Валентина Александровна ды Сергей Петрович Бединтнэнь сёвонень налкшкест аволь васенце ие пачколить «Шумбрат, Мордовия!» республиканской фестивалентень-пелькстамонтень, косо жюрись сыненст свал максы покш питне. Истя жо кедьчелькевтне свалшкань инжеть райононь, республикань, регионъютконь ды весероссиянь выставкатнесэ. А весть казезь грамотасо, дипломсо, сертификатсо. Налкшкест ютксо а муят кавто вейкеть: эрьванть эсензэ историязо ды башка чачозо.
Сергей марто Валентина тонавтнесть вейсэ васня художественной училищасо, конанть прядомадо мейле, 1986 иестэ, ушодсть важодеме Комсомольскоень художественной школасо. Шкань ютазь заочна прядызь М. Е. Евсевьев лемсэ педагогической институтонь (ней – университет) «Педагогическое и художественное образование» отделениянть. 2013 иестэ дипломной важодемаст анокстасть сехте вечкевикс педагогост лездамонзо вельде, конань марто сынь те шкас кирдить кеме сюлмот. Те – педагогической наукань кандидатось, художественной образованиянь кафедрань прявтось Валерий Амбарцумович Варданян.
Сергей Бединэнь чачома-касома тарказо – Чаунзабуень Комсомольский посёлкась, косо сон эри весе пингензэ перть. Сергей Петровичте тесэ кортыть ансяк паро ёндо – сырнень кедь ды чевте седей ломань, ёроков артыця, кона теи аёвтавикс мазычи. Валентина нинзэ муизе училищасо тонавтнемстэ.
Валентина Александровна чачсь Сибирьсэ, Красноярской крайсэ. Ансяк ундоксонзо Дубёнкань райононь: покштязо ульнесь Орданьбуень, а бабазо – Дубёнка велень. Нать, се васоло шкатнестэ ламот тукшность Сибирь ёнов вадря эрямо таркань вешнеме. 1963 иестэ семияст велявтсть одов Мордовияв. Эрямо кармасть Рузаевка маласо Пайгарма велесэ. Рузаевкань школанть ды художественной училищанть прядомадо мейле, косо вастызеяк вечкевиксэнзэ, Валентина лиссь мирденень ды кармась эрямо Комсомольский посёлкасо. Мирдть-нить важодить тесэнь Эйкакшонь художественной школасо изобразительной искусствань ёнкстнэнь тонавтыцякс. Сергей Петрович тонавты «рисунок» ды «станковой композиция», Валентина Александровна – «живопись» ды «керамика» дополнительной образованиянь программатнень коряс.
Весть Пензенской областень Спасск ошсо ютась сёвоньстэ теезь вешкемань пелькстамо, косо Валентина сайсь 2-це тарка. Сон анокстась вешкема «Сияжар» поэманть коряс. Те тевесь истя тусь мелезэнзэ, натой теде мейле выставкатнес мирдензэ марто свал кармасть анокстамо сёвонень техникасо теезь налкшкеть. Ды вана уш кода кемень иеть мирдть-нить котьмить гончаронь тевсэнть. А кода лембестэ Валентина Александровна корты вечкема тевдензэ! Кунсолат эйсэнзэ, теке мерят, тонськак ёвксос чопавтят. Вана кода сон ёвтни сёвонень Куйгорожтонзо:
– Вера Васильевна Ковалёва тень те меленть ёвтызе. Кевкстни, эзить варчне сёвоньстэ ичемс Куйгорожонть? Мерян, зярс эзинь, кода ловнынь ланганзо, сон аволь паро персонажось – кежей. Ды сестэ мон кадыя те меленть, мезеяк эзинь тее. Шкань ютазь арсезевинь, а мекс тензэ эряви улемс кежеекс? Мон сонзэ тейса вадрякс. Кадык карми чевте седей. Бути арсемс, сонзэ обуцясь прок явови кавтов – эрси вадрякскак, берянекскак. Берянекс сон зярдо эрси? Зярдо прядови важодемазо. Лисни, сон апак лотксе кармавты важодеме. Вана миньгак апак лотксе важодтяно – ули эсенек кудонок, ракшанок, эмежпиренек, кавто теплицанок… Секскак мон сонзэ теия вадрякс, чевте седеекс – кандоволь кудос аволь ансяк паро – ванстоволь берянде ды шумбралгавтоволь, мезень кис карксамосонзо тикшеть кандтни.
Алкукскак, лангс ваномс Валентина Александровнань Куйгорожозо теезь пек важодицякс – берёмасонзо кудов пенгеть канды, карксамосонзо, тикшеде башка, ярмак кескавне понгавтозь… Лисни, шказо лекстямскак арась, чоп ансяк важоди, секскак берянь тевть а кона шкане тензэ теемс.
Выставкасонть, теде башка, ламо эрьва кодат эрзянь оршамосо саразкеть. Ды вейкеськак а моли лия «сазоронзо» ёнов. Кевкстинек, мекс сынь истят авейкеть?
