Рукодельница» Отяжелень лавкань  аватне.

Турнирэсь ютась круговой системанть коряс, эрьва командась вастневсь вейке-вейке марто ды пурназь баллтнэнь коряс кочказельтькак изницятне. Матчтнень счёттнэ ульнесть истят: «К700» – «ЯНСКАТ» (6:5); «Ветераны села Кулясово» – «К700» (11:1); «Ветераны села Кулясово» – «ЯНСКАТ» (9:3). Чемпионокс кармась «Ветераны села Кулясово» командась, конась меляткак икельдинзе лия командатнень. Эйзэнзэ совить Кулязбуень эрицятне ды Отяжелень ошонь поселениянь Советэнь депутаттнэ. Омбоцекс кармасть Кулязбуень цёрынетне, тейтерькатне жо саизь 3-це тарканть. Минь кевкстинек «ЯНСКАТ» командань налксицянть Олеся Тюгашкинань турнирдэнть мелензэ, ды тейтерькась седейшкава ёвтнесь тенек эсь ёжомарямодонзо: «Мон ялган марто уш кемень иеть налксян хоккейсэ ды районсонть минь – тейтерькань вейкине команда. Уш омбоце ие невттяно ёрокчинек те, лиятнень ёнов а молиця, турнирсэнть. Кадык таго эзинек изня, ялатеке самс налксеме хоккейсэ понань кемсэ минь свал анокт. Тедеде прядан 11-це класс ды арсян а кадомс вечкевикс тевем, зярдо карми шкам, карман сакшномо налксеме. Истят турниртнэ кепедить ёжомарямонть, паролгавтыть шумбрачинть, минь тесэ пейдтяно-раксетяно, пижнетяно, эйсэнек седеяк касы ялгаксчись, вейке-вейкень кисэ аштемась. Пароль бу, истят турниртнэ теевельть коекс весе республиканть келес!»

Казнемань торжественной церемониясонть изницятненень максозельть грамотат ды «Рождественский валенок» кубокось. Участниктненень жо явшезельть вишка медальнеть-понань кемнеть. Хоккейсэ весе налксицятне ды кисэст «сэредицятнеяк» мельспаросольть турнирэнть кувалма ды мейле каванязельть пси чайде ды тантей прякинеде. Отяжелень ошонь поселениянь администрациясь, конань прявтсо Александр Серов, ёвты сюкпря спортонь алкуксонь кенярксчинть кисэ Отяжелень ДЮСШ-нь тренерэнтень-тонавтыцянтень Евгений Модиннэнь, «ПСШ № 2» МБОУ-нь директоронтень Елена Душкинанень, физкультурань тонавтыцянтень Галина Канакованень ды эсест поселениянь депутаттнэнень.

Марина Девятова

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».