Четверг, марта 28, 2024
Важное

Скульпторось, Российской Федерациянь заслуженной художникесь, Мордовиянь народной художникесь, МР-нь культурань заслуженной роботникесь, Россиянь Художествань академиянь член-корреспондентэсь, Мордовиянь Государственной премиянь кавксть ды Мордовиянь Прявтонь премиянь лауреатось Николай Михайлович Филатов ломанесь минек республикасо ды сонзэ томбале содавикс ды мельвановикс. 2012 иестэ казезь МР-нь Славань III степенень орденсэ.


Сонзэ кедьсэ теезь кеврунготне стявтозь аволь ансяк Саранскойсэ ды районтнэсэ, истя жо Россиянь ламо оштнесэ. Мордовиянь прявт ошонть мазылгавтыть Степан Эрьзянень, Александр Пушкиннэнь, Никон Патриархонтень, Феодор Ушаковнень, Семиянтень памятниктне, Мокшень-эрзянь раськень театранть – бронзасто теезь ниле фигурат – умаринань тарад марто мокшава, кедьсэнзэ кирдиця чакш марто эрзява, чувтонь нежедькс марто сыре атя ды од цёра, кона нолды кедьстэнзэ нармунь… Сынь теить ошонть лия ёнов а молицякс, скульптуратне «живойгавтыть» эйсэнзэ, казить тензэ од чачо, кепедить ёжомарямонть.

Неть читнестэ, августонь 27-це чистэ, Николай Михайлович Филатов тешкстызе покш юбилеензэ – чачома чистэнзэ 70 иетнень. Те кенярксчись покш, кармавты ламодо арсемс, васняяк, седе, мезе топавтовсь, мезе теезель. Те покш чистэнть, нама, ульнесь сонзэ эйкакшпорань малавикс ялгазо Виктор Иванович Бурнаевгак, кона содасы Филатовонь весе эрямонзо перть. Ды аволь ансяк содасы, натой сёрмады ланганзо книга, конань сон пачтизе минек редакцияв. Эйсэнзэ ламо ледстнемат Николай Михайловичень эйкакшпорадонзо, сеть шкатнеде, зярдо сон ансяк ушодыль невтеме прянзо, кода скульптор. Течи минь макстано сёрмадовксстонть зярыя пелькст, конатнестэ тынь несынк Филатовонь лия ёндо, эрзянь Поводеле велень цёрынекс, студентэкс, вишкапингень мелень-арсемань топавтыцякс.

Николай Михайлович Филатов чачсь-кассь Дубёнкань райононь Поводеле велесэ ламо эйкакшонь триця семиясо. Тетязо-авазо важодсть колхозсо. Тетязо – Михаил Васильевич – вирь ваныцякс, пек вечкиль чувто марто озямо, паро столяроль, малав весе кудонь курмотнень-кармотнень теинзе эсензэ кедьсэ. Авазо – Анастасия Ивановна, колхозсо важодемадо башка, кода весе велень азораватне, кирдсь хозяйства, трясь ракшат. Юткошкасто, кода ледстни Николай Михайлович, авазо кенярдовтыль эйдетнень чапакссто теезь налкшкесэ ды кармавтыль сынсткак тейнеме минень-сюнонь ракшинеть. А уш бути авазо паниль курник, сестэ уш верьга мазылгавтомонзо озыльть Коля ды Гриша ялаксозо. Вирьга-янга ютамсто вишка Колине неиль чувтонь чочко ды яла арсиль: сонстэнзэ бу лисевель «Бармалей» эли «Карл Маркс». Тунда Покш Сельме леень чудикерькстнэ кандыльть тинге лангов кевть, ды цёрынесь эскинесэ тоцясь васенце скульптуранзо. Кияк ялганзо эйстэ мезеяк эзь нее а мукортнестэ, а кевтнестэ, Коля жо неиль… Виктор Бурнаев арси, паряк, чувтосто-кевстэ керсемань мелесь ды докачись састь тензэ Орданьбуень Баеньбуестэ, косо чачсь ине скульпторось Степан Эрьзя. Содавикс учёноесь-историкесь Николай Васильевич Заварюхин кода-бути ёвтнесь, келя, Поводелень васенце эрицятне ульнесть самай Баеньбуестэ сазь эрзятне. Кие соды, паряк, кода-бути сюлмазельть неть кавто кезэрень родтнэ: Нефёдовтне ды Филатовтне?

