Пятница, марта 29, 2024
Важное

Августонь 24-28-це читнестэ Саранскойсэ ютась «Диалог культур» од ломанень Весероссиянь раськеютконь лагерь. Сонзэ ютавтыцякс кармась раськетнень тевтнень коряс Федеральной агентствась. Весемезэ тей сакшность 150 од ломанть. Те Пензань, Ульяновскоень областьстэ, Башкортостансто, Татарстансто, Крымстэ, Тывасто, Новосибирск, Омск ёнкстнэстэ, эсенек Мордовиясто ды Сирийской Арабской Республикасто. Лагересь важодсь «Реализация государственной национальной политики» РФ-нь государственной программанть коряс.

 

Проектэнть вельде муевсть эрьва кодамо раськень превей, ёроков од ломантне, конат явить покш мель творчествантень. Весе неть читнень перть сынст туртов ютась лезэв программа, косо сынь вастневсть эксперттнэнь, культурасо ды бизнессэ важодицятнень марто, теде башка, ульнесть изобразительной ды декоративно-прикладной искусствань коряс мастер-класст. Од ломантне содавтовсть раськень оршамо- ды ярсамопельтнень марто, сынсь ёвтнесть эсь раськень койдест-кирдадост, культурадост, невтсть моро-киштема марто концерт.

Лагеренть панжомо сакшность раськетнень тевтнень коряс Федеральной агентствань прявтонь полавтыцясь С. А. Бедкин, МР-нь Культурань, национальной политикань ды архивень тевень министрась С. Н. Баулина, кона ловнынзе МР-нь Прявтонть А.А. Здуновонь пельде лембе валтнэнь.

– Истямо лагерь важоди колмоце ие. Мезекс сон эряви? Кадык од ломантне содыть, кодамо минек масторось покш, кода ламо эрьва кодат раськеть тесэ эрить. Эрьванть эсензэ культуразо, историязо, коензэ. Ды сынь вейкень-вейкень пельде тонавтнить, саить эстест од содамочить. Мордовиясо парсте ладязь раськеютконь тевтне, тесэ ванстыть эрзянь ды мокшонь раськень культуранть, секскак чачсь меленек ютавтомс лагеренть тесэ, – кортась С. А. Бедкин.

Санди Хаддад сась лагерентень Сирийской Арабской Республикасто (весемезэ тосто састь кемгавтово ломанть). Тейтересь чачсь Одессасо, косо авазо лиссь мирденень сириецнэнь. Кемень иеде икеле тусь эрямо Сирияв. Тосо тонавтнесь РФ-нь посольстванть юрсо школасо, прядсь университет. Ней важоди Сириянь Дамаск ошонь Рузонь культурной центрасо. Тосо сынь ютавтыть ламо эрьва кодат вастовомат кода покштнень, истя жо эйкакштнень туртов. Сеедьстэ сакшныть инжеть Россиясто. Сандинь валонзо коряс, минек мастортнэнь ютксо ялгаксчись седеяк виевгады. Сириянь эрицятне бажить содамс Россиянь культуранть. Ломантне сакшныть центрантень рузонь келень тонавтнеме. Сонсь Санди соды ниле кельть. Тей сась кода участник ды кода кельстэ кельс ютавтыця.

– Весе кортасть, Саранскоесь вишка ды тосо а мезе ваномскак. Те а истя. Миненек пек тусь мельс – ошось мазый, ванькс, ломантне инжень вечкицят, вастымизь лембестэ. Сайнимизь эрьва ков экскурсияв, ульнинек велесэяк. Мельспаро теевемс содавиксэкс тынк культуранк марто, аволь ансяк Россиянь, Мордовияньгак. Ды, нама, ёвтнетяно Сириянь культурань сюпавчитнеде, – пачтясь Санди Хаддад.

Тывань од ломантне невтизь эсь раськень киштемаст, сынь ёвтнесть, кода эрить, кода важодить, кодат од ёнкст тевс нолдыть. Лагерень программась покш ды мельстуиця. Кемтяно, те вастовомась кармась лезэв тевекс минек масторонь од ломантнень туртов.

Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».