Пятница, марта 29, 2024
Важное

Алексей Рузанов – «Поиск» патриотической отрядонь боец.

Ламо иень перть ардтни поисковиктнень марто ледстнемань вахтав, косо сынь вешнить Ине Отечественной войнасо чавовозь солдаттнэнь, муить лемест ды калмить. Сон те тевсэнть апак терде, апак кармавто. Эсензэ покш мелензэ коряс. Эрзянь цёрась чачсь Орданьбуень райононь Пиксяси велесэ. Тосо прядсь 9 класст. 10-11-це классо тонавтнесь Отяжелень школасо. Мейле мольсь тонавтнеме Н.П. Огарёв лемсэ МГУ-нь архитектурно-строительной факультетэв. Ней тонавтни 6-це курссо.

– Алексей, мейстэ весемесь ушодовсь, кода понгить поисковиктнень юткс?

– Ледстнян, 5-це классо тонавтнемстэ минек школав сакшнось Сабанцелень поисковой отряд, ютась мужествань урок. Сынь ламо мезде ёвтнесть. Те монь пек токимим. 10-це классо карминь тонавтнеме Отяжелень школасо. Тосо ульнесь «Отечество» патриотической отряд, сон нейгак ули. Вети эйсэнзэ Людмила Анатольевна Федотова, пек вадря ды чевте седей ломанесь. Отрядсонть весе мазый формасо, те седеяк кирвазтизе мелем. Монгак совинь те отрядонтень. Эйкакшпингстэ саезь вечкан ловномо войнадо книгат, ваномо фильмат.

– Зярдо ульнесь васенце вахтат?
– 2014 иестэ, 10-це классонь прядомадо мейле. Кудосто кодаяк эзть нолда. Ардтнинь Калужской областень Сухиничской районов. Васенце вахтась зярдояк а стувтови. Мелезэнь тусь. Эрьва чи сёрмадынь дневникс. Пек паро, минек марто ульнесь МР-нь «Поиск» патриотической объединенииянь прявтось Н.А. Кручинкин. Те алкуксонь ломань. Сонзэ содасызь весе регионтнэсэ. Чарькоди, тонавты, максы превс путомат. Бажинь кунсоломс эрьва валонзо. Ёвтнесь ламо историят, эрямосто саевкст. Васенце вахтасон пейдемань тев лиссь. Мон а содылинь, кода ды мезе. Саинь лембе оршамопельть, кемть, койме, ды… кудосо макссть косыря (покш, эчке пеель). Ялгатне, кода неимизь, кода кармасть ракамо! Эрявсь аволь покш, чова, шожда пеель. Ней уш содан, мезе саемс.

– Кода ютыть вахтатне? Кода вешнетядо ды мукшнотадо чавовозтнень?

– Вахтась моли малав кавто недлят (тундосто саезь сёксес). Ловось эль солы, поисковиктне уш ардыть. Тунда пертьпельксэсь чаво, бастыльть арасть, важодемс паро. Модась начко ды чевте. Кизна пек пси, сеськетне порить, а роботават. Ялатеке ардтнетяно. Сёксня ды тунда сехте паро важодемс. Кой-кить ловонь прамс роботыть. Н.А. Кручинкин свал тонавты роботамс коймесэ. Пштистэ ваномс, редямс весементь. Вирьсэ сеске неят: тесэ окоп ульнесь, тесэ траншея эли сезевемадо мейле воронка. Уш содат, косо-мезе. Сеедьстэ боецтнэ аштить чувтотнень ало, латкинесэ. Ванат – латкине. Бути муят воронка – тосо зярыя солдатт эрсить. Весть мартонок важодсть Ульяновскоень поисковиктне. Сынст вахтась прядовома лангсоль, минь лездынек тенст. Воронкасо муинек 69 солдатт. Кода понгсь аштить, теке ёртнезь. Тосто таргинек ламо медальонт. Воронкась ульнесь ки вакссо паксясо, палмань ютксо, чаво, ровной таркасо. Щупсо тейтерь-поисковик ютась ды муизе воронканть. Муемадо мейле эряви ламо сёрмадомс. Теемс фотографият. Сёрмадат бланкат, мезе теевсь мартонзо, мезде чавовсь: пулядо эли осколкадо. Весть истя састыне важодтяно, понгсть понань кем ды понань носка. Пек парсте ванстовсть. Неть ловажатне ульнесть тейтерьавань, мештесэнзэ муинек медсестрань значок. Кой-кить ламо иеть ардтнить, но аволь сеске муить солдатт. Лиясто эрси истяяк, сы ломанесь васенцеде ды муи медальон марто боец!

Минек тевсэ, васняяк, эряви муемс чавовозь солдатонть. Вадрясто кепедемс. Содамс, кодамо лемезэ. Пачтят архивс, косо кармить вешнеме, кодамо дивизия ульнесь неть таркатнесэ, лемень коряс ваныть, кие те ды костонь. Сядо солдаттнэнь ютксто ансяк вейкенть муеви лемезэ. Сынь сёрмадозь капсуласо, те истямо медальон. Потсонзо записка. Тосо уставонь коряс сёрмадозь информация. Неень шкане эрьва кодат экспертизат, сканированият улить. Сынь лездыть неемс сёрмадозенть. Мейле почесть марто калмамс.

