Екатерина Башкайкина свал бажась улемс содавикс блогерэкс. Тейтересь чачсь Отяжбуень Сосуновка вишка велесэ. Велесь рузонь, ансяк тосо эрить эрзянь семияткак. 2015 иестэ Катянь тетязо-авазо стявтсть кудо Отяжелесэ. Ней эрить тосо, важодитькак тиринь енкссо.
Школасо тонавтнемстэ Катя ульнесь дока ды ламос бажиця эйкакшокс. Тейтерькась свал невтнесь ерокчинзэ сцена лангсо: ветясь концертт, киштсь-морась. Юткошкасто вечксь ловномо ды сермадомо стихть. Тенень мелень явомо кармась 3-це классо тонавтнемстэ. Весе арсеманзо-мелявксонзо тейтересь валсь коневонть лангс. Шкинемадонзо кияк эзь сода, бути ансяк лиясто, зярдо пек вадряль ежозо, ловнось эсь сермадовксонзо аванзо туртов. Тонась эйкакшонзо шнась, кармавтсь кучомс стихтнень газетав эли журналов. Катя те меленть эзь кирде.
Школань прядомадо мейле тейтересь васня арсесь тонавтнемс фармацевтэкс, седе тов мелезэ полавтовсь, ды сон кармась М.Е. Евсевьев лемсэ МГПИ-нь (ней – университет) студенткакс. Сонензэ тукшнось мельс тонавтнемс келенть ды литературанть. Теке марто авазояк филологоль. Филологиянь факультетсэ тонавтнемстэ Катя варчнесь ерокчинзэ студентэнь газетань корреспондентэкс. Газетась уш весе пурназель, ансяк теицятне эзизь нолда печатьс.
Институтонть прядомадо мейле Катя тусь эрямо Московов. Тосо ютась радиовещаниянь ды телевидениянь коряс частной школасо курсат. Ие важодсь се шкань содавикс интернет-изданиясо, анокстась интервьют Россиясо содавикс ломантнень марто, ютксост советской Эммануил Виторган актерось ды Родион Газманов морыцясь. Тейтересь ламо важодсь эсензэ лангсо, кастсь журналистэнь ерокчинзэ.
Шкань ютазь Катя чарькодсь, те важодемась аволь сонзэ коряс, ды ютась важодеме лия таркав. Сестэ жо ушодсь снимамо ды тейнеме а покш роликть эрзянь тейтеренть Московсо эрямодонзо. Сеске муевсть ваныцянзо. Истя жо Катя снимась роликть, конатнесэ ловнось эсензэ стихензэ. Те темась седеяк пек вечкевсь ваныцятненень.
Катя свал бажась эрямс покш ошсо, ансяк 2023 иестэ эрямосонзо лиссть покш полавтомат. Тетязо стакасто ормалгадсь, ды сонензэ савсь велявтомс тиринь енксов. Якась тетянзо мельга, важодсь дистанционна.
– Васня арсинь, шкань ютазь мекев Московов туян, эдь велень эрямось аволь монь коряс. Секе-тев эйсэнь талновтсь кевкстемась, кода улемс блогонть марто? Ваныцятне учить мазый ды паро контент. Арсинь, кодамо контент велесэ, бути сеят ды ципакат снимамс? Ды самай теньстэ ушодыньгак. Ваныцятне ламолгадсть сельме икеле. Велень контентэсь вечкевсь весенень, – евтни Катя.
Блогонть виевгадоманзо марто тейтеренть седейсэ кассь чачома таркантень вечкемась. Сон эрьва чи бажась содавтомс ваныцянзо тиринь енксонь мазычитнень марто. Кизэнь перть ламо шка ютавтсь паксясо: снимась норовонь урядамонть, ламо кортась комбайнертнэнь ды механизатортнэнь марто, мик тракторсояк тонадсь ардтнеме. Шкинеманть кастомга мезе ансяк а теят. Ды Катя важодсь: невтнесь Московсо эриця ды важодиця ялганзо туртов, кодамо сэтьме ды вадря эрямось велесэ, кодат важодемань вечкицят эрзянь цератне ды ламо лия мезе, мезесь сюлмавозь велесэ эрямонть марто.
– Московсо эрямсто эзинь эрсе уцяскавокс, свал ков-бути капшинь. Тосо емавтыя эрямонь алкуксонь танстенть. Тиринь велесэ жо весемесь мекевлангт. Эрьва чись кепеди меленть снимамс ваныцятнень туртов оймеежонь витиця контент. Чарькодеви, блогонь ветямось – те покш важодема. Ламот кортыть: «Стяко шка емавтнят, кинень те эряви?» Эряви сеть ломантненень, конатне важодить покш ошсо ды пек тошнакадыть чачома енксост кисэ. Совить лопазон ды оймсить, ютавтыть эсь тошначинть, – корты тейтересь.
