Вейксэ иеде икеле Мордовия Республикань Государственной Собраниясь вейсэ «Известия Мордовии» газетанть ды «Зеленый мир» эйкакшонь экологиянь организациянть марто путсть ушодкс «Нармунень кудо» республикань экологиянь пелькстамонтень.
Мельспарозонок, те иень тунда Мордовиясо эпидемиологиянь лувось седе паролгадсь ды, санитарной вешематнень мельс саезь, Саранск ошонь Пролетарской райононь оймсемань парксо теевсть пелькстамонть итогтне. Те кенярксчинть панжизе МР-нь Государственной Собраниянь Председателень полавтыцясь Иван Москаев. Сон ёвтась поздоровт высшей законодательной органонь прявтонть Владимир Чибиркинэнь пельде.
– Пелькстамось алтавсь Нармунень раськеютконь чинтень, – мерсь Иван Москаев. — Важодевкстнэде састь 700 ламо эйкакштнень пельде. Неть: школасо тонавтницят, эйдень кужов якицят, кить важодевкстнэнь анокстызь вейсэ тонавтыцяст ды тетяст-аваст марто. Истя жо ламо роботат анокстасть дополнительной образованиянь учреждениянь коллективтне, искусствань школатне, художественной школатне ды студиятне.
Жюрись ванкшнось пек ламо фото ды видео-материалт, косо парсте невтезельть нармунтнень туртов эрьва кодат кудынетне ды кочкинзе сехте партнэнь. Сынь маласо шкасто понгавтовить Саранск ошонь парктне ды лия оймсема таркатне.
Кода мерсь Иван Москаев, весе важодевкстнэ теезь седейшкава ды мелень путозь.
Неть арсематнес вейсэндявсть МР-нь Госсобраниянь депутаттнэ Юрий Левашкин, Ринат Раимов ды максызь изницятненень эсест казнест. Пелькстыцятненень истя жо лембе валт ёвтасть «Известия Мордовии» газетань прявт редакторось Олег Каштанов ды «Зеленый мир» эйкакшонь экологиянь организациянь прявтось Ольга Ручина.
Те иестэ «Нармунень кудо» пелькстамось ютавтовсь 12 номинациянь коряс. «Ошонь эйдень кужот» номинациясонть изницякс лиссть Саранск ошонь округонь 36 № эйдень кужось ды Ковылкина ошонь «Центр развития ребенка – детский сад «Сказка» учреждениясь. Изницятнеде — 55. Кодат кудынеть ансяк эзть анокста эйкакштне вейсэ тонавтыцяст ды тетяст-аваст марто. Кенярдовтыть сельме ёвксонь геройтнень кудынест, учить азорт телефон-автоматонь будкань лувсо теезь ды ламо лиятне.
Невтемакс, Рузаевкань райононь Красносельской школань омбоце классо тонавтницясь Варвара Логинова весень дивавтынзе неень шкантень ладиця теевкссэнзэ, сонзэ нармунень кудынесь лемдявсь ипотечнойкс.
Башка дипломсо тешкстазельть сехте од пелькстыцятне. Вейкесь юткстост — Ковылкинасто Иван Мартынов, кинень эштё арасть колмо иетькак. Нама, нармунень кудыненть теизь тетязо-авазо, артызе жо сонсь цёрынесь. Башка приз максозь колмо иесэ Миша Галкиннэнь, кинь важодевксэсь алтавсь Юрий Гагаринэнь космосов ливтямонь 60 иетнень тешкстамонтень.
Те пелькстамонть ютавтомасо, изницятненень казнень рамамосо покш лезкс макссть: МР-нь Госсобранинянь Председателесь В.В. Чибиркин, депутаттнэ А.И. Поздняков, А.И. Атласов, Н.Б. Амбаев, С.И. Сиушов, В.Н. Сурайкин, Ю.А. Левашкин ды ламо лият. Истя жо ули путовксозо «Единая Россия» партиянь региононь отделениянть, «Электровыпрямитель» ПАО-нь генеральной директоронть Г.Ю. Каменцевень ды «МордовАгроМаш» АО-нь прявтонть Г.А. Громовонь. Кемеви, неть пелькстамотне поладовить, лездыцятне ламолгадыть.
Валентина Юдина