Пятница, марта 29, 2024
Важное

Орданьбуесэ ютась Эрзянь ды мокшонь раськень вейсэндявксонь исполкомонь Президиумонь промксось

 

Исполкомось истят вастовомат ютавты  аволь васенцеде. Ве ёнов ардтнематне лездыть седе парсте редямс ды ливтемс лангс тосонь мелявкстнэнь. Орданьбуесэ те чистэнть пурнавкшность кода ёвтазь райононь, истя жо Отяжелень ды Чаунзань районтнэнь культурань, образованиянь ёнкстнэсэ важодицятне. Неть районтнэсэ эрзянь кельсэ кортыцятнеде 50 проценттэ ламо ды косо, бути а тесэ, кортамс эрзянь келенть ды культуранть ванстомадо ды сонзэ виевгавтомадо. Ансяк мезе ацирьгавты, исполкомонь Президиумонь промксонтень эзь са вейкеяк райононь прявт, весе кучизь эсест полавтыцяст. Ялатеке промксонтень пурнавкшность ламо официальной ломанть, ютксост – Мордовиянь Прявтонь Администрациянь руководителень полавтыцясь Александр Ратников, МР-нь Культурань, раськень политикань ды архивень тевень министерствань отделэнь прявтось Александр Кочеваткин, Орданьбуень райононь администрациянь прявтонь полавтыцясь Наталья Еремина, Орданьбуень ды Отяжелень Епархиянь управляющеесь Вениамин Владыкась, МР-нь Государственной Собраниянь депутатось Евгений Ледяйкин. Эрзянь ды мокшонь раськень  регионъютконь общественной организациянть пельде сакшность: прявтось Юрий Мишанин, исполкомонь прявтось Татьяна Ларина, секретаресь Татьяна Ширманкина, исполкомонь члентнэ, национальной СМИ-тнень, интеллигенциянь представительтне.

Саранскойстэ делегациясь васняяк тердезель Орданьбуень райононь краеведениянь музеев, косо невтезель мельстуиця экскурсия ды ваныцятне содавтозельть те ёнксонь историянть, ютазь шкасто эриця шкинемань ломантнень ды сынст теевксэст марто. Мейле весе мольсть Культурань кудов, косо инжетненень анокстазель кедьчелькевтнень выставка.

Промксонть панжизе Юрий Мишанин. Сон тешкстызе, неень шкасто миненек весенень эряви арсемс эсь раськень тевтнеде. Кода невтизе эрицятнень меельце сёрмадстомась, эрзятнень-мокшотнень ламочись регионтнэсэ киртявсь 50 процентс, валгсть цифратне минек республикасояк, ды тенень тувталтнэде пек ламо. Секскак ней весе вийтнень максомат регионсонть од ломантнень марто важодемантень, кепедемс од ломантнень эстраданть, сёрмадомс мельстуиця од морот, лангс ливтемс сеть од тейтертнень ды цёратнень, конатне терявтнить эсь пряст тиринь кельсэ сёрмадомасонть ды морамосонть. Кизна, августсто, Саранскойсэ ютыть ламо мельстуиця ды покш мероприятият: Россиянь Финнэнь-угрань раськетнень фестивалесь  ды Раськень культурань од ломанень фестивалесь. Сыть ламо содавикс коллективть, покш делегацият ды миненек эряви парсте невтемс прянть эсенек ёндо, секскак учотано Орданьбуень ды лия районтнэнь шкинемань ломантнень, конатненень эряви пек парсте анокстамс ды дивавтомс инжетнень.

Минкультонь представителесь Александр Кочеваткин тердинзе весень невтемс икелепелев молема эсь тевсэнть, а Вениамин Владыкась – аштемс каштанчисэ эсенек культуранть ды раськенть кувалма.

Орданьбуень райононь прявтонь полавтыцясь Наталья Еремина ёвтнесь сынст райононь культурань сферасонть этнокультурань образованиядонть. Тесэ ламо мезе тееви паро: улить краеведениянь, С. Д. Эрьзя скульпторонть лемсэ  ды Орозбиень понань кемень музейть, ламо велетнесэ улить школань музейть, районсонть роботы покш ды сюпав библиотека, тесэ важодить ламо кедьчелькев ломанть. Ансяк вейке тевесь пек ризнэвти: районсонть эрить 26 тёжат эрицят, 13 тёжатне – эрзят, а вана  раськень кельсэ газетат ды журналт ловныть ансяк 150 ломанть! Тень коряс а седе парт тевтне лия районтнэсэяк.

Тиринь келенть, СМИ-тнень  ды культуранть ванстомадо мелест-арсемаст ёвтызь МР-нь Госсобраниянь депутатось Евгений Ледяйкин, исторической наукань докторось, профессорось Владимир Абрамов, «Литова» эрзянь авань вейсэндявксонь прявтось Раиса Щанкина, «Эрзянь правда» газетань прявт редакторось Марина Девятова, «Чилисема» ды «Сятко» журналтнэнь прявт редактортнэ Елена Барцаева ды Татьяна Разгуляева, «Тюштянь налксемат» проектэнь ушодыцясь Павел Мигунов ды лият.

Юрий Мишанин, промкссонть кортамотненень цётавксонь теезь, эштё весть тешкстынзе сеть ёнкстнэнь, конатнень эрявить саемс пшти вановт алов: эрьва школасо панжома раськень музей, лездама раськень кельсэ нолдавиця изданиятненень... Тешкстынзе сеть паро тевтненьгак, конатне топавтозельть тедеде: раськень школатнень туртов тонавтомань учебниктне совавтозельть федеральной переченьс, ды сынст уш ней нолды Мордовиянь книгань издательствась. Улить сынст электронной приложениясткак. Паро куля эштё ве ёндо: весе, нать, содыть, минек республикасо  государствань ярмак лангс нолдави социально-эрявикс литература ды тедеде весе яволявтоматне топавтовить, вейкеяк книга а кадови вановттомо.

Промксонть важодема шкасто кочказельть колмо районтнэнь исполкомонь местной отделениятнень представительтне. Орданьбуесэ кармась Низовка велень средней школань директорось Зоя Клементьева, Отяжелесэ – краеведениянь музеень прявтось Галина Лебедева, Чаунзасо – тосонь школань прявтось Николай Бабуров.

Мейле ушодовсь мельстуиця концертэсь, косо тиринь ёнкстонть морост морызь велень авань ансамблятне ды весенень содавикс Артём Мамаев; эрзянь викшневкс марто коллекциянзо невтизе Надежда Володина.

Юрий Мишанин: «Исполкомонь Президиумонь промкссо ванкшнынек Отяжелень, Чаунзань ды Орданьбуень районтнэнь этнокультурань тевтнень коряс кевкстематнень. Важодемань паро лувонть марто тешкстынек ответственной прявттнэнь икеле мелявксов ёнкстнэньгак: те – раськень культурань музейтнень школатнесэ панжомась, райононь газетатнесэ эрзянь кельсэ лопатнень лиснемась, национальной изданиятнень лангс сёрмадстоманть кастомась ды целанек районтнэнь эрямо лувсонть ды весе сфератнесэ тиринь келенть кастомась-кемекстамось. Ялгат-оят, сюкпря весенень, кие ульнесь мартонок! Сюкпря А. В. Ратниковнень, Вениамин Владыкантень ды весенень, конатне тешкстызь истят ве ёнга вастовоматнень лезэвчист».

Марина Девятова

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».