Блогонь ветямонь салавачитне
Кода тешксты Катя, прявт салавачись – лангсот згилицятнеде (хейтерт) апелемась. Истят ломанть муевить эрьва тевсэ. Масторлангсонть эрицятнеде малав 8 миллиардт, весе минь а мольтяно вейке-вейкенек енов. Самай теньсэ уцяскась. Чачомсто Пазось эрьванть казьсы кодамояк талантсо, конань а весе чарькодьсызь. Згилицятнень туртов Катя умок уш лоткась явомо мель. Тейтересь вансты эсь прянзо, берянь валтнэнь каршо муи лембе валт. Блогерэсь тешксты, неть ломантне сэвить вадря ежонть ды мелень кепедеманть. Эрямосонть свал эряви вешнемс паро енкст.
Лия салавачись – муемс вейке вадря тема эли енкс ды важодемс лангсонзо. Ломантненень а вечкеви, зярдо тон секе-тев полавтнят контентэнть. Нама, лиясто вейке темась налкставты, ансяк блогерэнтень эряви маштомс теке жо теманть коряс невтемс мезеяк од ды лиятнень енов а молиця.
Саемга, Катя неень шкане ушодсь снимамо роликть целанек тиринь республикадонзо. Эсензэ блогсонзо евтни Мордовиянь кедьчелькевтнеде ды раськень койтнеде. Тейтеренть покш мелезэ содавтомс лия регионсо эрицятнень тиринь республикань культуранть ды эрямонть марто. Эдь Мордовиясь – мазый, покш, сюпав, ламо раськень ломанень эрямонь тарка.
Колмоце салавачись – содамс Россиянь законтнэнь. Эйстэдест байтяк, зыянонь тевень а нолдамга сындест вадря а стувтнемс.
Нилеце салавачись – мазый ды киньгак енов а молиця блогонь лемесь. Катя тень лангсо кувать эзь арсе.
– Зярдо эште эринек Сосуновка велесэ, шабрань церась лемдиль эйсэнь «мордовочка Катрин». Пек а вечкилинь, зярдо тень пшкадильть истямо лемсэ. Ней вана касынь, чарькодинь, «мордовочка Катрин» лемесь пек лади монь блогонтень, сон невти монь потмоежонть.
Ветеце салавачись – малавиксэть, конатне аштить тонь кисэ. Кецить, каштангалить, мелявтыть мартот. Лездыть теемс контент.
Эрьва блогерэнть улить эсензэ блогонь ветямонь салавачинзэ. Катя панжинзе эсензэ. Тейтересь кеми, Мордовиясо эрить ламо ероков ломанть, конатне аволь свал евтнить эсест ланга Интернетсэ, мейсэ пек ацирьгавтыть блогерэнть. Эряви теемс мекевлангт, кадык масторлангонь эрицятне содыть, кодат ероковт минсенектне.
Дока эрьва тевсэ
Кода кортыть: ероков ломанесь ероков эрьва мейсэ. Неть валтнэ пек ладить минек героинянть туртов. Катя кенери кода важодеме, истя вадрясто ютавтомо юткошканзо. Аволь умок сон кармась тейнеме штатолт. Весе эрявиксэнть рами лавкасто, штанть жо – тиринь енксонь мекшень кирдицятнень кедьстэ. Кизэнь перть пурнась цецят ды тикшеть, костинзе сынст. Ней эйсэст мазылгавтни штатолтнэнь. Важодевкс марто фототнень путни эсензэ блогс, тосо жо муевить рамсицят.
Тиринь Мордовиянтень алтась моро
Эште Московсо эрямсто Катя сермадсь чачома таркадонзо рузонь кельсэ моро.
– Моронь строчкатне чачсть важодема таркав метросо ардомсто. Ледстяса, кода ардынь оймсема парконть видьс, валгинь, озынь эзем лангс ды ушодынь моронь сермадомо, – евтни Катя.
Морось лиссь аволь пек покш, ансяк эрьва строчкантень тейтересь путызе седейлембензэ ды вечкеманзо.
Неть читнестэ Катя сакшнось Саранскоев звукозаписень студияв, косо морызе ды сермадызе эсь моронзо дискс. Арсетяно, курок блогерэсь кенярдовтсынзе ваныцянзо эсь шкинемасонзо.
Эсенек пельде арсетяно Катянь туртов икелев молема ки, од изнявкст ды свалшкань мелень кепедема!
Алена Артемьева
Фототне саезь Екатерина Башкайкинань архивстэ.