Ицялбуень «Инсаровское» велень хозяйствань предприятиясь кармась важодеме 2008 иестэ саезь. Сон лемдезель Инсаровка веленть коряс. Хозяйствась аволь покш, видить-кастыть сюро ды ламбамо якстерькай. Аволь умок минь васенцеде пачколинек тенст инжекс. Теевинек содавиксэкс важодицятнень марто. Азорось ёвтнесь тенек, кода ушодсть роботамо, кодат мелявкст талновтсть васень шкасто ды кода аштить тевтне ней.
– Икеле те таркасонть ульнесь Мордовмелиорациянь предприятия. Састь 90-це иетне ды весемесь пекставсь-яжавсь. Кадовсть ансяк мастерской ды склад. Раминек сынст ды саинек 400 гектарт мода. Эрявсть важодицят, пурнынек коллективенек. Васенце шкастонть, нама, стакаль. Техниканок арасель, рамсинек ташто тракторт. Тунда видемстэ савкшнось вешемс-сиведемс техника ломанень кедьстэ. Те а тев. Улезэ весе эсеть. Карминек видеме товзюро ды ламбамо якстерькай. Васня варчамонь кисэ видинек 80 гектарт якстерькай. Вадря чачокшнось. Сахаронь заводось маласонок, ускомс паро. Аламонь-аламонь, минсь ушодынек рамсеме техника. Од трактортнэсэ-комбайнатнесэ производительностесь кассь, – ёвтни «Инсаровское» ООО-нь прявтось Валентин Иванович Юрченков.
– Зяро ней моданк ды мезе видтядо?
– Моданок 1600 гектарт. Тедеде видинек 600 гектарт ламбамо якстерькай, 290 гектарт кснав, 155 гектарт шуж, 250 гектарт озимой товзюро ды 290 гектарт яровойть. Урожайностесь мелень иенть коряс седе лавшо. Васня прасть кельметь, седе тов шкастонзо арасельть пиземеть, кармась пси. Летькесь эзь сато культуратненень. Кадык агротехнической тевтнень весе теинек, удобреният-мезть, ансяк менеленть марто а пелькстат. Республиканок истямо таркасо, косо пиземетне аволь покшт, эрсить аволь сеедьстэ. Саемга, обедъёнксонь регионтнэсэ тевесь лиякс ашти, тосо пек лембе ды валокшныть пиземеть, секскак урожайностест покш. Тедеде кснавось гектарсто 24 центнерт (мелят малав 50 ульнесь!), озимой товзюрось – 45 центнерт, шужось – 30 центнерт.
– Кода аштить тевтне техниканть коряс?
– Эрьва ие бажатано техниканть одкстомтомс. Ламо ярмакт тенень ютыть. Ломантненень мельспаро важодемс од техникасо. Тедеде раминек «Кировец-525» трактор, «Акрос» комбайна, видьмексэнь ванськавтомань машина, боронань колмо комплектт, алга сокиця сока. Раминек ды ладинек онкстамонь оборудования, сон сядо тоннань, теде икеле а косо ульнесь онкстамс сюро марто покш машинатнень. Мелят ниле тракторс ладинек навигация. Сон невти тракторонть видестэ ютамонть. Саемга, пек лезды паксятнень парсте видемстэ ды пургсемстэ, вадрясто невти прянзо якстерькаень видемстэ. Те шождалгавты механизатортнэнь важодемаст. Навигациясь подруливающей устройства марто, весе неяви экрансо. Трактортнэсэ улить кондиционерт. Пси шкане сынстемест а кода. Ней техниканок весе эсенек. Улить сюронь нуиця «Акрос» ниле од комбайнат, якстерькаень таргамонь «Агрифак» ниле комбайнат. Стявтынек кавто складт ды КЗС. Седе товгак арсетяно одкстомтомс материально-технической базанть, полавтомс трактортнэнь чарыст, рамамс лия эрявикс техника. Таркасонок а аштетяно, мольтяно икелев!
Кода уш ёвтынек, «Инсаровское» ООО-нь коллективесь аволь покш, тесэ ансяк 12 ломанть, юткстост 8 – механизаторт. Кой-кить важодить тетят-цёрат.
