Нать, а стяко вишка классо тонавтыцятнень лемдить омбоце авакс. Те алкукс истя. Зярдо эйкакшось моли васенце классов, сонзэ учить покш полавтовомат. Кода кармить молеме тевензэ школасо? Кодамо карми тонавтыцяст ды ве классонь ялгатне? Начальной классо тонавтыцянть икелеяк аштить ламо мелявкст: муемс кель-вал эйкакштнень марто, максомс паро содамочить, кирдемс дисциплинанть. Свал эряви арсемс, кода теемс уроктнень мельстуицякс.
Вана уш 27 иеть Дубёнкань райононь Кочкурвелень школасо важоди Татьяна Александровна Афонькина. Сон чачсь теке райононь Антоновка велесэ. Семиясост вете эйкакшт: ниле цёрат ды вейке тейтерь. Школань прядомадо мейле мольсь тонавтнеме Ицялонь педагогической училищав. Сеть шкатнестэ малав весе эрзянь велетнестэ од ломантне ардсть тов тонавтнеме, бажасть улемс тонавтыцякс. Седе тов заочна прядызе М.Е. Евсевьев лемсэ МГПУ-нь филологиянь факультетэнть. Кочкурвелень школасо ушодсь важодеме покш класстнэсэ эрзянь ды рузонь кельтнень, литературань тонавтыцякс.
– Васенце шкатнестэ марявсь стака. Понгинь лия велес. Ансяк макссть школанть вакссо эрямо тарка. Те пек кецявтсь. Сюкпря ёвтан педколлективентень, конась вастымим лембестэ ды мельспаросо. Эзимизь кадно, лездасть эрьва кевкстеманть коряс. Муинек кель-вал. Шкань ютазь ёмась пелемам ды талномам, – ёвтни тонавтыцясь.
Уш васенце иестэнть Татьяна Александровна невтизе прянзо «Иень тонавтыця» райононь пелькстамосо, конась ансяк-ансяк ушодсь ютамо республикасонок, кияк а содыль, мезе те истямось. Сестэ компьютерт арасельть, эрявсь весе материалтнэнь сёрмадомс-артомс кедьсэ. Конкурсось недлянь перть мольсь Дубёнкасо. Пелькстамодонть мейле тонавтыцянть разрядонзо кепедизь.
Татьяна Александровна зярыя шкань перть важодсь воспитательной тевтнень коряс прявтонь полавтыцякс. Ней уш вейксэце ие начальной классонь тонавтыця. Течи сонзэ омбоце классозо, косо ансяк кото эйкакшт: эрзят, руз ды татар. Сави кортамс мартост рузонь кельсэ. Лиясто човор, колмо кельсэ.
– Зярдо ютынь важодеме начальной класстнэс, нама, мелявтынь. Кода неть вишка эйдетнень марто улемс? Шкань ютазь чарькодинь – вишкинетнень марто сехте паро роботамс! Каршот чиить, кутморить, пейдить. Сынь а содыть, кодамо тонь ёжот, паро эли берянь. Оймест панжадо. Ёвтнить, кодат кулят кудосо, мезе од рамасть. Мартост кортамсто седееть витеви, теке мерят, эждтядызь, ды стувтовить апаротне. Эйкакшонок вадрят, кунсолыцят, явить мель уроктнес ды аволь классонь тевтнес, – ёвтни тонавтыцясь.
Тонавты шахматсо налксеме
Сонсь Татьяна Александровна эйкакш пингестэ саезь налкси шахматсо. Весе семиянек вечксызь те тевенть. Школасо тонавтнемстэ пелькстакшность шахматсо ды шашкасо налксемасо школанть ды райононть кисэ. Истя, Кочкурвелень школасо сон, кода дополнительной образованиянь педагог, вети шахматонь кружок. Тов якить эрьва кодамо иесэ тейтернетне ды цёрынетне. Ней уш эсензэ тонавтницянзо пелькстыть районсо ды сайнить изнямонь таркат.
– Шахматтнэ чарькодевить аволь эрьвантень. Мон редия, бути эйкакшонть молить тевензэ математикань коряс, сенень сеске саевить шахматтнэ. Тесэ эрявить превть, арсемс ходтнэнь. Кой-кинень весть невтьсак ды сеске чарькоди. Эйкакштне кирдить превсэ ёвтазенть. Течинь чис юткошкасто вечкан шахматсо налксеме, – корты Т. А. Афонькина.
