Эйкакштнень арсемань сюпавчист – фантазияст – яла покш ломантнеде седе келей. Те неяви налксема шкастояк, зярдо эйдесь налкшкетнень марто арси эрьва кодат рольть, ды лиясто сонськак тейни эстензэ налксемапельть кодамояк кедьёнкссто: нуласто, пластилинстэ, конёвсто, чувтосто ды лия материалсто.
Настя Паняева вишка пингестэ саезь тейни човалясто эрьва кодат налкшкеть ды мазылгавтомапельть. Ней Настя тонавтни Дубёнкань райононь Социалистической Трудонь Героенть Н.М. Суродеев лемсэ Поводелень школасо юнармеецэнь 10-це классо. Чачома тарказо – Кенде (Чиндяново) велесь. Настя «ВКонтакте» социальной сетьсэ вети эсензэ лопа, ков путни фотот теевксэнзэ марто. Човалясто кодамо ушодсь вишка класстнэстэ саезь технологиянь уроктнесэ. Мазый човалятне истя мелезэнзэ тусть, натой весе юткошканзо кармась алтамо те тевентень. Кавто-колмо чокшнеть, ды вана цитниця налкшкесь анок.
Настянь фототнестэ ваныть лангозот эрьва кодат човалянь ракшинеть (ашо нумолнэсь, раужо сельме коалась, каштаз марто осьминожкась, менчевиця валдо-пиже гуесь, ашо овтынесь, тюжа сеельнесь, сэнь шанжавось, киксэв мекшесь ды лият). Теезь весе ракшинетне пек вишкинеть, малав кавто-колмо сантиметрань сэрьсэ, ансяк истят мазыйть ды мельстуицят – куш кодамо эйкакшонть сы мелезэ мартост налксемс. Лангозост ванозь, маряви, эрьва налкшкенть эсензэ обуцязо, сынь вечкить эрямо ялгаксчисэ, кода теиця «азоравасткак». Настя уш икелепелев соды, кодамокс тейсы те эли тона налкшкенть. Прясонзо кирди налксемань сюжетэнтькак. Вана, киксэв мекшкезэ «ливтни» пиресэ, «озась» бархотка цецянть лангс ды тосо нурси эйсэнзэ лембе варминесь… Тейтересь пек вечки ракшат. Кудосо ули Шура псаказо, кона чоп налксевель ды кутморяволь азоравинензэ марто.
Меельцекс Настя тейсь роза марто ашо-сырнень ваза, конань арсизе сонсь. Роботась пек ювелирной. Нилешка сантиметрань сэрьсэ човалянь вазынесь неяви кода алкуксонь. Сон бу мазылгавтовлизе някань кудонь вальмалангонть. Лиясто мельтнень-превтнень сайни Интернетстэ. Ванны мастер-класст ды лия кедьчелькевтнень тевест мельга.
Эрьва тейтерьканть покш мелезэ улемс мазыекс. Теньсэ лездыть мазыльматнеяк: суркстнэ, пилекстнэ, кедькстнэ, эрьгекерькстнэ, черень чочтамкатне, юдминетне. Сынст Настя тейни сонсь аволь ансяк эстензэ, тейтерь ялганзо туртовгак. Саемга, Од иенень казнекс весе ялганстэнь кодась човалянь суркст. Сонензэ жо казнекс пельдест ульнесть човалятне. Те корты седе: эряви поладомс важодеманть седе товгак. Важодевксэнзэ сехте пек эрявкшныть Мартонь 8-це чинь кенярксчинтень, секскак сонзэ выставказо те чистэнть Дубёнкань РДК-со пурнакшнось ламо ломанть.
Анастасия Паняева, човалясто кодамодо башка, викшни утякат ды алмазонь мозаикасто пурны картинат. Зярдо тейтерьканть пурнавсть сатышка важодевксэнзэ, кармась прянзо невтнеме эрьва кодамо фестивальтнесэ. Мелят октябрясто невтизе ёрокчинзэ «Твоё искусство» Арт-центрань «Art-Star» шкинемань важодевкстнэнь раськеютконь фестивалень «Декоративно-прикладное искусство» номинациясонть. Невтезь вете важодевксэнзэ коряс сон кармась I-це степенень лауреатокс. Маныть ды мелят весе роботанзо невтезельть «Шумбрат, Мордовия!» Республиканской XXVII фестивалень выставкасонть. Човалясто мазыльматне пек тусть мельс кода од тейтерькатненень, истя сыретнененьгак. Истямо бижутериясь вечкеви весенень. «Човалятне – эрьва ёндо пек паро материал творчестванть туртов. Сон аволь питней, мазый, шождасто ды эрязасто пурнавиця. Теде башка, човалянь мазылгавтомапелесь мазылгавтсы куш кодамо оршамонть. Ансяк човалятне улест вадрят. Мон свал кодан чешскойстэ. Сон седе стака, валаня (лиятнесэ улить губорькскеть), шкань ютазьгак а олы», – ёвтни Настя. Тешкстасынек, човалясто кодамось виевгавты суртнэнь роботаст (моториканть) ды кармавты парсте важодеме пряудементькак.
