Телеэкрантнэс лиси «20/22» (16+) васенце художественной фильмась, конась алтави специальной военной операциянь тевтненень, ды снимазь сонзэ ютавтомань таркасонть. Февралень 22-це чистэ кинонть васенцекс несызь https://1tv.ru/ онлайн-платформань ваныцятне.

А вана февралень 23-24-це читнестэ мини-сериалонь лувсо сонзэ невтьсы Васенце каналось. Фильманть снимизе BBG кинокомпаниясь Военкинонть, Донецкой Народной Республикань Администрациянть ды  Интернетэнь виевгавтомань институтонть («ИРИ» АНО) лезксэст пингстэ.

Режиссёронть Андрей Симоновонь военной драмасонть невтевить 2022 иень событиятне – специальной военной операциянть ушодовомась – ды кода сындест арсесть эрьва кодат ломантне, эрямосонть кодат кочкамот сынь тейсть.

Сюжетэнь юрсонть кавто од ломантнень уцяскаст – Алисань ды Данилань. СВО-донть пачтямось вечкицятнень явсынзе кавто ёнов. Цёрась эсь олясо туи спецоперацияв, косо уш служи сонзэ ялаксозо, а вана тейтересь украинань оянзо пельде Киевсэ бомбамотнеде марязь, кармась молеме спецоперациянть каршо. Ансяк сестэ, кода Данила лотки лиснеме мартонзо телефонсо кортнематнес, Алиса сырги СВО-нь таркатнес сонзэ вешнеме.

2023 иень тунда фильмась снимавсь Мариупольсэ. Секс камератнень объективтнес понгсть ошонь яжазь кудотне ды ломантнень потмура чаматне. Истя жо кой-кона сценатне снимавсть Московсо, Московонь ды Ростовонь областтнесэ.

Прявт ды эпизодонь рольтнень налксизь од артисттнэ Аристарх Венес, Дарья Кукарских, Владимир Карпук, Сергей Черданцев, Георгий Солодовник, Александр Югов ды лиятне. Ламот эпизодтнэсэ снимавсть СВО-нь участниктне ды Мариуполень эрицятне.