Пятница, марта 29, 2024
Важное

Неть читнестэ Кочкуровань райононь «Норов» агрохолдингень актовой залсо ютавтовсь «Память сильнее времени» мероприятия, конась алтавсь райононь поисковой вейсэндявксонтень ды минек шкань геройтненень.

Сон ашти «Поиск» Мордовиянь республиканской патриотической вейсэндявксонь пелькскекс ды кандтни истямо жо лементь.

Вастовомасонть инжекс ульнесть Мордовия Республикань Государственной Собраниянь депутатось, «Норов» агрохолдингень прявтось Александр Поздняков, «Агрофирма «Норов» ООО-нь генеральной директорось Дмитрий Поздняков, «Поиск» Мордовиянь республиканской патриотической вейсэндявксонь прявтось Николай Кручинкин, МР-нь Од ломанень центрань гражданско-патриотической программатнень отделэнь прявтось Наталья Журавлева.
Эряви меремс, райононь поисковой вейсэндявксонтень ютазь иень декабрясто топодсть кеветее иеть. Ды весе неть иетнень перть Кочкуровань райононь поисковой отрядтнэнь вейсэндявксонть прявтсо ашти Людмила Михайловна Силиванова.

– Минек вейсэндявксось пурназель Кочкуровань средней школанть юрсо ды ушодовсь Кирилл Степанович Шубников лемсэ отрядстонть. Покш сюкпря Александр Ильич Поздняковнень, кона сестэ (2006 иесь) ульнесь райононь прявтокс, сон минек ушодксонок кирдинзе ды лездась, – корты Людмила Силиванова.
Кеветее иетнень перть поисковикень школанть ютызь сядодо ламо тейтерькат ды цёрынькат. Отрядсонть сынь мусть ялгат ды тонадсть лездамо вейке-вейкенень.

Вейсэндявксонть юрс совить Сурвелень, Вирь Тавлань, Воеводскоень, Булгаковань, Семилеень, Красномайскоень ды Кочкуровань школатнень тонавтницятне. Вейсэндявксонть ули эсензэ девизэзэ: «Вешнемс ды ледстнемс». Сынст гимнаст – «Каска», конанть сёрмадызе отрядонь боецэсь Ксения Мухина.

Отрядонть пурнавомасто саезь ды течинь чис сонзэ юрс совицятне топавтыть покш робота Кочкуровань райононь од ломанень политикань юрсонть. Ютавтозь 600 ламо мероприятият военно-патриотической ды гражданско-патриотической ёнкссонть. Сехте прявтокс аштить «Бессмертный полк», «Георгиевская ленточка», «ПОСТ № 1», «Свеча памяти», «Письмо солдата», конатнень эзинзе лоткавто кезовоськак, ды сынь ютавтозельть онлайн-форматсо.

Кеветее иетнень перть 22 цёрынькатне ды тейтерькатне ульнесть поисковой 27 экспедициясо. Эсь васенце экспедицияв отрядонь боецтнэ якасть Калужской областев 2007 иень майстэ. Мейле ульнесть Смоленской, Ростовской, Ленинградской областтнесэ.

Седе тов вейсэндявксонь боецтнэнень ды сынст тонавтыцятненень лембе поздоровт ёвтась Мордовия Республикань Государственной Собраниянь депутатось, «Норов» агрохолдингень прявтось Александр Поздняков. Александр Ильич тешкстызе вейсэндявксонь отрядонть эрявиксчинзэ ды казсь од ломантненень поисковикень форма.
Мероприятиянтень истя жо пурназель выставка, косо невтевсть Ине Отечественной войнань тюремань паксятнестэ туезь кедьёнкстнэ.

Анокстызе
Юлия ЕРЕМИНА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».