Таргамсто ванат ловажатнень тюсост, покшолмаст лангс. Малав весе ульнесть од ломанть. Весть понгсть цёраломанень ловажат. Чарькодеви-неяви, мештесэнзэ ульнесь венчамонь суркс, чамасонзо – осколкат. Сельведеть натой туить, пек жаль марявить. Кода-бути минек боецтнэ кепедсть самолёт. Документтнэ ванстовсть. Ало, мода потсо, весемесь седе парсте ванстови. Лангсо аштицясь аволь истя.
Модатне эрьва таркасо лият, аволь вейкеть. Ванстовить-арась ловажатне – ашти моданть эйстэ. Сёвоньсэ ванстовить парсте, раужо модасояк (чернозёмсо). Саемга, Ромодановань райононь Чуфаровасо парсте ванстовсть маштовозтне. Пряловажась, кедень, пильгень – кеметь, сынь ванстовить. Вахтасо свал вакссонок содыця-чарькодиця ломанть.


– Кодамо ёнксов тон ардтнить вахтав?
– Калужской областев, тосо тюрсь минек Мордовиянь 326-це дивизиясь. Ули Зайцева гора тарка, тосо покш тюремат ульнесть. Те таркась виев. Эрьва ие тосто поисковиктне мукшныть солдаттнэнь. Колмоксть ульнинь Ростов ёнксонь Вёшенская станицасо ды Тверень, Новгородонь ёнкстнэсэ. Минек од ломантне ардтнить Крымень Аджимушкаень каменоломняв. Тосо кевть, стака важодемс.

– Алексей, тон солдатт муить-кепедить?
– Васенцеде муинь 2017 иестэ Зайцева горасо. Чуван-чуван. Каска понгсь. Мейле прянь пелькст. Рунгонь лия ловажатне аштесть мекс-бути башка ды аволь парсте ванстовсть. Тедеде августсто таго ульнинек Зайцева гора таркасонть. Кепединек кото боецт ды кавто доборт (те зярдо муевить аволь весе ловажатне, саемга, кедень эли пильгень ловажа). Вейке воронкасольть. Муинь котат, ёртозь ловажат, арсян, тува ютасть чернокопательть. Сеедьстэ истя понгони. Ловажатне керязь коймесэ. Те аволь ломанть, валт а муят, кода сынст лемдемс. Паряк, медальон мартост ульнесь? Капсулатне аволь кеметь, сеске каладыть коштонть ды валдонть эйстэ.

– Сакшныть-арась од ломантне поисковикень отрядс?

– Меельце шкане од ломантне а пек бажить самс поисковикень отрядс. Чарькодеви, велетне чамить, школатне пекставить. Ды аволь эрьва ломанесь анок сокарямс мода потсо, вешнемс. Николай Андреевич ёвтни, икеле малав кодгемень ломанть пурнавильть вахтав! Ней вахтатне ютыть Весероссиянь проект вельде. Эрсить поисковикень слётт, историянь, вооружениянь, эксгумациянь коряс. Казнетне парт: палаткат, металлоискательть. Лезкс государстванть пельде ули. Минь Сергей Цыганов марто 2018 иестэ изнинек грант. МР-нь Од ломанень центрасо панжинек военно-поисковой музей. Лемезэ «Музей двух фронтов». Тосо экспонаттнэнь мереви токшемс кедьсэ. Сергей марто минь вейке велень. Сон мондень мейле ушодсь поисковой тевсэ важодеме, ней теевсь алкуксонь лидерэкс.

Сергей Новиков ламо иень перть поисковой движениясо. Сонзэ ули семиязо, эйкакшонзо. Ялатеке отпусксто ардтни вахтав. Те паро невтевкс лиятненень. Тосо кода-бути оймсеват эрямонь стакачитнеде, ков-бути чиемадонть. Ды кадык важодят, ялатеке улить вийть, ули паро ёжо. Тосто сат лия ёжосо. Вахтадо мейле лиякс ванат эрямонть лангс. Тосо арсят ды эсеть туртов максат кевкстемат: «Кода минек покштятне тюрсть?», «Кода цидярдсть?», «Кода сасасть изнямонть?»...

Васенце вахтасон ледстнян. Вейке бабинень пиресэ калмазель боец. Сон ёвтнесь тенек, кода вишкапингстэ сынст пиресэ груша ало калмасть солдат. Мирдензэ марто сынь уш сыреть, атясь сокор. Мерить, кулотано иень-кавтонь ютазь, кепединк. Тешкст кодаткак арасть. Манявсь, мерсь, груша ало, а сон аламодо ве ёно. Чувтано, кота понгсь, 42-це покшолмань. Паро кота, мезеяк эзизе муе! Шнуркатнень таркас уськеть. Сэрезэ аволь покш – 170 см. Каскась чаманзо лангсо ашти. Кепединек, бокасонзо муинек осколка. Лисни, осколкадо чавовсь. Сынь лемензэяк содылизь, пек одсто чавовсь цёрынькась, малав 21 ие тензэ ульнесь.

Пек ламо солдатт зярс апак муе, апак калма… Теке жо Зайцева горасо ламо иень перть важодить поисковиктне ды яла муить, эрьва ие таргить. Монень пек жаль боецтнэнь. Сынь нейгак аштить вирьсэ апак калма… Тосто самодо мейле лиякс ванат эрямонть лангс. Лиякс ней вастат Маень 9-це чинть. Эрьва вахтась мезе-бути максы, эрьвась токши ойметь. Бути ули мелеть теемс паро тев – сак. Лиясто ванат, вахтань меельце чинтень ломанесь полавтови паро ёнов. Тов ардтнить валдо ды чевте седей ломанть.
– Сюкпря кортамонть кисэ, Алексей!

Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».