Теке марто сон кассь, кода весе: а пек сэрей, келей лавтов цёрынесь. Кизна налксесь футболсо, тельня – хоккейсэ, артыль школасо стенгазетат, ульнесь васня октябрёнококс, мейле – пионерэкс, комсомолецэкс.

Васенце роботамо таркакс Коля Филатовонь ульнесь кирьпецень теема заводось. 7-це классо эштё тонавтниль, ялатеке сестэ велень эйкакштне рана ушодыльть важодеме кудоютковаяк, колхозсояк. Мейле тетязо саизе Дубёнкань РСУ-в вирень керямо. Эйкакштне тосо чувтотнень керямодо мейле ванськавтсть вирь кужотнень, пурнасть тарадт, чочкот. Поводелень школань прядомадо мейле, 1970 иестэ, Николай Филатов тусь тонавтнеме К. А. Савицкий лемсэ Пензань художественной училищав. Васняяк сонзэ саизь «вольнослушателекс» ды цёрантень савсь васенце курссонть важодемс почтальонокс, эдь стипендия тензэ эзь пандово. Ансяк тонавтыцятне редизь Николаень талантонзо ды омбоце курссонть сон уш ульнесь алкуксонь студентэкс. Тесэ жо сон вастовсь Галина нинзэ марто, кона сась тонавтнеме Волгоградсто. Шкань ютазь цёранть саизь кавто иес армияв, секскак училищанть прядызе ансяк 1977 иестэ ды… якстере диплом марто! Цёранть васенце редявикс скульптуракс ульнесь «Лишме марто цёрынесь», конанть сон теизе училищасо, шабрань эйкакшонть лангс ванозь. А выпускной роботанзо лемезэль «Мордовия в полдень». Тесэ невтезель простой эрзявань образось, конась мадсь оймсеме нуезь сюронь пултонть лангс. Кортыть, те тиринь аванзо портретэзэ. Сонзэ кисэ кучозель тонавтнеме Ленинградов (ней Санкт-Петербург). Цёрась кавто иеть арсесь, эдь урьвакстомадо мейле нинзэ марто кармасть роботамо Саранскоень художественной школасо, ды ансяк 1979 иестэ мирдть-нить Филатовтне тусть Нева леенть чирев. Николай Михайлович ушодсь тонавтнеме И. Е. Репин лемсэ Ленинградонь Художествань академиясо, профессоронть, СССР-нь народной художникенть В. Б. Пинчуконь мастерскойсэ, конань истя жо прядызе «на отлична». «Лесник» дипломной скульптурантень образонть сон таго саизе тиринь ломанензэ – тетянзо эйстэ. Те важодевксэсь мейле невтезель Всесоюзной выставкасо ды пурнась ламо паро мельть-арсемат.
1984 иестэ, тонавтнеманть прядомадо мейле, Филатовтне велявтсть таго Саранскоев, ды Николай Михайлович кармась Ф.В.Сычков лемсэ художественной училищань тонавтыцякс, косо роботась 2003 иес. Сестэ сонзэ тердизь роботамо Н.П.Огарёв лемсэ МГУ-нь национальной культурань факультетэв дизайнэнь ды рекламань кафедрав, конанть марто а яви течинь чис.

Николай Михайлович Филатов вечки важодеме бронза, гранит, гипс ды сёвонь марто. Сонзэ роботатне ванстовить Смоленскоень, Белгородонь, Тулань областень Узловая ошонь картинань галереятнесэ, Мордовиясо С.Д.Эрьзя лемсэ музейсэ, частной коллекциясо ды ламо лия таркасо.
Чачома чи марто!

