Эрзянь-мокшонь пачалксеть чай марто. Истя ушодовсь «Мордовское подворье» ресторансо Мордовиянь районтнэнь ды республикань СМИ-тнень прявттнэнь ды журналисттнэнь Российской Федерациянь Государственной Думань VIII тердемань депутатонть, «Единая Россия» партиянь генеральной советэнь ды ОНФ-нь Центральной штабонь членэнть, Госдумань аграрной кевкстематнень коряс комитетэнь прявтонь полавтыцянть Юлия Оглоблинань марто вастовомась, конань анокстызе МР-нь Журналистэнь союзось.
Депутатось евтнесь седе, мезе топавтозель сонзэ лезксэнзэ вельде 2021 иень сентябрясто саезь 2025 иень июньс ды кунсолынзе пурнавозтнень мелявкстнэнь.
"Пурнынь региононь журналисттнэнь пшти кортамонть туртов, ансяк лиссь вастовома, конась совась оймес ды ульнесь пек видекс ды панжадокс, – сермадсь Юлия Васильевна эсь Телеграм-каналсонзо. – Вастовомантень тердинь районтнэстэ ды национальной изданиятнестэ комсте ламо редакторт. Васенцеде ютавтынь карадо-каршо кортамот бизнес-завторконь форматсо ды сон пек тусь весень мельс. Евтнинь Госдумасо колмо иень перть эсь важодемадон, редактортнэ жо евтнизь эсест «сэредьксэст»: алкиньгадыть сермадстыцятнень ламочист, региононь прессась учи федеральной лезкст, од журналисттнэ бажить туемс ошов ды а велявтыть тиринь енкстнэс.
Карминек арсеме, кода неть мелявкстнэнь витемс.
Июлень 24-це чистэ Мордовиянь Общественной палатань площадкасо вейсэ О.А. Каштанов марто ютавтано покш промкс «Почта России» МР-нь УФПС-нь прявтонть Анна Дудко марто. Евтазель истя жо мель пачтнемс газетатнень ды журналтнэнь содавикс маркетплейстнэнь вельде. Неень шкане заказонь максомань таркатне панжадот малав эрьва велесэ. Мекс бу газетанть эли журналонть а рамамс вейке «клик» вельде?»
Депутатось Юлия Оглоблина истя жо тердинзе весень лездамс СМИ-тненень сынст сермадстомасо, аволь ансяк соцсеттнесэ. Прявтось, а емавтомс конев лангсо нолдавиця изданиятнень. Теньсэ бу пек лездаволь «Земский журналист» программась, конань вельде районтнэс савольть од кадрат. Седе келейстэ те кевкстеманть депутатось арси кепедемс Государственной Думасо журналисттнэнь марто вастовомасонть, конантень сон тердьсынзе минек региононь изданиятнень представительтнень.
Тешкстасынек, Юлия Оглоблинань те аволь васенце вастовома журналисттнэнь марто. Мелят сынь пурнавкшность Рузаевкань районсо Турбинтнэнь семиянь нешкепиресэ. Кортамось сестэ мольсь медень производительтнень мелявкстнэде. Тедедеяк депутатось васняяк тешкстынзе велень хозяйствасо важодицятнень мелявкстнэнь, конатне сюлмавозь паксятнень пестицидсэ ды агрохимикаттнэсэ валноматнень ды сындест мекштнень куломаст марто. Эште вейке талновтыця темась – борщевикенть изнямось.
Неть кевкстематне ды ламо лиятне, конатне сюлмавозь АПК-нь мелявкстнэнь марто, кармасть Юлия Васильевнань важодемань лувокс васняяк аграрной тевтнень коряс госкомитетсэнть. Колмо иень перть депутатонть вийсэ анокстазельть 39 федеральной законт ды 150 ламо витевкст, 10 законтнэ эште ванкшновить. Малав весе сынь велень территориятненень лездамодо. Неть кевкстематне чачсть фермертнэнь марто ды велень од ломантнень марто вастовоматнесэ. А сындест ульнесть байтяк.
Законтнэстэ васенцетнень ютксо, нама, СВО-нь ветерантнэнень ды сынст семиятненень лездамось. Лиятнень вельде лезкс карми максовомо ветеринартнэнень, велень хозяйствань прявттнэнень, велетнесэ туризманть виевгавтомантень. Неть законтнэнь вельде пштистэ ванови нолдавиця сельхозпродукциянть мельга, вешематнень колыцятненень покшолгавтовить штрафтне, седе пек сетненень, кить нолдыть ловсонь продукция ды микшнить сонзэ органической лементь ало. Те статьясонть минь тешкстынек ансяк кой-зяро законопроекттнэнь, сындест жо сатышка.
Теке марто, Мордовиясо эсензэ общественной приемнойсэ депутатось ютавтсь 70 ламо вастовомат эрицятнень марто. Сонензэ сакшность 570 ламо яволявтомат, эйстэст – 135-тне решавсть, 119 – эште ванкшновить. Мезесь сехте пек талновты весе эрицятнень: ЖКХ-нь, китнень паролгавтомань, шумбрачинь витемань, специальной военной операциянь коряс мелявкстнэ. Меельцетне башка вановт ало. Депутатось а весть вастневсь боецтнэнь семиятнень марто, решавсть кевкстематне емазь военнослужащейтнень, пандоматнень ды отпусктнень коряс.
Общественной лезксэнь максомань штабсонть Ю.В. Оглоблина марто важодить 20 лездыцят. Вейсэ мартост якасть эйкакшонь кудотнева ды сыре ломанень пансионаттнэва, ардтнесть гуманитарной лезкс марто ЛНРв, пурнасть лезкс Донбассов, Курской областьсэ эрицятненень, СВО-нь участниктнень семиятненень.
Юлия Оглоблинанень тиринь Мордовиянтень лездамось – аволь стяконь валт, эдь сон тесэ чачсь-кассь, прядызе Торбеевань районсо Жукулуг велень школанть, сон ульнесь Велень од ломантнень союзонь лидерэкс ды шкань ютазь, вадря тевензэ редязь, велень тейтерькась кассь Госдумань депутатокс. Те кись ютави эрьвантень, конасонть палы тол ды мель лездамс лиянень, зярс улить вийть.
Марина Девятова