Пятница, марта 29, 2024
Важное


Саранск ошонь «Горэлектротранс» муниципальной предприятиясь течинь чине ашти транспортонь прявт артериякс.

Сонзэ автобустнэ ды троллейбустнэ важодить аволь ансяк ошонь маршруттнэсэ, истя жо усксить ардыцятнень ошонть маласо аштиця велетнескак. Сынст важодемаст пек эрявикс ломантнень эрямост вадрялгавтомга. Эдь транспорттомо течи ковгак.

Муниципальной предприятиянь автобустнэ ды троллейбустнэ эрьва чистэ усксить сядо ниленьгемень тёжадо ламо ломанть. Нама, те иень эпидемиологиянь а шожда тевтнень кувалма ардыцятне седе аламолгадсть, ансяк эсь важодеманть предприятиясь эзизе лоткавтокшно вейке чискак.

– 2020 иесь минек ды весе лия предприятиятнень туртовгак кармась а шождакс. Ансяк мезеяк лангс апак вано, топавтынек икеленек путозь весе аравтлувтнень, кеместэ важодинек социальной задачатнень коряс, – ёвтни «Горэлектротранс» МП-нь прявтось Андрей Викторович Кулагин. – Предприятиясь ды коллективесь поладыть важодеманть неень кезовонь а шожда шкастонть. Минек кондуктортнэ ды водительтне эдь истя жо роботыть ломантнень марто. Лиякс меремс, истя жо «якстере зонасот». Эрьва чистэ сынь лисить рейсэс ды топавтыть эсь тевенть – роботыть эрицятнень лезэс.

Ды те алкукс истя. Кондукторонтень эрьва чистэ сави вастовомс тёжат ломань марто, эрьва ардыцянть эсензэ обуцязо. Кие-бути уш умок эстензэ кемекстызе, маскась ды перчаткатне – эрявикс кедьёнкст, лиясь жо а арси кидеяк, куш эсензэ, куш лиятнень шумбрачиде. Кода тесэ улема транспортонь важодицятненень – кондуктортнэнень ды водительтненень? Сыньгак бажить ванстомс эсь шумбрачинть, мелявтыть малавиксэст кисэ. Секскак весенень улема ломанекс ды топавтома кемекстазь вешематнень.

– Минь путтано весе вийтнень эсь важодицятнень ды эрицятнень шумбрачист ванстомга, – тешксты Андрей Викторович. – Весе транспортонтень эрьва чистэ, ды аволь весть, ютавтови санобработка, топавттано весе вешематнень ды аравтлувтнень, конат кемекстазь кезовонь каршо бороцямонь шкантень. Бажатано теемс весементь, штобу вадрялгавтомс ардыцятнень ёжост.

Истя, Од иентень автобустнэс ды троллейбустнэс нолдасть аламошка кенярксчинь ёжо – гирляндасто тейсть кузнэть ды понгавтсть телень мазый артовкст. Нама, транспортонть мазылгавтызь аволь икеле иетнень коряс, зярдо, автобусос эли троллейбусос совазь, эсь прянть марить алкуксонь ёвкссо: прят велькссэ цитнесть эрьва кодамо тюсонь налкшкеть, лия мазылгавтомапельть, пиже, сэнь, ожо ды якстере толнэсэ палсть гирляндатне. Тедеде эпидемиологиянь вешематнень кувалма истямо мазылгавтома эзь мереве. Эдь транспортсонть тееви санобработка. Нама, минь кирдьсынек весе неть вешематнень, ансяк тевтне вадрялгадовольть ды Од 2021 иесь кандоволь вадря кулят, сэтьме ды зыянтомо эрямо.

Юлия Еремина

ОД ИЕНЬ ПОЗДОРОВТ

Мельвановикс ялгат! Минек предприятиянь весе важодицятненень ёвтан седейшкавань поздоровт сыця Од иенть кувалма! Васняяк, арсян тыненк ды тынк малавикстнэнень кеме шумбрачи, уцяска, весе арсеманк ды бажамонк топавтома, минек эрицятнень лезэс вадря важодема. Кеман, предприятиянок седе товгак карми топавтомо икелензэ аравтозь задачатнень ды мартонк вейсэ карматано важодеме эрицятненень максовиця услугатнень вадрялгавтоманть лангсо.
Юты эштё зярыя шка ды 2020 иесь кадови историяс. Ульнесь сон аволь шождакс минек предприятиянть туртовгак, теке марто тонавтымизь стака шкатнестэ важодемантень, тонавтымизь улемс виевекс ды кемекс.
Арсетяно, Од иесь канды тенек вадря эрямо ды вадря тевть, кемтяно, весе стакачитне, весе зыянтнэ кадовить ютазь иентень. Сыця Од ие марто, вечкевикс коллегат!

Мельванома марто,
Андрей Викторович Кулагин,
Саранск ошонь «Горэлектротранс» МП-нь прявтось.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».