Мартонь 17-це чистэ Ульяновской областень Димитровград ошсо ютась «А. Ф. Юртов – эрзянь ды мокшонь раськень васенце просветитель» Регионъютконь конференциясь. Сон мольсь ошонь 2 № средней общеобразовательной школасо. Те промксонть пурнызь Ульяновской областень Просвещениянь ды воспитаниянь министерствась, тосонь эрзянь ды мокшонь раськень-культурань автономиясь. Вастовомантень сакшность тиринь келень тонавтыцятне, конат важодить те ёнксонть районтнэсэ.
Авксентий Филиппович Юртов чачсь 1854 иень февралень 20-це чистэ Уфимской губерниянь Мензелинской уездэнь Калейкина эрзянь велесэ. Ней те Татарстанонь Альметьевской район.
1872 иестэ Юртов кармась ансяк панжовозь Казанень учителень семинариясо васенце эрзянь тонавтницякс. Каникулатнестэ сон ялго яксесь эрзянь велетнева, пурнась устной народной творчествань произведеният. Седе тов Юртов кармась семинариянть юрсо мордовской училищань тонавтыцякс. Теде башка, эрзянь кельс ютавтсь церьковань ламо книгат.
1883 иестэ сон сась важодеме Самара ёнксонь (ней Ульяновской областень Новомалыклинской район) Ташто Бесовка эрзянь велень школань тонавтыцякс. Те школасонть тонавтома тевенть сон аравтызе семинариянть койсэ. А. Ф. Юртов яксиль тонавтницятнень кудова. Кортниль тетяст-аваст марто, пурныль эрзянь морот, ёвкст, содамоёвкст ды велень койтнень. Сон пштистэ вансь эрзянь тонавтницянзо мельга, вешнесь юткстост седе превейтнень ды кармавтсь тенст седе парсте тонавтнемс-содамс тиринь келенть ды культуранть.
Сонзэ покш изнявксокс ловить сень: Юртов ульнесь эрзянь велесэ тиринь кельсэ тонавтомань ушодыцякс. 1884 иестэ А. Ф. Юртов нолдась «Букварь для мордвы-эрзи с присоединением молитв и русской азбуки» эрзянь кельсэ васенце букварь.
1891 иестэ Юртов примизе священникень санонть. Уфимской уездэнь Андреевка велесэ сон панжсь колмо классонь церковно-приходской школа ды мейле теевтизе сонзэ земскоекс. Учёноесь тусь эрямосто 1916 иень маень 1-це чистэ.
2003 иестэ Ташто Бесовкань школантень максозель А. Ф. Юртовонь лемесь, панжозель мемориальной лаз, школань музейсэ покш мельсэ ванстыть сонзэ ули-паронзо – чернильницанть ды пенчтнень-вакантнэнь, конатнестэ ярсась. Велень вейке курось кандтни лемензэ. Кузоватовской райононь Кивать велень библиотекантень максозь сонзэ лемезэ. Ульяновскойсэ панжозь Юртовонь лемсэ сквер.
Вастовомантень тердезель Юртовонь нуцьказо – Анатолий Викторович Юртов, ансяк сон эзь саво.
Лембе вал марто пурнавозтненень пшкадсь Ульяновской областень губернаторонь Администрациянь раськетнень ды межконфессиональной тевтнень коряс отделэнь прявтось С. В. Паховский. Сон тешкстызе, Юртовонь путовксозо пек покш, сон ульнесь учёноекс, этнографокс, священнослужителекс, ванстсь духовной питнейчитнень.
– Тедеде А. Ф. Юртовнень чачома чистэнзэ саезь топодсть 169 иеть. Теевсь паро коекс сонзэ ледстнемга ютавтнемс регионъютконь конференцият. Истят вастовомат уш ульнесть минек областень зярыя районтнэсэ. Сонзэ лемензэ а эряви стувтнемс. Сы иестэ карматано тешкстамо Юртовонь 170 иетнень. Арсесынек, косо ютавтомс юбилеенть: Ташто Бесовка велесэ, косо школаст кандтни сонзэ лемензэ, эли Ульяновск ошонь Ленин лемсэ библиотекасо. Те чинть тешкстасынек келейстэ ды вадрясто, – кортась Ульяновской областень эрзянь ды мокшонь раськень культурань автономиянь прявтось В. А. Софонов.
Владимир Анатольевич пачтясь, областень вейксэ школатнесэ эрзянь келесь ветяви кода предмет. Арсеви лия таркатнесэяк панжомс класст, косо кармить тонавтнеме тиринь келенть.
Алкуксонь казнекс ульнесть Ульяновскоень «Эрзянь койть» ансамблянть морамозо (ветицясь А.Чурбанов), 72 № школань «Ритм» хореографиянь коллективенть киштемазо.
