Пятница, февраля 03, 2023
Важное

Марина Александровна Моисеева (эштё сестэ Зайкина) марто теевинь содавиксэкс Ленинградонь А.А.Жданов лемсэ университетсэ тонавтнемстэ.

Те шкас эзь стувтово, кодамо мельстуиця, сельмс а эциця, панжадо мизолкс марто тейтерькась совась тенек инжекс Санкт-Петербургонь (сестэ Ленинград) ошонь Од Измайловской проспектсэнть аштиця общежитиянь комнатазонок. Улить истят ломанть, кинь марто содавиксэкс теевемстэ, маряви, сон теть кадови ламо иень ялгакс. Истя лисськак эрямосонть. Вана уш малав ниленьгемень иеть Марина Моисеева марто сеедьстэ гайневтнетяно, ули меленек содамс вейке-вейкень эрямодонок. Минек вейсэнди аволь ансяк весть кочказь вечкевикс тевесь –журналистикась, эштё ёвтнетяно, кие кодамо иневанькс таркасо ульнесь, кодат ёжомарямот сон тосо марясь-несь.
Аволь умок покш мельспаросо вастыя кулянть, кода МР-нь Прявтонть кедьсэ Печатень кенрксчинть кувалма вастовомасонть Марина Александровнанень макссть «Массовой информациянь средствань почётонь роботник» покш лем. Ламо казнетнень ютксто, конат тензэ максозельть журналистикасо эрьва кодат пелькстамотнесэ изнямонь кисэ, сон сехте питней.


2018 иень кизэсь эзь кенярдовто эйсэнек маней лембе пертьпелькссэ, тонадовозь июлень лембе читне пешксельть валонь пиземесэ. Самай се шкантень, аштемковонь 20-це чинтень, Покш Игнатбуесэ тешкстазель республикань журналисттнэнь райононь прессань фестиваленть ютавтомась. Тешкстасынек, журналисттнэнь туртов эрьва истямо тевесь кенярксов, зяро ледстнемат, теде кувать кортамот… Сень ловозь, райгазетатнень весе коллективтне бажить ютавтомс сонзэ истя, штобу аволь ансяк туевель весень мельс, седе пек соваволь историяс.
Кода содатано, се иень кизэстэнть Саранскойсэ ютасть Футболонь коряс масторлангонь чемпионатонь мачтне. Чарькодеви, пек стака ульнесь муемс истямо лув, мезесь бу дивавтовлинзе тов сыця ды се шкастонть пек ламо эрьва мезень неиця журналисттнэнь. Койсэнь, фестивальтнесэ сестэ улезетнень ютксто ламот мартон прыть ве мельс сень коряс, што Покш Игнатбуень «Восход» райгазетань коллективентень, конань прявтсо Марина Александровна Моисеева, тень теемс удалась!
Ледстневи, свал шкань казямо торжественной пельксэськак, косо коень коряс эрси ловныть «нусманя» докладт, сонензэ удалась шождалгавтомс ды теемс ёвксонь ёнов молицякс.
…Апак учо сценанть лангс лиссь Марина Моисеева корзинка марто подснежникень кочкамо. Ушосо телень якшамо чи… (сон невтсь ёвкссто саевкс). Виде, фестивальсэнть ульнесть пек ламо истят тевть, конат чуросто вастневсть лия таркасо, (кадык а саить кеж лия райгазетасо важодицятне), эдь эрьвась юткстост бажась невтемс сехте паронть. Текенень мерян, ламот прявт редактортнэнь-ялгатнень ютксто сестэ тешкстызь пек паро те лувонть.
