Покш Игнатбуень муниципальной районсо неень шкане эрить 6500 ломанть, 2012 иестэ прявтокс тосо ладизь эрзянь мазый аванть Татьяна Полозовань. Вана уш 13 иень перть Татьяна Николаевна топавты те а шожда тевенть. Сонзэ талновты весе, мезесь сюлмавозь велень хозяйствань производстванть, культуранть, образованиянть, медицинанть марто. Сехте покш мель сон яви ломантненень, сынст мелявкстнэнень ды вешематнень топавтомантень.
Тиринь райондонть евтнеманзо ушодызе кенярксов кулясто, кода республикась, истя Покш Игнатбуеськак 2025 иестэ тешкстызь юбилеень датаст – 95 иетнень топодемаст. Те шканть перть ульнесть покш полавтомат, пек ламо теезель.
– Кодат од объектт теезельть ютазь иетнестэ? Инеськеть, евтнеде сынст эрявиксчидест ломантнень туртов?
– Спортзал школасо, конась пекстазель а маштовиксчинь коряс, неень шкантень ладиця кортонь теемась, школань главной корпусось (таштонть таркас), ФАП-т, кудотнень перька территориятнень паролгавтомась, райононь Культурань кудонть одкстомтомась, Андреевка велесэ Культурань кудонть витнемась, од кудотнень путомась ды таштотнестэ тов ломантнень ютавтомась. Кодамо мазый оймсема тарка теинек (сквер), модульной библиотека, музей! Аволь ансяк райцентрасо, истя жо велень поселениятнесэяк минь тейтяно эйкакштнень туртов налксемань площадкат, одкстомттано кеврунготнень, витнетяно китнень.
Аштетяно покш мельспаросо минек Президентэнть ушодксонзо вельде национальной проекттнэнь эрямос совавтоманть коряс, пек ламо теинек «Единая Россия» партиянь проекттнэнь вийсэ.
Теде башка, минь витнетяно ды одкстомттано велень хозяйствань объекттнэнь, строятано семиянь фермат, ультяно «Начинающий фермер» ды «Агростартап» программатнесэ.
– Покш Игнатбуень районсо ванстовить покштятнень-бабатнень коест-кирдаст, кодамо мель тесэ явови культурантень?
– Минек районось эрзянь, бажатано ванстомс келенть, минек раськень койтнень-кирдатнень, культуранть. Нать, а стяко минек моданть лангсо ютавтовить «Раськень озкс» ды «Велень озкс» республикань раськень фольклорной кенярксчитне. Ламодояк ламо тенек сыця инжетне тешкстыть те кенярксчинть ютавтомга видестэ тарканть кочкамонзо.
Неень шкане райононь территориясонть улить райононь Культурань кудо, велетнева – культурань кеветее кудот ды клубт. Райононь куншкакуросо – покш ды паро библиотека, истя жо сынь улить 14 велетнесэ, муниципальной музей. Те отраслясонть важодить 59 ломанть. Сынь минек активенек, васенце лездыцянок.
Меельце шкастонть эсенек вийсэ карминек тееме ды невтеме мультфильматкак. Весе неть арсематнень топавтомс лездасть национальной проекттнэ (икеле «Культура», ней – «Семья») ды васняяк МР-нь Прявтонть А.А. Здуновонь ды МР-нь Правительстванть лезксэст вельде.
– Содатано, районсонк покш мель явови Ине Отечественной войнасо маштовозтненень алтазь кеврунготнень витнемантень, а кадтадо мельтеме СВО-нь участниктнень ды сынст семиятнень. Меельце шкастонть зяро кеврунгот одкстомтыде?
– 2012 иестэ саезь минек районсонть малав эзь кадово вейкеяк веле, косо бу аволь уле Ине Отечественной войнань участниктненень кеврунго. Муевсть истят ломанть, изницятнень нуцькаст, кить эсь ярмакост лангс Од Чамза велесэ стявтсть кеврунго.
Течи кодаяк а эрявить стувтомс минек цератнень, кить ванстыть масторонок. Покш Игнатбуесэ маштовозь воинтнэнень памятникенть ваксс минь стявтынек стелла, малазонзо озавтынек 17 пизелчувтот (зняро церат маштовсть) ды мельгаст якатано. Истя жо фермертнэнь ды велень хозяйствань предприятиятнень руководительтнень вийсэ одкстомтынек лия кеврунготненьгак. Те тевенть минь поладсынек республикасонок уликс программатнень вельде.
– Тынь кортакшныде велень туризманть келейгавтомадо, кодат од арсемат улить те кевкстеманть коряс?
– Велень туризманть коряс минь таштынек покш содамочить. Васняяк тенень пек лезды Покш Болдинанть эйстэ маласо улемась, а васоло эйстэнек Нижегородской областень Сеченовской районось, Орозбиесь кевердезь кемензэ марто ды истя седе тов. Ули эсенек наличникень музеенек, «сырнень» сюпавчинек – Старцев Уголось. Нурькинестэ, эрьвась, кие сы тенек инжекс, муи эстензэ вечкевикс тарка эли жо тев. Весень вастсынек паро мельсэ!