– Вейкеть налкшкенек зярдояк а эрсить. Лиясто рамить кедьстэнь саразке ды вешить омбоце истямо теемс. Мерян, сон лия лиси: ичемстэнзэ сы мель кодаяк лиякс сонзэ теемс, ды кедтне сынсь «оргодить» мельтнень мельга. Монь ламо эрзянь оршамосо сёвонень саразкень ды весе сынь аволь вейкеть. А вана ули саразкем, конань «наряжия» «Мерема» ансамблянь прявтонть Катя Модинань костюмс. Кода васенцеде неия сонзэ сцена лангсо, пек мелезэнь тусь оршамозо. Мон пек вечкса те аванть, сон истямо ёроков, зяро сон теи, те кодамояк валсо а ёвтави! Кода сон парсте содасы историянок, кода кисэнзэ ризны ды бажи невтемс ломантненень. Кода сон сцена лангсо прянзо мари ды вети! Алкуксонь ветиця, мельганзо ули мель молемс. Истят ломантненень эрявияк улемс руководителекс… Вана истят мельтнеде мельга чачи эрьва образось…
Вана нармунень семия, конась моли ломаненсенть ёнов: авась – модница, «эйкакштонзо» вейкесь кирди сокс, омбоцесь – кирякстнемапель, лиясь – мороженой. Весе прок лиссть ушов телентень кецнеме.
А вана кода сась Валентина Александровнань превс теемс лия нармунень семиянть. Ве шкасто, ловт, весе саразост ушодсть нарвамо ды эрьвась ливтсь ципакат ков понгсь: кона покш сэрей пизэс, кона видьстэ мода лангс. Пизэсэ аштицясь ливтсь 12, модалангонсесь – 4 ципакат. Ды истя лиссь мель невтемс, ципакатне лисить истяяк, лиякскак…
Лия налкшкесь – ашо сёвоньстэ теезь эрзянь ава. Скульптуранть лемезэ «Моро». Искусствань школань программань коряс эрявсь теемс эрзявань образонть. Ды эйкакштне энялдсть тонавтыцяст невтемс, кода сонзэ теемс. Сонзэ кедь алдо лиссь сёвонень истямо скульптура. Валентина Александровнань вейксэ тонавтницянзо, лисни, ней вейксэ истят эрзянь авинеть школасост кармить улеме. Шкань ютазь, зярдо прядовить костямо ды артома тевтне, эйстэст лиси алкуксонь «хор». Тешкстама, ашо сёвонесь ускозь Дивеевасто. Лиясо маласо косояк истямо арась.
– Дивеевадо башка косто сайнетядо сёвоненть?
– Важодеманть туртов микшневи Рязанень сёвонесь, конань пек сеедьстэ рамсетяно. Теде башка, Дубёнкасо ули кирьпецень завод, косто энялдынь ускомс ниле видэнь сёвонь. Вейкесь эйстэдест кирди 1200 градуст температура, сонзэ кочкинекак кеме скульптурань теемс.
Тюжа фигуркатне теезь «молочение» (ловсос навамо) техникасо: васенце костямодо мейле налкшкетне нававить ловсос, максови тенст шка коськемс ды омбоцеде путовить пси каштомс. Лиси истямо тюжала ланго. «Чайная церемония» япониянь мотивтнень коряс теезь подносось, чашкатне ды пиалатне вельтязь куловонь глазурьсэ. Лисни, неть кедьгетне ютасть колмо костямот: васня костяви сонсь скульптурась, мейле куловсо вельтязесь ды глазурьсэ вельтязесь.
Валентина Александровна паро мельсэ тонавтни налкшкетнень историясткак. Саемга, алашине-вешкемазо теезь белорусской налкшкетнень коряс, конась муезель Могилёвской Поднепровьень калмазыртнесэ ды кандови XVI пингень налкшкетненень, сон пек парсте вешки. Неть ды сёвонень лия алашинетнень марто сон якась мастер-классос Московов.
– Валентина Александровна, тынь велень ломанть. Косо тейтядо налкшкетнень? Паряк, ули кодамояк башка тарканк тень туртов?
– Минек ули панжадо веранданок. Зярдо ульцясонть пси, тосо ичемс сёвонь пек вадря. Калиця чинть ало мезеяк а тееват, те вечкема тевесь жо максы оймамо, паро ёжо, валдо мельть-арсемат. Самай те верандасонть «чачстькак» весе неть налкшкетне, конатнень течи ускинь мартон. Зярдо састь экше читне, совинек кудов: паникудосонок ашти кругловой покш столь, самай сонзэ экшсэ важодтяно. Теде башка, минек кудонок вакссо, эсенек юртсонть, ули таштыне кудо. Зярс эзинек пек сыредть, арсетяно тосо ветямс витнема-петнема тевть ды ютамс важодеме тов. Арсян те тарканть теемс мастерскоень кондямокс. Теде башка, минек таштавсть ламо кезэрень курмот-кармот. Паряк, а покшке музейгак пурнатано, ансяк тень туртов эряви ламо мезе теемс. Минек жо эли шканок а сатны, эли ярмакт аламо…
Костятано теевкстнэнь школасо. Кудосо зярс истямо каштомонок арась, ансяк мельсэнек ули теемс истямонтькак. Мирдем – сырнень кедь ломань, кода пенсияс листяно, ды бути Пазось мери, тейсынек истямо каштомонтькак. Нама, сыречись эйсэнек сасы, курок а карматано роботамо, ансяк вечкевикс тевенть паро мельсэ поладовлинек. Эдь лепамось леци, шумбралгавты рунгонть. Лиясто стардсамам кодамояк ризкс, прям стакалгады, мон ушодан сёвоньстэ налкшкень эли лия мезень тееме. Ды сеске оймесэнть истямо паро тееви. Секскак те тевесь монь иди эрямонь эрьва кодамо стакачитнеде.
Марина Агафонова