Неть читнестэ Мордовия Республикань Государственной Собраниясо ютавтовсь «кругловой столь». Сон алтавсь патриотической воспитаниянь, духовно-нравственной питнейчитнень ванстомань ды кемекстамонь ёнкстнэсэ законодательствань одкстомтомантень.
Тов пурнавкшность МР-нь Госсобраниянь депутаттнэ, Од ломанень парламентс, общественной организациятнес совицятне, минек региононь министерстватнесэ ды ведомстватнесэ важодицятне. Сонзэ панжизе ды ветясь МР-нь Госсобраниянь Председателень полавтыцясь, Социальной политикань коряс комитетэнь прявтось Наталья Долматова. Сон тешкстась: «Минек высшей законодательной органонь депутаттнэ аволь умок кемекстызь «О патриотическом и духовно-нравственном воспитании в Республике Мордовия» законопроектэнть, конань лангсо важодсь МР-нь Госсобраниянть юрсо теезь Од ломанень парламентэсь. Те кевкстемантень покш мель яви МР-нь Прявтось Артём Здунов».
МР-нь Образованиянь министрась Елена Солдатова пачтясь, Мордовиясо панжозь кадетэнь 164 класст. «Парта Героя» проектэнть лувсо Отечествань ванстыцятнень, Мордовиясо чачозтнень 250 лемтне совасть историяс, минек региононь кемень школатненень максозь Советской Союзонь Геройтнень лемест.
МР-нь Образованиянь министранть мелензэ коряс, кадетэнь класстнэсэ аволь уроконь шкасто эряви ушодомс профилень коряс кадрань анокстамо. Промкссонть ламо лезэв превс путомат ёвтазельть школань музейтнень пурнамост коряс; штобу школатнесэ тонавтницятне кандтневельть патриотической значокт ды штобу театратнень репертуарост молевельть вейке лувсо литературань ды историянь уроктнень марто.
И. Д. Воронин лемсэ Мордовской республиканской краеведениянь музеень прявтось Дмитрий Фролов ёвтнесь седе, кодамо важодема ютавтови од ломантнень ютксо, кить сеедьстэ сакшныть сыненст. Сон тешкстызе музейтнень вельде одтнэнь патриотической ды гражданской ёнксост кемекстамонть, тиринь таркатнень вечкеме тонавтоманть. Дмитрий Фроловонь валонзо коряс, тонавтыцятненень эрьва иестэ анокстама музеев якамонь план-график. Эрьва тонавтницянть содавтома свалшкань ды нурька шкань экспозициятнень ды виртуальной выставкатнень марто.
«Кругловой стольстэнть» яволявтозель: Россиянь Од ломанень вейсэндявксонть аволь формальной рейтингень цётамотнень коряс Мордовиясь совась кемень паро регионтнэнь юткс, косо ветяви виев важодема од ломантнень марто, ды васенцеде лиссь изницякс Од ломантнень тевест коряс Федеральной агентствань пелькстамосонть.
Республикасонок патриотической проекттнэде ды од ломантнень туртов ютавтовиця мероприятиятнеде, СВО-нь участниктнень семиятненень лезксэнь максомадо пурнавозтненень пачтясь МР-нь Од ломантнень тевест коряс Государственной комитетэнь од ломантнень гражданско-патриотической воспитаниянь отделэнь прявтось Екатерина Авраменко. Сон мерсь, Мордовиянь весе муниципальной районтнэсэ панжома гражданско-патриотической воспитаниянь центрат.
«Движение первых» од ломанень ды эйкакшонь Российской движениянь региононь отделениянь Советэнь прявтось Дарья Радайкина пачтясь республикасо те организациянть важодемань ёнкстнэде ды топавтозь тевтнеде. Сон кармавтсь совавтомс патриотической важодемантень сынсест эйкакштнень.
Республикасо кадетэнь движениянть виевгавтомадо пачтясь МР-нь Госсобраниянь депутатось, Саранскоень 26 № лицеень тонавтыцясь Сергей Екатеринин. Сонзэ вановтонзо коряс, советэнь шкань пособиятнень лангс нежедезь, эйкакштненень седе чарькодевиксэкс теемат ОБЖ-нь учебниктнень; школатнесэ панжомс таркат, конат алтавить СВО-нь участниктненень; военно-спортивной сбортнэнь ютавтомга анокстамс тренировочной куншкакурот; республикань казаконь ды кадетэнь класстнэнь вейсэндямс образованиянь вейкине органс.
«Кругловой стольсэнть» неень шкасто талновтыця кевкстематнеде, конат токить патриотической лувонть, кортасть: МР-нь Общественной палатань прявтось Иван Капитонов, МР-нь Прявтонть юрсо Эйкакштнень праваст коряс уполномоченноесь Наталья Юткина, МР-ва Россиянь ДОСААФ-нь региононь отделениянь председателесь Алексей Тюркин, МР-нь Госсобраниянть юрсо Од ломанень парламентэнь прявтонь полавтыцясь, Саранскоень 39 № СОШ-нь прявтось Сергей Терешкин, Ф. Ф. Ушаков адмиралонть лемсэ МР-нь «Ушаковцы» патриотической детско-юношеской общественной движениянь прявтось Кирилл Глазунов.
Меельцекс ванкшновсь МР-нь законопроектэсь, косо кортави сеть ломантнень валдо лемест а стувтомга, конатнень покш путовксост республиканть лезэс. Сонзэ ней ванкшны МР-нь Госсобраниянть юрсо Од ломанень парламентэсь.
Валентина Юдина