Тонавтницянзо пряст невтить эрьва кодамо олимпиадасо ды сайнить изнямонь таркат. Саемга, Алексей Кочетков лиснесь призёрокс эрзянь келень коряс республикань олимпиадасо. Теде башка, ули ёрокчист артомасо, ламо мазычи тейнить эсь кедьсэ (поделкат).
Учебникень рецензент
Эряви ёвтамс Татьяна Александровнань лия покш тевдензэяк. Сон – 1–4-це класстнэнь туртов эрзянь келень учебниктнень рецензент. Учебникень авторось – Надежда Александровна Буянова, кона ламо иеть важодсь Ицялонь педучилищасо. Кода-бути Т. А. Афонькинанень гайневтсть Республикань образованиянь институтсто (ней те «Педагог 13.ру» тонавтомань центра) ды энялдсть ванномс весе упражнениятнень, максомс питне. Роботась стакаль.
Учебниктне сёрмадозь од программань вешематнень коряс. Эйсэст ламо упражненият, налксемат, артовкст, содамоёвкст, валмеревкст, прибауткат, конат пек тукшныть эйкакштнень мельс. Эрьва учебниксэнть невтевить стака валтнэ. Асатыкстнэ мейсэ? Икелень учебниктнесэ кой-кона валтнэ ды терминтнэ максозельть рузонь кельсэ. Ней жо ютавтозь эрзякс. Эйкакштнень марто тейнить валкскеть, тонавтнить сынст. Школав сыть – а маштыть паро ладсо эрзякс кортамояк. Те пек ризнэвти Кочкурвелень тонавтыцятнень. Сынь весе седейсэ бажить ванстомс келенть, а ёмавтомс сонзэ.
Тедеде, Тонавтыцянь чистэ, Татьяна Александровна Афонькина ламо иень перть парсте важодеманть кисэ казевсь МР-нь Государственной Собраниянь Почётной грамотасо.
Трясть-кастсть алкуксонь цёра
Татьяна Александровнань ды мирдензэ Алексей Николаевичень кавто эйкакшост. Тейтерест важоди Саранскойсэ фармацевтэкс. Цёраст школадо мейле тонавтнесь М.Е. Евсевьев лемсэ МГПУ-нь СПО-нь факультетсэ, тосто тусь служамо армияв. Седе тов, службанть прядовомсто, сёрмадстсь контракт ды тусь СВО-в. Зярдо сакшнось вишка отпускс, сон совсесь школавгак, косо паро мельсэ вастневсь педагогтнень ды тонавтницятнень марто. Лиссь паро кортамо. Эйкакштне пурнавсть перьканзо ды макснесть ламо кевкстемат. Сынь ульнесть пейдевтицят ды истят, конат талновтсть.
«Эзинь аштеве ве ёно, эрявсь молемс тов, идемс масторонок», – кортась сон. Эйкакштне казсть тензэ кедьсэ теезь самолёткеть, косо сёрмадозель: «Изнямось карми минек!».
Кочкурвелестэ кеменде ламо цёрат тюрить специальной военной операциясо. Неть читнестэяк эйкакштнень марто вастневсть сынст велень СВО-нь кавто участникть.
– Минек школасо умонь шкасто саезь кеместэ ладязь патриотической воспитаниясь. Свал эйкакштнень марто ютавттано ламо вастовомат, кенярксчить, кортамот. Икеле школасонок военно-патриотической воспитаниянть, поисковой роботанть ветясь Николай Васильевич Наумкин. ОБЖ-нь ды аволь классонь уроктнесэ тонавтницятнень марто ютавтсь строевой подготовка, тесэ весе маштыть якамо стройсэ. Маштыть куроксто калавтомо ды пурнамо автомат. Армиясо служамсто натой кевкстнить цёранок, косо сынь тонавтнесть, кодамо школа прядсть. Кучнить тосто сюкпрянь сёрмат. Эдь мезть сёпомс, неень шкане од ломантне а содыть кершев-витев велявтоманть, – кортась Кочкурвелень средней школань прявтось Валентина Шлабина.
Кочкурвелень школасо тонавтни 51 эйкакш, мартост важодить 18 тонавтыцят. Сынь весе седейлембест максыть эйкакштненень. Кастыть тевде а пелицят, лиянень лездыцят, тиринь масторонь алкуксонь вечкицят.
Татьяна Маторкина