МР-нь Госсобраниясо ютавтозель вастовома «Герои среди СВОих» программань участниктнень марто. Стажировканть лувсо СВО-нь участниктне кармасть содамо законодательтнень важодемадост. МР-нь Госсобраниянь Председателесь Владимир Чибиркин пачтясь, сисем тердематнень перть, 1995 иестэ саезь, примазельть Мордовиянь малав 2800 законт ды Государственной Собраниянь 1500 постановленият, сынь лездыть исполнительной властентень важодемс республиканть виевгавтомань енкстнэнь коряс.
«Неень шкасто васенце задачась, конань путызе Россиянь Президентэсь, истя жо Мордовиянь Прявтось Госсобраниянтень Кучомасонть, – те СВО-нь участниктненень ды сынст семиятненень лездамось. Тень лангсо важодить федеральной кементь законт ды 15-де ламо – минек республикасо», – мерсь Владимир Чибиркин. «Герои среди СВОих» программань участниктненень сон мерсь евтамс эсь мельтнень-бажамотнень, конатне саевить вановт алов ды кармить тевс совавтовомо законодательствасонть.
Государственной Собраниянь структурадонть, депутаттнэнь кочкамодонть, фракциянь ды комитетэнь составтнень теемадо ды лиядо «Герои среди СВОих» программань участниктненень евтнесь Законодательствань ды законностень коряс комитетэнь председателесь Валерий Алехин.
Вастовомась поладозель Госсобраниянь музейсэ региононь территориясо парламентаризмань историядо кортамосонть. Тиринь масторонь ванстыцятне ванкшнызь архивной фототнень, эрьва кодамо тердемань депутаттнэнь курмост-кармост, истя жо специальной военной операциянтень алтазь экспозициянть ды «Хроники террора украинского неонацистского режима» фотовыставканть.