Эрьва ие августонь омбоце недлячистэ Россиясо тешкстави Строителень чись. Те – профессиональной кенярксчи сетнень туртов, кить сюлмавозь строямонь енксонть марто. Сон алтави сеть ломантненень, конат строить кудот, кить, сэдть ды цела ошт ды теить вадря условият минек эрямонть туртов. 2025 иестэ кенярксчись тешкстави августонь 10-це чистэ. Ды минек ули меленек евтнемс ловныцятненень «АПО «Элеком» ОАО-нь строительной цехень важодицятнеде.
«АПО «Элеком» ОАО-сь – республикань велень хозяйствань прявт предприятиятнестэ вейкесь. Сонзэ прявтсо тевень содыця ломанесь Иван Александрович Базакин. Неень шкасто предприятиясь важоди сюротнень, ламбамо якстерькаень ды тикшень кастомань, сюракшов ракшатнень трямонь ды ловсонь нолдамонь енкстнэсэ. Сехте покш питнейчикс жо хозяйствасонть лововить важодицятне – эсь тевень содыця алкуксонь специалисттнэ. Ды те аволь ансяк механизатортнэ ды скалонь потявтыцятне. Предприятиянть вадрясто важодемасо покш путовксост Элекомонь строительной цехень специалисттнэньгак.
Весе парсте содыть, строителень тевесь эрявикс свалшкасто. Сонтемензэ ковгак велень хозяйствасояк. Мезесь-бути одкстомтови, мезе-бути тееви од. Ней «АПО «Элеком» ОАО-со педе-пес витнемань тевть ветявить Трофимовщина веленть маласо фермасонть. Тесэ вадрялгавтови потявтовиця скалтнэнь туртов кардось. Икеленсесь уш пек таштомсь, важодемань туртов условиятне ульнесть аволь пек вадрят, секскак кемекстазель весементь одкстомтомс-вадрялгавтомс. Ды, эряви меремс, тесэ свалшкане моли ракшань трямонь-кирдемань ферматнень витнемась-петнемась.
Весе тевтнень топавтыть предприятиянть эсензэ строительной цехень специалисттнэ. Сынст прявтсо ашти эряза мастерэсь Василий Петрович Рузманов. Эсь бригаданть марто, козонь совить сондензэ башка эште 9 ломанть, строить-витнить предприятиянь весе объекттнэнь.
– Те фермасонть тевентень кундынек ковдо икеле. Васняяк калавтынек-урядынек ташто киякстнэнь, кардынетнень, кенкштнень ды вальматнень. Ансяк бетондонть тесэ урядынек тежадо ламо кубической метрат. Ней бетононь човорявкссо валтано киякстнэнь. Весементь тейтяно парсте, штобу седе куватьс сатоволь, – евтни строительной цехень мастерэсь Василий Рузманов. – Киякстнэ валовить, вейке боканть кирьпецьсэ вачкасынек, транспортеронь лентанть путсынек ды кадовить ортатне. Лиякс меремс, тейтяно весементь педе-пес. Арсеви, сентябрянтень весе тевтне кармить анокт.
Фермасо тевтнень ушодовомадо икеле бригадась витнинзе-вадрялгавтынзе эсест элеваторсо бытовой помещениятнень, коридортнэнь, душевойтнень.
Сонсь Василий Рузманов церась мокшо. Чачома-касома енксозо – Зубова-Полянань районось. Школадо мейле тонавтнесь Саранскойсэ Н.П. Огарев лемсэ МГУ-нь строительной факультетсэ. Тонавтнема шкасто вастызе вечкевиксэнзэ – Отяжелень райононь Дюрькина велень эрзянь тейтеренть. Шкань ютазь одтнэ урьвакстсть ды тусть эрямо Ромодановань райононь Сахарный поселкав. Василий Петрович колмо иеть ульнесь «Агротранс» предприятиянь прявтокс. А вана 1992 иестэ саезь неень шкас важоди строителекс «АПО «Элеком» ОАО-со. Весе неть иетнень перть вадрясто важодеманть кис ламоксть казевсь эрьва кодамо грамотасо ды шнамонь коневсо.
Строителень профессиянть Василий Рузманов кочкизе а стяко, те тевенть марто весе эрямонзо перть ульнесь сюлмавозь тетязо, профессиясонть важоди лелязо. Кода евтни Василий Петрович, сон уш 6-це классо кармась эрьва кодамо тевсэ лездамо велень эрицятненень ды ковозонзо роботась 60 целковойть. Се шкане те аволь вишкине ярмакт ульнесть.
Василий Петрович пек вечксы эсь роботанзо ды топавты весементь оймень путозь. Кочказь профессиянть коряс зярдояк эзь янксекшне, корты, муизе эсь прянзо строителень тевсэнть ды пек уцяскав.
Кода евтынек седе вере, строительной бригадасонть роботыть 9 ломанть. Ютксост: Вячеслав Ефимов, Дмитрий Хабибулин, Александр Новотрясов, Даниил Наумов, Константин Аньчков.
Дмитрий Хабибулин строительной цехень бригадасонть важоди вете иеть. Церась – Ромодановасто, школадо мейле прядсь СПТУ. Тонавтнесь «водитель-машинист сельхозпроизводства» специальностенть коряс.
– Строителень енкссо важодеме ушодынь эште 16 иесэ, техникумсо тонавтнемстэ. Юткошкасто стройкасо роботынь. Вете иеде икеле сынь Элекомов ды кадовинь теске. Специальностень коряс мон тесэ ловован каменщикекс. Алкукс жо, куш кодамо тев монень топавтови. Важодемась вечкеви, бригаданок вадря.
Эште вейке строителесь – Константин Аньчков, бригадасонть важоди аволь умок. Сась тей 2023 иестэ, аламос роботась, саизь армияв. Армиядо мейле, 2024 иенть прядовомсто, сась мекев эсь бригадас. Сон истя жо Ромодановань районсто, школанть прядомадо мейле тонавтнеманзо поладызе эсь райононь техникумсо, получась механизаторонь профессия. Ансяк вана мода лангсо важодемс мелезэ эзь ульне, сон кочкизе строителень тевенть.
Юлия Еремина
Фототне
Егор Горинэнь.