Паронь арсемат ёвтасть Эрзянь ды мокшонь раськень регионъютконь общественной вейсэндявксонь исполкомонь прявтось Т. И. Ларина, МР-нь Писателень союзонь правлениянь прявтось Т.П. Швецова.
– Икелень шкатнестэ Юртовдо мезтькак эзть ёвтне, эзть пачтя. Мекс? Сон ульнесь священникекс, секскак чатьмонсть. Ды ансяк 90-це иетнестэ минек учёнойтне ушодсть тонавтнеме-ванномо тевензэ. Арседея, 1884 иестэ А. Ф. Юртов нолдась «Букварь для мордвы-эрзи с присоединением молитв и русской азбуки» эрзянь кельсэ васенце букварь, – кортась Татьяна Ивановна.
Сюкпрянь сёрмасо Исполкомонть ды МР-нь Образованиянь министерстванть пельде сон казинзе областень тонавтыцятнень. Сынст ютксо – Елена Анатольевна Касимова, Димитровградонь 2№ школань прявтось, тонавтыцясь. Те эрзянь авась мельспаросо вастымизь минек. Кувака килангодонть мейле сиземаськак эзь маряво, сон теке малавикс ломань кортнесь мартонок. Эряви меремс, Елена Анатольевна чачсь Новомалыклинской райононь Ташто Бесовка велесэ, самай тосо, косо важодсь Юртов.
– Минек велесэ Юртовонь ледстнемга музеень панжицякс ульнесь Анна Фёдоровна Сударева тонавтыцясь. Сон важодсь школань прявтокс, ветясь математика ды эрзянь кель. Монень маряви, лангозонзо ванозь, эсеньгак чачсь мелем улемс тонавтыцякс. Сон ульнесь тень паро примерэкс. Школанть прядомадо мейле тонавтнинь Ульяновской педагогической институтонь исторической факультетсэ. Вейке ие важодинь Ташто Бесовкань школасо, мейле сынь эрямо Димитровградов, – ледстни Е. А. Касимова.
Истя, 2 № школасонть Елена Анатольевна кармась важодеме 1991 иестэ саезь. 2000 иестэ ладизь завучекс. Ды ней уш ие, кода роботы школань прявтокс. Школась покш, тесэ тонавтнить 1487 эйкакшт, сынь явозь колмо корпуска. Весемезэ 60 класст. Тонавтыцятнеде сядодо ламо.
– Апак сёпо мерян, минек школась вадрятнень ютксо. Тесэ пек паро коллективесь, тонавтыцятне састь тей 20-30 иеде икеле. Сынь а вешнить лия таркат, лия школат. Теке семиясотано. Улить натой тонавтыцянь династиянок. Учителень эйкакштне кочкизь тетяст-аваст кинть, кармасть улеме тонавтыцякс. А эдь педагогонь тевесь аволь шождатнестэ, сынь несть тень эсест сельмесэ. Минек школасто тукшныть ансяк кавто тувталонь коряс: эйкакшонь чачтомадо мейле декретс ды пенсияв, – мизолдозь ёвтни школань прявтось.
Е. А. Касимова вети историянь урокт. Сон тонавты 5-6-це класстнэсэ. Валонзо коряс, эйкакштнеде школасонть ламо, сон бажи содамс сынст чама лангс. Ваномс, кинь кодат содамочинзэ. Уроктне тензэ пек вечкевить ды эйсэст сон теки оймси, пурны вийть.
– Минек школасо покш мель явови тиринь историянтень, культурантень, койтненень-кирдатненень. Ветявить эрзянь, татаронь, ветькень кельтнень кружокт. Уш зярыя иень перть моли эрзянь келень кружокось, сонзэ вети Н. П. Торговкина. Чарькодеви, ошсо стака ванстомс келенть. Весе перькат кортыть рузкс. Ансяк а эряви стувтнемс тиринь келенть! Мон яла кевкстнян эйкакштнень, кодамо сынь раськень. Валост коряс, весе рузт. Кевкстян седе домкасто, кить тетяст-аваст, костонь покштяст-бабаст, сестэ ламот кепедьсызь кедест. Секскак келень ванстомадо эряви кортамс ды тень коряс важодемс эйдень кужотнесэяк, школатнесэяк, – корты Елена Анатольевна.
Сон кеместэ важоди Димитровград ёнкссо эрзянь ды мокшонь раськень культурань областень автономиянь филиалонть марто. Школасост зярыя иеть ютавтневи Раськетнень ялгаксчинь фестивалесь, косо невтевить Равчиресэ эриця раськетнень шкинемаст.
«А. Ф. Юртов – эрзянь ды мокшонь раськень васенце просветитель» конференциясь поладовсь колмо секциятнень важодемасо. Тосо эсь тевдест кортасть эйдень кужосо важодицятне, школань тонавтыцятне, образованиянь управлениянь ды раськень культурань автономиянь важодицятне.
Татьяна МАТОРКИНА