Кода одкстомсь ды мазылгадсь Кочкурбуесь вете иень перть, неить аволь ансяк тосонь эрицятне, инжетнеяк. Райононь администрациянь прявтось Светлана Николаевна Герасимова теи весементь тиринь енксонзо паролгавтомга. Районось бажи невтемс прянзо эрьва кодамо федеральной проекттсэ, конатне яволявтовить иестэ иес.
Саемга, 2021 иестэ «Обеспечение устойчивого сокращения непригодного для проживания жилищного фонда» проектэнть лувсо строязель 18 квартирань кудо, ламо квартирань лия кудотнень перька вадрялгавтозельть ды мазылгавтозельть таркатне, витнезельть китне-янтнэ, стявтозь эйкакшонь од площадкат, шукшонь туртов урнат, путозь эземть.
2022 иестэ витнезель Кочкурбуень райононь Советской куросо оймсемань паркось, Сурвелесэ теезель модельной библиотека, одкстомтозельть ламо квартирань кудотнень перька таркатне.
2023 иестэ «Переселение граждан из аварийного жилищного фонда» программанть лувсо Кочкурбуень райцентрасо строязель ламо квартирань кудо, одкстомтозель Кочкур велень эйкакшонь искусствань школась, Сурвелесэ теезель оймсемань паркось, тосо жо витнезельть Ине Отечественной войнасо маштовозтненень кеврунгось, одкстомтозельть футболсо налксемань ды эйкакшонь площадкатне.
2024 иестэ одкстомтозель Татарский Умыс велень Культурань кудось, Кочкур велесэ строязель Рождество Христово церьковась, Красномайской поселкасонть теезельть эйкакшонь площадкат.
2025 иенть перть районсонть истя жо ветявсь покш важодема инфроструктурань вадрялгавтоманть коряс ды лия енкстнэсэ. Одкстомтозель Кочкурбуень средней школась, строязь спротонь ды эйкакшонь площадкат, витнезельть Ине Отечественной войнасо маштовозтненень кеврунготне, Вирь Тавласо, Воеводскойсэ ды райцентрасонть одкстомтозельть-вадрялгавтозь общественной таркатне. Воеводское станциясонть «Переселение граждан из аварийного жилого фонда» программанть лувсо ушодовсь кавто квартирань кудотнень строямось. Истямо жо важодема ветяви Красномайский поселкасо.
Покш важодема ветязь китнень тееманть-витнеманть коряс. Вете иень перть Кочкурбуень районось примась участия «Безопасные и качественные дороги» нацпроектэнь «Содействие» проектсэнть. Те шканть перть витнезельть 70 вайгельбень кувалмосо китне.
Истя жо эрьва ие ветявсть коммуникациятнень полавтнемась, эрицятнень вадря ведьсэ топавтомга.
Фототне саезь панжадо интернет-источникстэ.