Сонсь Валентин Иванович чачсь Ицялбуень Вязники велинесэ. Тов эрямо ломантне сакшность Ламбаськестэ. Тетязо ды авазо важодсть вирьсэ, кирдсть нешкепире. Начальной классов якась Васильевкав, седе тов – Од Ицялов, конась аштесь 6-7 вайгельбень тарка. Школань прядомадо мейле тонавтнесь Н.П. Огарёв лемсэ МГУ-нь велень хозяйствань факультетсэ зоотехникекс-животноводокс. 1983 иестэ сась важодеме Кемлянь спецхозов (КРС-нь андомань коряс). Васня ульнесь заготовкань коряс прявтонь полавтыцякс, седе тов – зоотехникекс. Теде мейле тусь комсомолов. Ульнесь комсомолонь райкомонь омбоце секретарекс, инструкторокс. Шкань ютазь ладизь Пардэлесэ колхозонь председателекс. Сонензэ ульнесть ансяк 26 иеть. Те таркасонть важодсь 1987–1996 иетнестэ.
– Сестэ велесь пек покшоль. Ансяк колхозсо важодсть малав 200 ломанть, эрьва кодат специалистт. Ды кие арсесь, 1990-це иетнестэ весемесь калады… – ледстни Валентин Иванович.
Семиянзо марто сынь тусть эрямо Кемляв. 2003 иестэ сась «Победитель» колхозов. Мейле уш пурнась эсензэ предприятия ды ломанть.
Васенце читнестэ саезь мартонзо роботы агрономось Сергей Борисович Борисов. Велень хозяйствасо стажозо – 40 иеть.
– Прядыя школам, служинь армиясо, тонавтнинь Н.П. Огарёв лемсэ МГУ-нь велень хозяйствань факультетсэ агрономокс. Ушодынь роботамо «Победитель» колхозсо. Пингем перть агроном. Тевем вечкса, важодян мельспаросо. Полавтовомат ды «сюрпризт» тенек тейни ансяк менелесь. Коллективенек вадря, эрятано ялгаксчисэ ды вейке-вейкень чарькодезь, – корты С. Б. Борисов.
Сонзэ цёразо, Антон Сергеевич, важоди тесэ бухгалтерэкс. Эсь тевензэ содасы парсте. В. И. Юрченков ёвтась корязонзо ламо сюкпрянь ды шнамонь валт.
Ламо иень перть тесэ важоди комбайнёрось Николай Петрович Аксенов. Сон чачсь Октябрьский шабра посёлкасонть. Школадо мейле военкоматось кучнизе тонавтнеме Орданьбуев водителекс. Мейле тонавтнесь Ковылкинасо крановщикекс ды важодсь Ицялбуень строительной организациясо те тевенть коряс. Седе тов озась комбайнань руль экшс. Ды уш 33 иеть нуи, васня – сюро, мейле пурны якстерькай.
Геннадий Викторович Ковалёв чачсь Инсаровкасо, школань прядомадо мейле тонавтнесь Ромодановань СПТУ-со механизаторокс. Роботась «Победитель» колхозсо, каладомадонзо мейле сась тей. Важоди тесэ 2010 иестэ саезь. Сонзэ кото эйкакшонзо. Цёразо Олег ды содамозо Александр истя жо роботыть тесэ.
Цёразо, Олег Ковалёв, прядызе Кемлянь аграрной техникумонть. Важодсь Московсояк, сахаронь заводсояк.
– Мон уш 11 ие тесэ механизатор. Тунда видян сюрот-мезть, кизна пургсян удобрениясо, ушодови нуемась – озан комбайнас. Ансяк нуевить сюротне, кундатано якстерькаентень. Техниканок вадря, од. Ней вана кадовсь нуемс 150 гектарт товзюро. Ансяк эрьва чи валы пиземе, летькесь ламо, а максы пивсэмс. Кавто чить – ды нуевельть бу, – мизолдозь корты Олег Геннадьевич.
Арсетяно те вадря коллективентень маней чить, валдо менель, паро ёжо ды мелень-арсемань топавтома!
Татьяна Маторкина
Фототне
Эдуард Ретунскиень