Течи Печатень кудосо ютавтовсь пресс-конференция МР-нь Правительствань Председателень полавтыцянть Галина Лотванова, Мордовиянь Здравоохранениянь министранть Олег Маркин ды лиятнень марто.
Пурнавозетне яволявтсть, Мордовиясо меельце чинь-вень перть тешкстазь коронавируссо 7 сэредицят. Истя, чадыковонь 8-це чинтень республикасонть весемезэ тешкстазь коронавирусонь инфекциясо 13 сэредицят. Колмо ломантне пичкасть, сынь уш кудосот. Весемезэ республикань инфекционной больницясонть аштить 54 ломанть. Те Саранскоень, Рузаевкань, Зубова-Полянань, Ковылкинань, Кадошкинань, Темниковань, Лямбирень, Покш Игнатовань, Орданьбуень, Ельникень ды Дубенкань ёнксонь эрицятне.
Вастовоманть лувсо тешкстазель, ней зыянось юты сеть ломантнень пельде, кить сыть Мордовияв Московсто, Санкт-Петербургсто ды лия регионтнэстэ.
- Республикань мельвановикс эрицят! Топавтодо весе вешематнень. Бути тынь эли малавиксэнк састь республикав лия регионтнэстэ, аштеде 14 чинь перть кудосо. Пачтядо велявтомадонк местной самоуправлениянь органтнэс эли поликлиникав, - пшкадсь Галина Лотванова.
Евтнесть, аволь умок республикань вейке эрицясь эсензэ машинасонзо якась Московов, ульнесь тосо кавто чить. Кудов велявтсь уш температура марто. Ансяк киненьгак эзь ёвта. Истя, педявтсь коронавирус весе семиянстэнь.
Пурнавозетне тешкстызь: ней а эряви ардтнемс лия регионтнэс. Ванстодо шумбрачинк!