Четверг, марта 28, 2024
Важное

Ташто Од иеденть икеле, январень 13-це чистэ, Саранскойсэ «Луч» Культурань кудосо панжовсь музей, конасонть невтневить эрзянь ды мокшонь раськетнень кудоюртонь  кезэрень курмотне-кармотне.  Сонзэ пурныцясь-сэрницясь, анокстыцясь – «Вармава» фольклорной ансамблясь. Минь уш а весть сёрмалинек те морокуродонть. Ялатеке эштё весть ёвтнесынек, мекс морокурось лемдезель «Вармавакс». Вармавась – те варманть лангсо азорава, лемесь пачкодсь кезэрень эрзятнень пельде, конатне пек вечкильть лемдемс весе пертьпельксэнть. Марсиде, нать: Паксява, Норовава, Ведьава, Вирява?

«Вармавась эрси лембекс, сэтьмекс, теке марто сеедьстэ невтнесы эсь виензэ ды норовонзо. Вармаванть эйстэ а сайсак сеньгак: сон а пели мездеяк, а ашти вейке таркасо, свал ки лангсо, свал вешни-мучки од таркат ды од тёкшт. Обуцянь истят ёнкст улить «Вармава» ансамблянь тейтертненьгак. Сынь одт, оймесэст-седейсэст лакить васов тердиця вийть. Секс ули кемема, сынст тевест туить верев, ды те морокуронть лемезэ карми гайгеме аволь ансяк Мордовиясо, весе масторонок келес ды сонзэ томбалеяк», – сёрмады Раиса Щанкина эсензэ материалсонзо «Вармавадонть».

Ансамблянть прявтось – Светлана Чернявская. Мария Майорова – «Вармава» морокуросо морыця, верьга вайгелень таргиця. Ней тесэ морыть Анна Трифонова ды Анастасия Митрофанова. Неть тейтертне самай пурнызьгак те раськень культурань  музеенть. Ды кода те весемесь топавтовсь, минь панжомадонзо икеле кортнинек музеень арсицянть Мария Майорова марто:

– Мон вишка порасто сеедьстэ эрсинь эрзянь Репскужо велесэ бабань кедьсэ ды парсте содан, кодамокс ульнесть эрзятнень кезэрень кудоюртост ды кудопотмост. Нама, шкань ютазь велетнесэяк эрямось полавтовсь, ды азораватне а эрявикс курмотнень-кармотнень кандтнизь школань, райононь музейтнес, а кой-конатне печтясть пингест кардазсо эли кудопрясо. Сынст седеесь эзь максо ёртомс шукшпряс, ды ламот, кода монь бабамгак, кирдсть эйсэст ледстнематнень туртов ды нуцькинетненень невтемс. Истя мон эйкакшпорасто токадевинь неть партнес, вакантнэс-чакштнес, нардамотнес ды лавстнес ды, касозь, карминь пурнамост ве таркинес ды весень кармавтынь сынст ванстомо. Арсян, бабань ёвтнематне-морсематне од порадонзо, икеле шкань эрямо лувдонть чачтызьгак ёжозон фольклоронь вечкеманть, ды мон молинь тонавтнеме Н. П. Огарёв лемсэ МГУ-нь Национальной культурань институтов. 2021 иестэ ялган марто пурнынек «Вармава» ансамблянть, ды тейтертнеяк сайсть мель ускомс тиринь велетнестэ таштавкстнэнь. Седе тов карминек уш яксеме экспедициява республикаванть, ульнинек Орданьбуень, Покш Игнатовань, Отяжелень, Чаунзань, Дубенкань районтнэсэ, Луховкасо, Цыганскойсэ, Саранскойсэ. Тенек лездасть весе роднянок-раськенек, покштянок-сырькаенек. Кой-кона велетнесэ тенек стякодо макснесть, кинь кедьстэ рамсинек. Истя пурнынек боцькат, кодамо стан, пряха, ташто утюгт, ухватт, иредстиця симемапелень кирдиця четвертть, пиресэ котьмамс сянгот, койминеть, сёвоньстэ теезь кедьгинеть, кринкат. Ульнинек кадозь кудотнесэяк, вейке истямо таркасто ускинек свадьбань парь ды эйкакшонь нурямо – ванськавтынек, витнинек-петнинек, артынек. Ламо пурнынек эрзянь, мокшонь, шокшонь оршамопельть, панарт, платият, нардамот, свадьбань ды калмамонь койтнес эрявикс пелькст. Вана Шугуровасто ускинек свадьбань руця, Протасовасто – лов ланга кирякстыця нурдынеть, Кульня велестэ лавсь, лишмень камбраз. Истя аламонь-аламонь пурнавськак минек музеесь. Сонензэ нупалеськак сеске муевсь, те минек репетициянь ветямо тарканок «Луч» Культурань кудосонть, эйсэнзэ 20 кавонзазь метрат. Ней тесэ аволь ансяк карматано морсеме ды невтнеме экспонаттнэнь, истя жо арсетяно ютавтнеме мастер-класст, кенярксов чить, коень-кирдань невтемат. Бути морамо карматано вишка эйкакшонь туртов морыне, сестэ озатано лавсь ваксс, бути авань моро – сестэ невтьсынек, кода сон морсесь эйсэнзэ пряхасо понань штердемстэ. Тей сыця эйкакштне, од ды сыре ломантне а кармить ансяк музеень ваныцякс, минь карматано мартост налксеме, морсеме, киштеме, эдь минек музейсэнть мереви токшемс, вадяшамс, никснемс эрьва экспонатонть. Теньсэ сон карми явовомояк лиятнень эйстэ.

А кодат мельстуиця курмот-кармот пурназь музейсэнть, ванодо Эдуард Ретунскиень фотографиятнесэ.

Марина Девятова

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».