Те кевкстемась лиссь аволь стяко – ковдо икеле, ноябрянь 18-це чистэ, топодсть 5 иеть, кода Мордовиянть Прявтокс аравтозь Артём Алексеевич Здунов. Сестэ республиканть ульнесь сехте покш долкозо федеральной бюджетэнть икеле ды эзь саво примамс участия ламо программатнесэ, конатнень юрсоль од объекттнэнь теемась ды таштотнень витнемась, ульнесть зярыя лия кардамоткак. Кода молить тевтне ней, сехте прявтось, мезе теезь неть вете иетнень перть? Орданьбуесэ тевтнеде пачтясь райононь прявтось Александр Николаевич Антипов.
Александр Николаевич тешкстызе, неть иетнень перть ветяви эрьва кодат объекттнэнь строямось. 2020 иестэ «Демография» нацпроектэнть юрсо Орданьбуесэ строязь эйдень од кужо 250 таркас, секе иестэнть стадионсонть путозь спортонь площадка ушонь тренажер марто. 2021 иестэ Тургеневасо теезь врачонь модульной амбулатория. Секе иестэнть «Комплексное развитие территорий» программанть коряс Орданьбуесэ строязь «Дельфин» бассейнась, Октябрьской поселкасонть педе-пев витнезель Культурань кудось, Орданьбуесэ Березовая курованть ветязель водопровод. 2022 иестэ неень шкань спортплощадкась стявтозель Тургенева поселкасонть, конантень истя жо пек эрявсь истямо инфраструктура. Орданьбуесэ сестэ жо теезь пек эрявикс объект – ведень ванськавтомань станция. 2023 иестэ педе-пев витнезь Орданьбуень средней школань омбоце корпусось, тедеде прядови эйкакшонь искусствань школанть одкстомтомась.
Ды те эште аволь весе. Шумбрачинь ванстомань линиянть коряс 2020 иестэ ниле велетнесэ стявтозь од ФАПт, тедеде прядовсь Ардатовской РБ-нь поликлиникань педе-пев витнемась.
Полавтовсть эрямо таркатнеяк – Орданьбуе ошось ды Тургенева поселкась. Поселкасонть витнезь ламо этажонь кудотнень перька площадкатне, общественной таркатнень вадрялгавтомань-мазылгавтомань проекттнэнь весероссиянь пелькстамосонть изнямотнень вельде Орданьбуесь кармась неень шкань ды мазый ошокс – 2021 иестэнть витнезь Базаронь площадесь, 2023 иестэнть – Л. Толстоень переулкасо Авиатортнэнь скверэсь ды Ленинской курось, тедеде – ретро-паркось. Теде икеле, 2020 иестэ, одкстомтозель ошонь паркось, кона кармась вечкевикс оймсема таркакс Орданьбуень эрицятнень ды ошонь инжетнень туртов.
Тедеде районось сайсь омбоце тарка республикасонть «Комплексное развитие территорий» программанть лувсо важодеманть коряс. Истя, искусствань школанть одкстомтомадо башка, ярмактне явозь кавто спортплощадкатнень (Ардатовань средней школань омбоце корпусонть вакссо ды Станция Ардатов поселкасо) ды Ардатовань средней школань васенце корпусонть вакссо мини-стадиононть строямс, истя жо ошсонть канализациянь коллекторонть теемс.
Покш важодема ветязь китнень тееманть-витнеманть коряс. 2021 иестэ од ки строязь Малое Кузьмино велесэнть, омбоце иестэнть ацазель од асфальт Суподеевка веленть видьс, мейле вадрясто теезель Кеченьбие (Жабино) веленть видьс кись, конась ютась кавто этапсо. Истя жо кавто этапсо теезель ки Андреевка веленть видьс.
Велень хозяйствась ды промышленностесь
Улить редявикс изнявкст велень хозяйствасояк. 2020 иестэ сюронь урожайностесь ульнесь 22,7 центнерт гектарсто, тедеде – 36 центнерт. 2020 иестэ нолдазь 5065 тежат тоннат сывель, 2025 иестэ – 6100 тежат тоннат.
А берянь невтевкст максы промышленностесь – 2020 иестэ производствань покшолмась ульнесь 1 млрд 100 миллионт, тедеде – 3 млрд 600 млн.
Тешкстама, меельце вете иетнень перть районсонть панжовсть кавто од предприятият – «Виолет» ды «Край земли» ООО-тне.
Туризмась
Васенцеде теплоходтнэнь укшномань туртов маштовиксэкс евтазь Ратор леесь. Те макссь вадря эскелькс туризмань виевгавтомантень – анокстазь туристэнь лезэв маршрутт. Меельце вете иетнень перть одкстомтозь Понань кемень музеесь, пурназь ВМФ-нь музей, конась Равчиресэ вейкине. Тесэ ули мезе невтемс туристтнэнень.
Районсонть течи ламо тееви ломантнень паро эрямост туртов – социальной объекттнэ улевельть неень шкань, общественной таркатне – мазыйть ды парт. Тееви весемесь, штобу эйкакштненень, неень шкань технологиятнень тевс нолдазь, максоволь вадря образования, касоволь ламо эйкакшонь триця семиятнень ламочись – ней эйстэст районсонть 228. Ды демографиянь кевкстемантень Орданьбуесэ, кода целанек республикасонть ды масторсонть, явови башка мель.
Фототне саезь Яндекс интерет-сайтсто.