Поводелень эрицятнень, вейсэ школасо тонавтницятнень ды эсензэ пельде лембе валт Н.М. Филатовонь чачома чинзэ кувалма ёвты ялгазо, Поводеле велень ветеранонь советэнь прявтонь полавтыцясь майорось В. И. Бурнаев:

«Мельвановикс Николай Михайлович! Седейшкавань поздоровт тонеть, кода эрзянь раськень ине цёрантень, земляконтень, тиринь ёнксонь верев кепедицянтень ды Мастерэнтень! Сибирень шумбрачи теть, паро эрямо семиясо, од изнявкст шкинемасо (творчествасо) Мордовиянть ды Россиянть лезэс. Вечкема теть ды покш уцяска!»

 

Николай Михайлович Филатов содавикс кода скульптор аволь ансяк покш кеврунготнень коряс. Сонзэ улить вишка теевксэнзэяк, конатнесэ невтезь минек республикань содавикс ломантне ды, нама, тиринь Поводеле велень эрицятне. Сон теинзе артыцянть Н. С. Макушкинэнь, сказительницанть С. М. Люлякинань портретэст, колхозонь стадаваныцянень, од механизаторнэнь, тейтерька марто полицейскойнень кеврунготнень… Кой-конатне эйстэст ванстовить Дубёнкань краеведениянь музейсэ. Улить сонзэ истят теевксэнзэяк, конатнеде а мереват кеврунго. Весе содасызь Тысячелетиянь площадьсэнть аштиця покш кевенть, конась кармась инжетнень ды эрицятнень туртовгак географиянь содамочитнень кастыцякс. Те карта, косо невтевить эрзятнень, мокшотнень ды лия финно-угрань раськетнень эрямо таркаст.

Башка тарка Н. М. Филатовдо сёрмадовкссонзо, конась, тешкстасынек эштё весть, кандызе редакцияв Поводеле велень эрицясь, эйкакшпорань ялгазо В. И. Бурнаев, саи таркась, косо сон ёвтни скульпторонть семиядонзо. Галина Алексеевна нинзэ истя жо шкинемань профессиязо. Сонзэ кедьсэ станковой теевкстнэ а весть невтезельть минек масторонь художественной выставкатнесэ. Сон тонавтыця, важодсь Н. П. Огарёв лемсэ университетэнь Национальной культурань институтсо, 1-це № эйкакшонь художественной школасо.

Николай Михайловичень ялаксозо, Григорий Михайлович, – Мордовиянь заслуженной художник, истя жо ульнесь скульпторокс (аволь умок сон тусь эрямосто), сонзэ васенце лездыцякс, кунсолыцякс, чарькодицякс. Вейсэ сынь тейсть зярыя кеврунгот, ютксост С.Д.Эрьзянень скульптураськак, конась ашти изобразительной искусствань музеенть икеле. Григорий Михайлович роботась мрамор, бронза, гипс, сёвонь марто. Сонзэ сехте содавикс скульптурной композициянзо стявтозь А. С. Пушкин лемсэ парксо ды Саранск ошонь ульцятнесэ. Неть: «Кот учёный на цепи», «Старик со старухой у самого синего моря», «Старуха Шапокляк с крыской Лариской», «Поцелуй», «Дворник с метлой», «Сантехник»… Сон тейсь ламо кеврунгот Ине Отечественной войнань солдаттнэнень Мордовиянь районтнэсэ.
Филатовонь цёранзо, Александр Николаевич ды Сергей Николаевич, тусть тетяст-аваст киява ды поладызь Филатовтнень династиянть. Сынь прядсть Саранскоень художественной училища. Александр Николаевич эштё ИНК-нь дизайнэнь отделения. Сон кармась соавторокс тетянстэнь просветительтненень Кириллнэнь ды Мефодийнень, философонтень Михаил Бахтиннэнь памятниктнень теемстэ. Сергей Николаевич прядызе С. Г. Строганов лемсэ Московонь государственной художественной академиянть. Эри масторонь прявт ошсо ды роботы монументальной ды станковой скульптуратнень марто.