Фестивалень койтнень-кирдатнень ютавтомань ёнкстнэнь невтемадо башка тосо ульнесь се, мезесь пек кепедизе меленек ды дивавтынзе весе тов сыця инжетнень. А стяко кортыть, масторлангсо сехте парось – парсте стувтозесь. Бути торжественной пелькссэнть минек кандымизь эйкакшпингес, ёвксонь масторс, седе тов «Ландшафтной дизайн» по-игнатовски» экскурсиядонть мейле, конась пек тусь весень мельс, чопавтимизь Советской шкантень, тердимизь «Светлячок» пионерэнь лагерев, конань пачк малав весе минь ютынек, косто кадовсть тенек сехте питней ледстнематне. Мельсэ кирдеви, валыпиземеськак сестэ аламо кинь пансинзе кудов. Мезе ансяк тосо арасель, сеть шкань койтнеде, конат течи суресэ сюлмить эйсэнек од поранть, уцяскав эрямонть марто. Пионерэнь толпандяськак, начконть лангс апак вано, удалась сестэ кирвазтемс. Те фестивальденть ледстнемань паро тешкстнэде кадовсть мазыйстэ викшнезь кескавнесь, конась пештезель костязь чайтикшеде. Сынст анокстынзе Марина Александровнань прявтсо коллективесь.
Паряк, ловныцятнестэ кияк мери, мекс истя пек кувакасто сёрмадыцясь ёвтни те фестиваленть ютамодо, конась ульнесь малав кавто иеде икеле? Тешкстаса, сестэ весемева неявсь эрьва тевенть, эскельксэнть седей пачканзо ютавтызе прявт редакторось Марина Моисеева, кода сон ризнэсь-палсь фестивалентень анокстамсто, икеле тешкстазенть топавтомсто. Сон аволь ансяк ськамонзо те тевсэнть колмо ковт лакась-псилгалесь, вейсэндинзе-кармавтынзе вакссонзо весе улезетнень ды мик раськетнень.
Ней, кавто иень ютазь, теде ледстнезь-арсезь, чарькодеви, мейсэ Покш Игнатбуесэ фестиваленть ламонень мельс пек туиця программанть содамоёвксонзо. Васняяк, ве лувсо райадминистрациянь прявтонть Татьяна Николаевна Полозова марто вейсэ важодемасонть, вейке-вейкень чарькодемасонть. Койсэнь, ламотнень мик сельмест сявадыть, кода неть кавто тейтерь-аватне Т.Н.Полозова ды М.А.Моисеева апак покшкавтне, вейке-вейкенень лездазь теить вейсэнь покш тев. Те – Покш Игнатбуень ломантнень эрямост шождалгавтомась, од инвестиционной вийтнень райононтень ве ёндо тердемась, райононь куншкакуросо ды велетнесэ асатыкстнэнь лангс ливтемась ды вейсэ сынст изнямось. Зярдо властень кирдийтнень ды прессанть ютксо ули ояксчи ды, васняяк, важодемс ломантнень лезэс мель, сестэ аволь ансяк изнявить ламо стакачитне, седеяк касы мелесь парсте важодемантень. Виде, теньсэ путовксось, кавонес аватнень: Татьяна Николаевнань ды Марина Александровнань.
Поздоровт
Татьяна Николаевна Полозова, Покш Игнатбуень муниципальной райадминистрациянь прявтось:
– Вечкевикс Марина Александровна! Те тундонь маней чистэнть пачтян Тенк поздоровт чачома чинк кувалма ды ёвтан седейстэ молиця мельспаро Корязонк. Тынь, се тейтерь-авась, кие машты вечкеме ды улемс вечкевиксэкс, кие тейсь пек кеме ды ояксчисэ эриця семия, ава, кие трясь-кастась паро тейтерь ды теевсь малавиксэкс содамонзо туртов, сырькаекс, кие эсензэ нуцьканзо туртов кармась улеме ды тееви ламо иес примерэкс, сехте паро тейтерекс ды кеме нежекс тиринь аванзо туртов. Ёвтан Тенк покш сюкпря минек ояксчинек, ютксонок вейке-вейкинь чарькодеманть, тиринь ёнксонь вечкеманть ды тесэ эрицятненень мелень явоманть кис. Тынь содасынк райононь эрьва эрицянть, эрьва эрицясь содатадызь тынк. Весе сынст ды эсень пельде арсян тенк паро, сэтьме эрямо, шумбрачи ды сюпавчи.
Георгий Грязев, «Удмуртия» издательствань прявт редакторось, Удмуртской Республикань заслуженной журналистэсь:
1985-1988 иетнестэ монень прась уцяска тонавтнемс А.А.Жданов лемсэ журналистикань факультетсэ Мордовиясто мазыйка тейтерьканть Марина Зайкина марто. Целевикень группасонть, истя лемдявсть сеть од ломантне, кить пурнавсть икелень СССР-нь союзной республикатнестэ (ней Россиянь республикатнестэ), эрьва раськень представительтне.
