Татьяна Викторовнань марто теевинь содавиксэкс Дивеевав ардомсто. Седе, кода сон ардтни ламо таркава паломникень группа марто, содылинь. Ды вана понгинек вейс. Мизолдыця, кортыця, лиянень паронь арсиця, вакссонзо аштемстэ ёжоткак витеви. А уш кода карми мездеяк ёвтнеме – ансяк кунсолок, истя мельстуезь корты, маряви, соды эрьва мезде. Татьяна Лютый – Мордовиясо ульнесь васенцекс, кие кармась усксеме ознома таркава паломникть.
Чачсь Татьяна Саранскойсэ. А вана ундоксонзо ютыть Орданьбуень Четвертакова велестэ. Умонь шкасто Катя бабазо шуба лангс Саранскойстэ рамакшнось вишкине кудыне ды истя семиянек састь тей эрямо. Тетязо эштё вишкинель.
– Мон тонавтнинь Саранскоень 9 № школасо, конань ней калавтызь. Истямо ризкс весень седейсэ тень коряс! Зяро ледстнемат кадовсть, те эдь эрямонь история! Ине Отечественной войнань шкане сон ульнесь эвакогоспиталекс. Тетям вишкинестэ томбавкшнось ды лецясть эйсэнзэ тосо. Авамгак сисем иесэ тейтернекс чийниль тов частушкань морсеме. Бабам кандыль тов ловсо, кодыль носкат, кисетт. Те школантень якасть тетям, минь ялаксом марто ды монь эйкакшон. Тонавтсть эйсэнек некеть тонавтыцятне. Авам, Антонина Викторовна ды тетям Виктор Дмитриевич, эрясть шабрацек. Сынь кармасть тейнеме ялгакс, зярдо тенст ульнесть 12 ды 14 иеть. Седе тов сюлмизь эрямост вейс. Пингест перть сынь вейкест-вейкест кисэ мелявтсть. Аванень ней 88 иеть. Тетям тусь эрямосто 2010 иестэ, малав эрямонзо перть сон кевердиль понань кемть. Те шкас сельмень икеле: авам коды мезтькак, тетям вакссонзо калавты сурень тапарксонть, эли кода вейсэ морыльть, – ледстни Татьяна Викторовна.
Школасо сон тонавтнесь парсте, прядызе ансяк ветес. Пек вечксь рузонь келень уроктнень, шождасто сёрмадсь сочиненият. Вейкеяк ильведькс эзь нолдтне диктантонь ды лия заданиянь теемстэ. Рузонь келень парсте содамось теке мартонзо чачсь. «Оймень коряс мон – филолог», – корты минек героинясь. Сон бажась тонавтнемс университетсэ. Ансяк вана филологиянь факультетэв эзь понго… Савсь молемс тонавтнеме кооперативной техникумов. Сонзэ прядомадо мейле важодсь Саранскоень райпосо, Мордовской хладокомбинатсо товароведэкс. 1979 иестэ лиссь мирденень. Цёранть фамилиязо – Лютый. Татьяна васня эзь кеме, арсесь, пейдезь тензэ мерить истя. Натой варштынзе документэнзэ. Мирдезэ чачсь Лямбирьсэ, ундоксонзо жо теке райононь Лопатина хуторсто. Тов 20-це пингень ушодкссто састь эрямо зярыя семият Украинасто.
Седе тов мирдть-нить тукшность эрямо Эстонияв. СССР-нть каладомадо мейле мекев велявтсть Саранскоев. Тесэ одс эрявсь ушодомс эрямонть. Мольсть 1990-це стака иетне. Мезе теемс, кодамо тевс кундамс? Варчизь виест предпринимателень тевсэнть. Кармасть стамо норкань шапкат ды микшнемест базарсо. Нама, пек стакаль, веть апак удсе стасть кедьсэ. Теде мейле сынь кирдсть частной автобуст, конат ардтнесть ошонь маршруттнэва. 2008 иестэ Михаил мирдезэ апак учне тусь эрямосто. Татьяна Викторовнанень пек стакаль весементь ветямс эстензэ. Сон кадсь ансяк кавто автобуст. Шкань ютазь кредит лангс рамась микроавтобус. Кармась ардтнеме сонсь руль экшсэ «Саранск-Зубова-Поляна-Явас» маршрутканть. Эрьва чистэ вейке ёнов – 265 вайгельбеть. Водителень стажозо 1987 иестэ саезь, ков ансяк эзь ардтне.
