Августонь 11-це чистэ МР-нь Госсобраниянь сессиясонть депутаттнэ кирдизь Батыр Эмеевич Эмеевень кандидатуранть, конань республикань Прявтось Артем Здунов евтызе МР-нь Правительствань Председателень таркантень.
Сон ледстизе, Батыр Эмеев сась республикав сонзэ тердеманзо коряс 2022 иенть прядовомсто, кармась МР-нь Правительствань Председателень полавтыцякс. Уш пельие сон топавты региононь Правительствань Председателень тевтнень. Вадря полавтоматнень ютксо, конат лиссть те шканть перть, Мордовиянь Прявтось евтынзе инвестициятнень касоманть, госдолконь киртямонть ды ошонь хозяйствасо вадря полавтоматнень.
Батыр Эмеевень Мордовиянь Правительствасо важодемань малав колмо иетнень перть вадря динамика тешкстави промышленной секторонь весе енкстнэнь коряс. Касыть нолдавиця продукциянь покшолматне, зярыяксть ламолгадсть государственной корпорациятнес пачтямотне. Батыр Эмеев региононь министратнень кабинетэнть пельде ветясь Саранск ошонь округонь тевтееманть. Прявт енксось – китнень строямось ды витнемась. Топавтозь покш важодема «Горэлектротранс» муниципальной предприятиянть важодеманзо ладямонть коряс. 2024 иень майстэ линияс эрьва чистэ лиснесть техникань малав 65 единицат. Неень шкасто – техникань 90 ламо единицат, седе ламотне – МАЗ-нь покш классонь автобустнэ.
Батыр Эмеев евтась сюкпря региононь Прявтонтень ды депутаттнэнень тензэ кемеманть кисэ. Сон тешкстызе, Правительстванть важодемась ладяви сеть енкстнэнь коряс, конатнень яволявтынзе Артем Здунов Госсобраниянтень Кучомасонзо: промышленностенть виевгавтомась, инвестициятнень покшолгавтомась, жилищно-коммунальной хозяйстванть одкстомтомась, эрицятненень базовой вадря услугатнень явомась.
Ней анокстави республиканть вадрялгавтомань-мазылгавтомань программа, Саранскойсэ те важодемась уш ветяви. Тедеде тесэ целанек одкстомтови ушонь валдомтомась – полавтовить 16 тежадо ламо светильникть. Башка мель карми явовомо лифтэнь оборудованиянь полавтомантень, одкстомтови коммунальной техникань паркось. Декабрянь 1-це чинтень арсеви панжомс шукшонь явшемань комплексэнть, седе тов ушодомс тевтнень од полигононь строямонть коряс.
Справкась: Батыр Эмеевич Эмеев чачсь 1984 иестэ Дагестан Республикань Кизилюрт ошсо. Прядызе РФ-нь Раськетнень ялгаксчинь университетэнть «Мировая экономика» ды «Юриспруденция» специальносттнень коряс. 2007–2018-це иетнестэ важодсь РФ-нь Экономической виевгавтомань ды микшнемань министерствань Макроэкономической прогнозированиянь департаментсэ ды промышленной предприятиянь финансонь прявтокс. 2018–2020-це иетнестэ важодсь Дагестан Республикань Промышленностень ды энергетикань министерствасо, истя жо – министракс, Дагестан Республикань Правительствань Председателень васенце полавтыцякс.
Мордовиясо важодема кинть Батыр Эмеев ушодызе 2022 иень декабрясто МР-нь Правительствань Председателень полавтыцякс. Те иень мартсто саезь топавтсь премьер-министрань тевтнень. Батыр Эмеев – ламо эйкакшонь триця семиянь прявт, нинзэ марто кастыть ниле эйкакшт.