Четверг, марта 28, 2024
Важное

Неть читнестэ Мордовия Республикань Государственной Собраниясо ютавтовсь МР-нь Демографиянь ды миграциянь политикань координационной советэнь промкс. Кода свал, сонзэ панжизе ды ветясь МР-нь Госсобраниянь Председателесь Владимир Чибиркин.


Тосо ульнесть: МР-нь Госсобраниянь Председателень кавто полавтыцятне Наталья Долматова ды Евгений Тюркин, минек региононь парламентэнь депутаттнэ, МР-нь министерстватнень ды ведомстватнень важодицятне, местной самоуправлениянь органонь представительтне, общественной организациятнес совицятне, Мордовиянь вузтнэнь ректортнэ.

Кортамось мольсь од семиятненень лезксэнь максомадо, 2021 иестэ Весероссиянь эрицятнень сёрмадстомань цётамотнеде.
Васняяк пурнавозтненень пачтязель, мезе тееви минек республикасо «Демография» проектэнть эрямос совавтомга. Теде весенень ёвтнесь МР-нь Эрицятнень занятостень, трудонь ды социальной ванстомань министрась Игорь Князьков. Республикасонок эйкакшонь триця семиятненень лезксэнь максомадо пачтямсто, сон ледстясь, 2023 иень январень 1-це чистэ саезь эрямос совавтови эйкакш марто семиятненень вейкине максовиця пособиясь. Кода мерсь Игорь Васильевич, тень вельде васняяк максови комплексной лезкс нужачисэ эриця семиятненень. Истя жо сон пачтясь маласо шкасто Россиянь Трудонь министерстванть марто ладямонь документэнь кемекстамодо. Истя софинансированиянь лувсо республикантень явовить ярмакт од пандоматнес. Игорь Князьковонь валонзо коряс, Мордовиясо истят семиятнеде 27 тёжадо ламо.

Седе тов кортамось мольсь сеть семиятнень марто важодемадонть, конат састь тенек ДНР, ЛНР, Херсонской областьстэ тосо специальной военной операциянть ютавтоманзо кувалма.
Кодат мерат неень шкане эряви тевс нолдамс минек республикасо эрицятнень ламолгавтомга, сынст доходост кастомга – теде кортась МР-нь Госсобраниянь Председателесь Владимир Чибиркин. Васень таркас сон аравтызе покш квалификациянь ды парсте пандовиця важодема таркатнень ламолгавтоманть, зарплататнень кастоманть.

– Те кевкстемантень покш мель явсь МР-нь Прявтось Госсобраниянтень ды республикань весе эрицятненень эрьва иень Кучомасонть. Тень лангсо важодема весенень тенек, – мерсь Владимир Васильевич.
Кода аштить неть ды ламо лия кевкстематне од семиятнень коряс, пурнавозтненень пачтясь Н. П. Огарёв лемсэ Мордовской государственной университетэнь ректорось Дмитрий Глушко. Сон башка мель явсь студентэнь семиятненень социальной лезксэнь максомань кевкстемантень.

– Неень шкане минек университетсэ тонавтниця студентэнь, аспирантонь, ординаторонь семиятнеде нилесядто ламо (421), – мерсь Дмитрий Глушко.
Истя жо сон пачтясь те вузсонть тонавтницятненень мелень явомадо: эрямо таркань паролгавтомань, питневтеме спортонь объекттнэс якамонь ды материальной лезксэнь максомадо.
Мордовия Республикань Од ломантнень тевест коряс Государственной комитетэнь прявтонь васенце полавтыцясь Елена Мирошкина пачтясь од семиятнень марто важодема лувдонть, ков совавтовить сеть проекттнэ ды тевтне-илатне, конат лездыть мирдтнень ды нитнень ютксо вейкень-вейкень чарькодемантень, духовно-нравственной питнейчитнень эрямозост совавтомантень, ответственностень кирдемантень.

Координационной советэнь васенце кевкстеманть ванкшномадо мейле Мордовия Республикань Государственной Собраниянь Председателень Благодарность ды питней казнеть максозь Саранскойсэ эриця Котовтнень семиянтень, косо трявить-кастовить кото эйкакшт, Вирясовонь студентэнь семиянтень, косо мирдть-нить важодить Медицинань курок лезксэнь максомань станциясо. Истя жо Ольга Пройдакованень, кие сась семиянек эрямо Мордовияв Мариупольстэ.
Седе тов пурнавозтне кунсолызь Мордовия Республикасо Государственной статистикань федеральной службань территориальной органонь руководителенть Ия Парамоновань докладонзо седе, кода ютавтовсь 2021 иестэ Весероссиянь эрицятнень сёрмадстомась. Теке жо теманть коряс кортась Рузаевкань муниципальной райононь прявтонь полавтыцясь – Экономической анализэнь ды прогнозированиянь управлениянь прявтось Александр Орехов.

Те промкссонть ёвтазельть ламо мельть-арсемат, конат саевить мельс ды маласо шкасто кармить совавтовомо эрямос.

Тееведе содавиксэкс: Данила ды Анастасия Вирясовтне. Те од семия, конась тонавтни Н. П. Огарёв лемсэ Мордовской государственной университетэнь Медицинской институтсо.

– Мордовияв тонавтнеме мон сынь Ульяновской областьстэ, мирдем Данила – Нижегородской ёнкссто. Теевинек содавиксэкс ды венчинек-урьвакстынек Саранскойсэ, – пачтясь тенек Анастасия Вирясова. – Оякс минь теевинек тонавтнемань васенце курстнэсэ, куроксто вейсэндимизь студентэнь советэсь, общественной тевтнень топавтомась.

Сень лангс апак вано, од ломантне тонавтнемаст эштё эзизь прядо, сынь мусть эстест тев специальностень коряс. Кавонест важодить Медицинской куроконь лезксэнь максомань станциясо. Анастасия роботы медицинской сестракс, Данила – «анестезиология-реаниматология» специальностенть коряс. Од ломантне кенерить эрьва ков. Сынь поладыть общественной важодемаст студентэнь советсэ. Лездыть Н.П. Огарёв лемсэ МГУ-со тонавтниця од семиятненень эрьва кодамо кевкстемань коряс. Тонавтнемаст прядомадо мейле эрямост арсить сюлмамс Мордовиянть марто.

Ольга Пройдакова, Мариуполь ошсто минек республикав сазесь:
– Эсь шкасто тонавтнинь Мариупольской государственной гуманитарной университетсэ «Украинский язык и литература» специальностенть коряс. Шкань ютазь теке университетсэнть прядынь эштё вейке факультет: «управление учебным заведением» специальностенть коряс. 2007-2022 иетнестэ важодинь Мариуполь ошонь 28 номер школань прявтонь полавтыцякс.
Мирдем Геннадий Вячеславович Саранскойсэ важоди строицянь бригадасо, неень шкане сон тусь командировкав Мариуполь ошов, косо лезды ошонь эрицятненень эрямо таркань витнемасо. Ули вишка цёрыненек, сон яки эйдень кужов. Мордовиясо вастымизь пек парсте, сы шкань эрямонок арсетяно сюлмамс республиканть марто, ковгак тестэ а тутано.

Валентина Юдина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».