– Весть монень пшкадсь Московсо эриця тейтерь-ава, кона чачомань коряс Мордовиянь. Сон алтась малавиксэнзэ ускомс Матронушканень. Кие те Матронушкась? Мезекс тензэ ардыть? Мон сестэ мезеяк эзинь сода. Сыргамодо икеле пачтясь, кото ломанть а молевить. Сестэ саия телефоном, гайневтинь васенцетненень, кить понгсть – весе алтасть молемс. Ардынек. Те ульнесь 2009 иестэ. Те шкас а стувтса, мартон вастовомо сась урьвам (цёрам марто эрить Московсо) ды мери: «Тон содат, Матронушкань кедьсэ ознат, мезеяк вешат – ды сон свал лезды. Мон мирдем вастыя сонензэ озномадо мейле». Ванан лангозонзо ды эсь пачкан арсян: «Вай, мезть тапари, нать алкукс истя эрси?». Мон Паздонть ульнинь ве ёно… Се шкане пек сэредсь тетям. Сон ульнесь 2-це группань инвалидэкс, томбавозь пильгезэ пек сэредсь. Меельце кавто иетнестэ эзь якавояк. Мон карминь озномо тетянь кисэ, вешинь лезкс Матронушкань кедьстэ. Кемтядо-арась, кемень чинь ютазь сон стясь пильге лангс! Пазось ветясь эйсэнь эстензэ цюдань тевсэ. Тетянь марто сюлмавозь ламо историят, конат весе а ёвтневить.
Матронушкань кедьсэ улемадон мейле ёжозо паролгадыль. Кавксть токакшнызе инсультось. Весть ёжозо пек берякадсь, тердезь врачось мерсь, эри кавто-колмо чить. Авам начтнесь турванзо. Монень таго эрявсь се шкане ардомс паломниктнень марто Матронушканень. Сельведь марто ознынь тетянь кис. Сестэ аволь умок калмакшныя мирдем, пек стакаль тень ёмавтомс тетяньгак. Ардомань перть авардинь. Кудов самодо мейле пек дивсинь: тетям паро превсэ, ашти озадо ды ярсы. Теде мейле эрясь эштё вейксэ ковт. Матронушка алкукс лезды, ды неть цюдань тевтне а лововить, – ёвтни Татьяна Лютый.
Седе тов Татьяна Викторовна арсесь-тейсь лия маршрутт. Ардтнесть Оптина Пустынев. Сон рамась микроавтобусонтень телевизор, ардомсто ломантне вансть православной фильмат. Тейтерь-авась кармась пурнамо ансяк паломнической ардтнемат. Васня ардтнесть недля ютксто, ломантне кармасть энялдомо ардтнемс оймсема читнестэяк – седе молевить. Ошонь автобусонь лотксема таркатнесэ педявтозельть паломнической ардтнематнеде яволявтомат. Седеяк ламот кармасть содамо. Паро мельсэ сыргить васоло килангов райононь эрицятнеяк.
– Татьяна Викторовна, ков седе сеедьстэ ардтнить ломантне?
– Ламонень пек вечкеви Дивеевась, ардыть Московонь Покровской монастырев Матронушканень, Калужской областень пек содавикс Оптина Пустынь монастырев. Истя жо ардтнетяно Арзамасов, Муромов, Троице-Сергиева Лаврав, Кубинкав Россиянь Вооруженной вийтнень прявт храмов, Истрасо – Од Иерусалимев, Селигерсэ – Нило-Столобенская пустынь монастырев, Татарстанов, Ярославской областев (Толга-Тутаев маршрутось). Иезэнзэ весть, кизна, пурнан васоло таркав, саемга: Питерэв, Уралов, Валаамов, Соловкив, Псково-Печерский монастырев ды седе тов. Эрьвасонть – кезэрень святынят, эрьва таркантень ардыть пек васолдо. Миненек ютавтыть вадря экскурсият. Нама, мон зярыя ковдо икеле анокстан, сюлмаван монастыртнень марто. Пачтян, зярдо сатано, зяронек. Бути тень а теемс – а ков ули лоткамс вензэ лангс. Неть таркатнесэ бажан саемс ломантнень аволь ансяк озномо. Селигерсэ укшнотано катерсэ, Уралсо ванкшнотано Кунгурсо эень пещеранть, Раифасо-Свияжскойсэ укшнотано венчсэ. Ломантне несызь Пазонть пельде мазычинть. Нижегородской областень Макарьевский Желтоводский монастырев уйтяно паромсо. Ды вана Равга уемстэ апак учне икеленек лиси монастыресь – теке ашо покш венч. А ёвтавикс мазычи! Ломантне пек кецнить неезденть.