Николай Михайлович Филатов ломанесь аволь сельмс эциця, сон ульнесь ды нейгак кадовсь, кода мерить, простой эрзянь ломанекс, «тештекс» прянзо а мари. Мастерскойсэнзэ сядо дипломтнень ды казнетнень вере сёрмадозь истят валт: «Мон истяман, кодамо улян, бути те тенк а вечкеви, эсь прям полавтомо а карман». Николай Михайловичень обуцядонзо корты вейке историясь. Сась тензэ вейке содавикс «ожо прессань» журналист ды бажи сёрмадомс скульптордонть «рестазь материал». Тонась каршо валт максы а мельсэ, нурькинестэ. «Марятадо-арась тынь эсь прянк алкуксонь скульпторокс?» кевкстеманть лангс Филатов тешкстызе: «Мон эсь прям алкуксонь скульпторокс а марян. Эрян-эрян, ялатеке кавтолдоматнеде эсь прядонть, кода художникте, иеде иес седе ламо. Икелев ульнесь седе шожда: зярдо а пек ламо чарькодят, седе прят каштансто марят».

Тешкстама, Николай Филатовонь лемесь кармась содавиксэкс 1995 иестэ, зярдо яволявтозель кеврунгонь теемань конкурс С. Д. Эрьзянь 120 иетнень топодеманть кувалма. Сестэ ниле эскизтнэстэ изнясь Филатовонь арсевксэсь. 2000 иестэ скульпторось тердезель А.С. Пушкиннэнь памятникень тееме, конась ней содавикс весе Россиянть келес ды ашти Саранскоень Фонтанной валгомасонть. Сонзэ ваныцятне иетнень перть валдомтызь бронзасто теезь Пушкинэнь кедькоморонзо, келя, истямо шумбракстнемась канды уцяска ды натой леци вечкемань коряс ризнэматнеде. А весе содыть, икелепелев кеврунгонть эскизэсь арсезель лиякс: Пушкинэнь ульнесь комавтозь прязо ды кедензэ кепедезельть кутьмерес. Филатов чарькодсь, те скульптурась седе лади козоньгак калмолангс, аволь ошонь гайтев ульцятнес, ды, киньгак апак кевксте, полавтызе поэтэнть чачонзо.

Мельстуиця историят сюлмавозь Никон Патриархонтень ды Феодор Ушаков флотоводецэнтень памятниктнень марто. Никононь лия вете скульптортнэ несть теке пазавасо ликекс, пульзядо озныцякс. Филатов арсесь невтемс сонзэ истя жо государственной деятелекскак. Те ёнксось пек вечкевсь московонь комиссиянтень ды сынь ве мельсэ максызь вайгелест сонзэ кисэ. Феодор Ушаковнень памятникенть коряскак ульнесть арсемат: эли невтемс сонзэ православной ине ломанекс, эли адмиралокс? Верде комиссиясь ловизе истя: васняяк сонзэ лемесь кармась гайнеме, кода воинэнть, ды секскак ней иневанькс праведной Феодор Ушаков ашти Саранск ошонь ульцясонть орден марто мундирсэ, шпага ды надзорной труба марто. Те скульптуранть теемстэ Филатов а весть якась Севастополень музейтнес, библиотекатнес, штобу седе видестэ невтемс се шкань военной форманть ды наградатнень. Истя уш лиссь, неть кеврунготне иеде иес седе покшолгадсть. Пушкиннэнь кеврунгонть сэрезэ – 3,2 метрат, Никоннэнь – 3,7 метрат, Ушаковнень – 4,2 метрат. Дивань тев – истямо сэрей роботатнень стенкатнень эчкест 1 сантиметрадо аламо. Н. М. Филатовонь аволь умонь роботатнестэ тешкставлинек Кочкурбуень Семилейсэ военно-исторической композициянть. А те кизэстэнть сон ушодсь тееме С. Д. Эрьзянь лемс од кеврунго. Кодамокс сон карми, зярс скульпторось а ёвтни... Арсетяно, те тагояк карми Мастерэнть од шедевра!

...Дубёнкань райононь Поводелень велень эрицятне пек вечксызь эсест землякост, кирдить покш каштанчи сонзэ кувалма ды пурныть вайгельть, штобу каземс Н. М. Филатовонь «Почетный гражданин Дубенского района» лемсэнть. А эштё тесэнь школасонть эйкакштне учить вастовома мартонзо. Ули покш мелест сельмеде сельмес кортамс, кевкстнемс, ды кие соды, паряк, теде мейле тесэ чачи од скульптор, С.Д. Эрьзянь ды Н.М. Филатовонь тевест поладыця?

Марина Девятова
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».