Тейтеренть меельце выставказо ульнесь сентябрянь 7-це чистэ, зярдо тешкставсь Дубёнкань райононь чись ды А.П. Брагин лемсэ одкстомтозь парконть панжомась. Те покш чистэнть Дубёнкасо ульнесть ламо инжеть, конатнень ютксоль республикань Прявтоськак. Те чистэнть минь теевинекак содавиксэкс Настянь ды сонзэ аванзо марто. Ирина Михайловна тейтерензэ вечкема тевде корты истя: «Настя коды апак лотксе, весе юткошкастонзо, сонзэ те сехте мельстуиця тевезэ. Лиясто мерян тензэ: «Настя, лекстяк!» Арась, мери, монень мельспаро ваномс, мезе лиси…»
Сцена лангсо
ловнома
Анастасия Паняевань теньсэ ёрокчинзэ а прядовить. Тейтерькась сисемеце классто саезь эрьва ие Ирина Михайловна аванзо марто анокстыть «Живая классика» весероссиянь пелькстамонтень, косо 7-8-це класстнэсэ лиснесь изницякс прозань ловномань коряс районной пелькссэнть. 9-це классо тонавтнемстэ Ромодановасо кармась лауреатокс «Поэтическая лира» республиканской IV литературной пелькстамонь «Проза» номинациясонть. Ды, теде башка, ламо грамотанзо муниципальной этапонь пелькстамотнестэ. Настянень пек вечкеви сценась. Сон машты вайгельсэ виде интонациянь путомо ды ломань ёжонть домкасто невтеме.
Тейтерькась а стувтни тиринь келентькак. Февральстэ Раськеютконь келень чинтень сон ловнызе Емельян Пятаевень «Эрьвась вечксы эсь велензэ» валморонть. Дубёнкасо парконь панжома чокшнестэнть сон паро мельсэ кунсолось Андрей Бочкановонь моронзо ды натой снимась морыцянть марто ды сайсь кедьстэнзэ автограф.
Настя а ашти ве таркасо. Ней сон аноксты «Ученик года» пелькстамонтень, арси невтемс ёрокчинзэ «Творческая личность» номинациясонть. «Ули покш мелем варчамс эсь прям те аволь шожда пелькстамосонть. Тосо ёвтнян эсь прядон ды карман содамо лия участниктнень ланга», – корты тейтересь.
Династия
Эрьва ёндо истямо ёроков тейтерькась кассь тонавтыцянь семиясо. Эряви тешкстамс, сынст семиясо тонавтыцянь династиянтень – 85 иеть. Весемесь ушодовсь Настянь покштянзо лелянть Письмеров Аркадий Ивановичень эйстэ. Ине Отечественной войнань шкасто сон ульнесь лётчикекс-истребителекс. Войнадо мейле ушодсь важодеме историянь тонавтыцякс Дубёнкань райононь Орданьбуесэ. Сонзэ низэ, Елизавета Ильинична, войнань шкасто важодсь телеграфисткакс.
Войнадо мейле истя жо кармась важодеме Орданьбуень школасо. Важодсь вишка классонь тонавтыцякс. Сынст тейтерест, Вера Аркадьевна, весе эрямонзо перть важодсь Чаунзасо эйдень кужонь воспитателекс. Бабанзо двоюродной сазорозо, Лазарева Нина Васильевна, истя жо эрямонзо перть важодсь Дубёнкасо рузонь келень ды литературань тонавтыцякс. Педагогической династиянть поладызь Настянь бабанзо патязо ды ялаксозо: Письмеров Михаил Юрьевич важодсь физкультурань тонавтыцякс, Лапшаева Наталья Юрьевна нейгак важоди математикань тонавтыцякс Красина велень школасо. Настянь авазо, Ирина Михайловна Паняева, образованиянь коряс рузонь келень ды литературань тонавтыця. Те профессиянтень сон алтась малав 20 иеть. Важодсь васня Чеберчинасо, мейле – тиринь Кенде велесэ. Ней, зярдо эсь велесэ школанть пекстызь, кармась воспитаниянь коряс директоронь советникекс шабра Поводелень школасо.
Тонавтыцянь династиятне свал дивавтыть. Тесэ аламо молемс малавикстнэнь эскельксэст мельга, эряви, штобу те мелесь молезэ ойместэ, ве валсо, улезэ призваниякс. Лиякс мезеяк а лиси.
Кие соды, паряк, сы шкасто те династиянь суриненть поладсы Настяяк...
Марина Агафонова