Мейсэ кадовсь монь ледстнематнес Марина колоньгемень иень ютазь? Те, васняяк, сонзэ эрямонь вечкемась, седейлембесь, панжадочись, куш кодамо стака шкасто лиятненень лездамо самось, ёжомарямонь кепедемань маштомась, ломанентень вандынь чинтень кемемань каземась.
Университетэнь прядомадо мейле минь сонзэ марто вестькак эзинек вастневе. Тень таркас сеедьстэ кортнетяно телефононь вельде, монень маряви, сон истя жо кадовсь мазый, вадря, паронь арсиця однокурсницакс, кинь марто вечкеви кортнемс, раксемс ды ледстнемс икелень тонавтнемань шканть…
Свал ванан сонзэ ёрокчинть касоманзо мельга. Саимим покш каштанчи ды паро ёжомарямо, зярдо маринь кенярксов куля: Мордовиянь Прявтонть Указонзо коряс М.А.Моисееванень «Мордовия Республикань массовой информациянь средствань заслуженной роботник» почётонь покш лементь максомадо. Койсэнь, Марина Моисеева тень идизе тевензэ парсте топавтозь, эсензэ коллективентень, газетантень весе шканзо ды виензэ максозь.
Ледстнемга, кадовсть тень студентэнь шкань фотографият. Веенстнэсэ сон пейди, кенярды эрямонтень, омбонстнэсэ кутмордазь ашти. Видьстэ ёвтан, сон лиякс а машты.
Вечкевикс Марина, свал кадовт истямокс, кодамокс минь, ялгатне, кить течи эрить ды важодить масторонь келес, кодамокс содатадызь , кодамо тон ульнить свал! Ёрокчи важодемасо! Кадык Пазось ванстанзат ды кази тенек вастовома, штобу минь эштё ледстявлинек студентэкс улемань паро иетнень, конатнень ютавтынек Новоизмайловской куротнесэ…
Кода кортыть удмурттнэ: «Ваньзэ умойзэ гинэ! Чебересь малпанъёсыд одно ик мед быдэсмозы! Вордскем нуналэныд!) (перевод дословный: «Всего самого хорошего! Красивые замыслы пусть исполнятся! С днём рождения!)
Весе сехте паронть! Кадык весе мазый арсематне топавтовить! Чачома чи марто!
Евгений Викторович Полушкин, Мордовия Республикань районной газетань журналисттнэнь Ассоциациянь Президентэсь, «Присурские вести» райгазетань прявт редакторось:
Республикань весе райгазетатнень ды эйсэст важодиця коллективтнень пельде ёвтатано пси поздоровт Покш Игнатбуень «Восход» райгазетань прявт редакторонтень Марина Александровна Моисееванень.
Арсетяно кеме шумбрачи, эрямосо уцяска, свал паро ёжомарямо. Кадык тынк прявтсо газетась икелепелевгак карми кенярдовтомо ловныцятнень паро кулясо, пшти публикациятнень вельде лездамо Покш Игнатбуень весе эрицятненень.
Диана Вильдякскина, тейтерезэ:
– Вечкевикс тиринь авам – лиятнень ёнов а молиця! Те тейтерь-аванть кувалма мон свал аштян мельспаросо. Сонзэ кондямо улемась – те сехте покш бажамом.
Авинем, содак, пек виевстэ вечктян, тон эрямонь нежем ды кемемам, эйсэть зярдояк а маштыця вий, косто свал амольдян превть, чарькодема жы икелев эскельдема.
Миньгак, «Эрзянь правда» газетань теицятне, вейсэндявтано неть поздоровтнес.
Марина Александровна! Арсетяно тенк кеме шумбрачи, паро уцяска, од изнявкст журналистикань а шожда тевсэнть. Икелепелевгак кадоводо вечкиця ды вечкевикс никс, мелявтыця авакс ды седейлембень казиця сырькаекс.

Паронь арсезь
Валентина Юдина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».