Пятница, марта 29, 2024
Важное
 
Масторонь пертьпельксэсь – ванькс коштонь лисьмапря, кона максы тенек шумбрачи, эрямонь вийть, валдо мельть-арсемат ды эрьва чинь кеняркс.
Нама, ламот эйстэнек мерить: а косто саема неень шкане истямо ванькс коштонть, конась паролгавтовлизе ойменть ды кемекставлизе шумбрачинть?

Ялгат, ули истямо вадря тарка минек Мордовиянь Республикасо – Ицялонь райононь «Смольный» Национальной паркось!
Тосо тынь парсте оймсетядо, ёжонк паролгады, меленк-арсеманк шождалгадыть. Тесэнь ванькс коштось максы тенк шумбрачи ды кемема вандынь чинтень. Виресь, сёлттнэ ды эрькетне казить покш кеняркс ды эрямонь вийть.

«Смольный» Государственной национальной паркось ловови Мордовия Республикань федеральной значениянь ванстомань природной территориякс. Сонзэ панжизь РФ-нь Правительстванть Постановлениянзо коряс 1995-це иестэ сень кисэ, штобу кеместэ ванстомс вирень-паксянь пертьпельксэнь питней касовкстнэнь, ракшатнень, нармунтнень, лейтнень, эрькетнень, лисьмапрятнень…
Национальной паркось ашти Ратор леенть чиресэ, Ицялонь ды Покш Игнатовань районтнэнь территориясо. Покшолмазо – 365 кавонзазь вайгельбеть, конастонть 30 000 гектартнэ – касыця вирть.
Те паркось явови лиятнеде эрьва кодамо касовксонь, вирень ракшань ды нармунень видтнэсэ, конатне вастневить ансяк те ванстовиця таркасонть. Тесэ тынк учить 700-то ламо видэнь тикшеть-люкшат. Тесэнь виртнесэ эрить идем тувот, верьгизт, сёрмав оленть, сярдот, нумолот, ривезть ды ламо лия ракшат. Парконть каштанчинзэ – Моховое, Черничное, Дубовые эрькетне, «Ельничное озеро» чеядавксось, «Орлово гнездо» оймсема таркась...

Ломантненень пек вечкеви якамс «Кузнал» лисьмапрянтень. Ведесь пек кельме, ванькс, эйсэнзэ арасть кодаткак рудазов човорявкст. Лемезэ те лисьмапрянть ашти эрзянь «куз» ды «ало» валтнэстэ. Видеяк, лисьмапрянть вакссо касы пиже куз.
Тесэ истя жо муизе эсензэ мазыйдеяк мазый тарканзо кольневтемань лемензэ марто Митряшка эрькесь. Берёконзо лангсо аштить стявтозь эрямонь-аштемань ды оймсема таркат: знярыя кудынеть ды баня. Тесэ свал кецязь вастсызь оймсеме сыця ломантнень, косо сынь паролгавтсызь-кемекстасызь шумбрачист.

Неть ёвксонь мазый таркатнес эряви самс сеть ломантненень, конатне сизесть компьютертнэде ды соцсеттнеде, эдь, эряви меремс, тесэнь оймсема таркатнесэ арась Интернет… Видеяк, те пек паро оймсема тарка, косо аволь ансяк пряудемесь оймси, целанек весе рунгось.
Национальной парксонть ломантнень оймсемга ды шумбрачист витемга улить весе условиятне. «Чайка» инжень оймсема таркантень совить: инжень кудо, землянка, 5 турприютт, 50 ломаньс беседка, толбандянь пултамо тарка, палаткатнень туртов покш кужо.

Нама, те кужосонть эрьва ие сырнень сёксень шкане ютавтневи «Зелёная гитара» покш фестивалесь, кона пурны тей Весероссиянь регионтнэстэ парсте морыцятнень ды гитарасо седицятнень.
«Алатырь» оймсема таркась – те покш инжень колмо кудот весе эрявиксэнть марто. Тесэ истя жо улить кизэнь ды телень беседкат, баня.
Чуваронь карьерэсь Смольный посёлканть эйстэ ашти овсе маласо. Сонзэ содасызь весе. Вана уш кода кемень иеде седе ламо те оймсема таркась кармась улеме сехте вечкевиксэкс Мордовиянь ды шабра региононь тёжадо ламо инжетнень туртов. Ломантнень тей терди мазыйдеяк мазый, валдо-пиже тюсонь ведензэ марто эрькесь. Ламот лемдить те эрькень веденть сехте мазый таркакс весе республиканть келес. Сонзэ мазычинть тешкстыть тесэнь ашо чуварось ды перьканзо касыця пичетне.

Ванстомань территориясонть башка таркасо аштить од объекттнэ – Шумбрачинь кись (Тропа здоровья) ды Налксемань экопаркось (Игровой экопарк). «Смольный» музеенть каштанчикс лововить археологической коллекциятне. Нама, ламот арт-объекттнэ аштить масштабонь покшолмасо, невтемга, мамонтонь уропейтне ды оленень сюротне. Теске жо нетяно покш шанжавонь кодст, лабиринт, нурямо-пизэ ды ламо лия мезе.

Кемтяно, те парксонть оймсемань ды седейшкавань тев муить кода эйкакштне, истя жо покштнеяк.
Шумбрачинь янонть кувалмозо малав 2 вайгельбеть, сон явозь 8 оймсема таркас (станцияс). Те Шумбрачинь янось ашти «Алатырь» санаториянть маласо, секскак оймсицятне мельспаросо паролгавтсызь шумбрачист: тесэ ули эрьва кодамо спортивной инвентарь. «Шумбрачинь янга ютамсто» (станциятнева) тенк лезды Сувозеесь (Глухарь) – Национальной парконь ды Шумбрачинь янонь символось ды прявтось, кона оймсема таркасо (станциясо) мартонк карми кортнеме заповедниксэнть эриця ракшатнеде ды нармунтнеде.

Ней тынь содатадо, мезень кис эряви молемс Ицялонь райононь «Смольный» Национальной парков. Тосонь мазыйдеяк мазый пертьпельксэсь, парсте инжетнень вастомась, раськень тантей ярсамопелесь – весе те тынк кенярдовттадызь, кази паро мельть ды кеме шумбрачи!

Мила Богатова.
Ицялонь район
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».