Эрьва тарканть эсензэ мазычизэ ды духовной сюпавчизэ. Самарской областень Ташла велесэ улить «Избавительница от бед» цюдань теиця Пазава, иневанькс кавто лисьмапрят.
Зярдо ломантне ардтнить паломникекс – сынь стамбарнэ, аламонь-аламонь ютыть Пазонтень. Кие цюдань тевтнень вельде, кие мари Пазонь лезкс, кие жо кортни батюшкатнень марто ды седеезэ ойми. Кинь кувать арасельть эйдест, чачтомадост мейле сыть сюкпрянь ёвтамо церьковав ды мейле кармить сакшномо седеяк сеедьстэ. Минь ардтнетяно Московонь Зачатьевской монастырев. Тосо пек озныть эйкакшонь чачомадо. Ды содан зярыя семият, косо чачсть эйдест. Эйкакшонь чачтомс лезды Матронушкаяк. Сеедьстэ ардтнетяно святойтнень ледстнема чистэст, чарькодеви, те шкане сыть-пурнавить ламо ломанть. Ансяк самай неть читнестэ ойменть пештясы валдо ды лембе. Зярдо омбомасторсто Россияв тукшнызь Николай Чудотворецэнь ды Спиридон Трифимунтскиень мощаст, минь истя жо ардтнинек сюконямо.
Ардтнематнеде Татьяна Викторовна тейни видеот. Кодамо мазычи эрси Од иестэ ды Роштувасто Дивеевасо – истямо костояк а неят. Тосо жо, Пазонь Авань Успениянь покш чистэ, цецясо ацыть весе Святой Канавканть. Видео вельде те мазычинть несызь сетне, кить арасельть тосо, кить а молевить шумбрачинь коряс.
Се васенце микроавтобусонть савсь миемс. Сон ардсь 1 миллион 200 тёжат вайгельбеть! Миемстэяк лиснесь цюдань тев. Ды ансяк Пазонть лездамонзо вельде миевсь куроксто ды паро ломаннень, кинень пек эрявсь самай те транспортось.
Неень шкастояк Татьяна Викторовна полады усксеме ломантнень ознома таркатнева. Малавиксэнзэ мелявтыть кисэнзэ, кудочис сон а пекставкшны. Цёразо ды тейтерезэ эрить Московсо, улить колмо вечкевикс нуцьканзо.
2022 иень сентябрясто саезь ялгацек паломниктнень марто пурнасть «Мордовия Z» группа. Кармасть лездамо минек цёратненень. Активсэнть сисем ломанть. Ней пурныть гуманитарной лезкс ды кучить СВО-нь зонав. Саранскоень колмо церьковава кодыть кекшемань алтымат (Юго-Западонь – Кириллэнь ды Мефодиень церьковасо, Светтехстройсэ – Казанскойсэ ды Московской куросо – Трехсвятской церьковасо). Сетть тенст ускить Отяжбуень Дюрькинасто.
– Цёратнень марто кирдтяно кеме сюлмот. Лездатано валсо ды тевсэ. Раматано ды кучтано тенст оборудования, питней инструментт. Неть читнестэ кучинек 240 алтымат. Содасынь волонтёртнэнь, конат важодить Россиянь границясо. Сынь алкукс важодить, чинек-венек, пидить ярсамопельть ды ускить цёратненень. Вана истя, ансяк вейсэ учови тенек Изнямоськак! – прядызе кортамонзо Татьяна Викторовна.
Татьяна Маторкина