«Саранский элеватор» ООО-со неень шкане моли сехте пси шкась. Паксятнестэ ускить нуезь сюронть. Тесэ сонзэ ванкшносызь, кочкасызь, костясызь ды кармить ванстомо. Элеваторось сови «Мордовское агропромышленное объединение» ООО-с, конась вейсэнди республикань велень хозяйствань зярыя предприятиятнень. Сонзэ прявтсо важоди Николай Геннадьевич Салмов. Кода течи роботы Элеваторось, кить тесэ важодить, теде тенек пачтясь предприятиянь прявтонь полавтыцясь Андрей Викторович Тикшайкин.
– Тедеде весемесь ашти ушонть эйстэ. Сеске рединек, урожаесь мелень иенть коряс карми седе аламо. Васня майстэ прасть кельметь, седе тов сась псись, мейле ютасть покш пиземеть. Весе те токшизе сюронь кенереманть. Сюронь нуемась моли куроксто, хозяйстватне кенярдыть эрьва маней чинтень. Те иестэнть урожаесь МАПО-нь паксятнесэ – 35–45 центнерт гектарсто. Сюронь нуемась ушодовсь июлень 13-це чистэ ды поладови седе тов. Васенце партиятне ульнесть коськеть. Чизэнзэ тенек усксть малав 1800 тоннат. Пиземетнеде мейле сюронь летькесь кармась 17–20 %. Ней Элеваторсо виевстэ важодить вете костямкатне (сушилкатне). Костямодо мейле путсынек ванстомо. Минек ули производственной корпус ды сюронь ванстома тарка. Сюро ускить ниле районсто: Отяжелень, Ицялонь, Ромодановань ды Лямбирень. Те весе хозяйстватне, конат совить МАПО-с. Ускить яла Чувашиянь «КиПиАй» агрохолдингстэ. Тедеде хозяйстватне а кирдить сюрост тинге лангсо, сеске ускить Элеваторс костямо ды ванстомо. Течис саинек 20 тёжат тоннат сюро, Элеваторс жо кельгить 70 тёжат тоннат. Неень шкань комплексэсь важоди кода автомобильной, истя ЖД-транспортонь автоотгрузканть лувсо, – пачтясь Андрей Викторович.
Андрей Тикшайкин чачсь Отяжбуень Ламбаське велесэ, кассь Отяжеле посёлкасо. Школадо мейле прядызе Н. П. Огарёв лемсэ МГУ-нь Аграрной институтонть. Элеваторсо ютынзе важодемань весе кузтеминетнень, роботась подъёмниксэ, лабораториясо, цехсэ.
Тесэнь лия важодицятнеяк роботыть зярыя иень перть. Саемга, прявт инженерэсь Вячеслав Александрович Исаев уш комсь иеть Элеваторсо. Н. П. Огарёв лемсэ МГУ-нь Аграрной институтонть прядомадо мейле сон сеске сась тей. Васня ладизь ведьгевень оборудованиянь наладчикекс (сестэ ульнесь ведьгев), седе тов ведьгевень прявтокс. Предприятиясь кармась стявтомо сюронь ванстомань покш тарка. Сон ульнесь стройучасткань мастерэкс, прорабокс. Важодсь механической цехень мастерэкс, прявт механикекс ды уш кемгавтово иеть прявт инженер. Сон ванкшны промышленной безопасностенть ды оборудованиянть мельга. Эряви меремс, оборудованиядонть тесэ ламо. Сюронь ванстома таркасо аштить 18 силост, косо самай кирдеви сюрось. Эрьвантень кельги 3-4 тёжат тоннат сюро. Малав иень перть ванстови сюрось. Од нуема шкантень весе силостнэ чамить ды сынст анокстыть одс.
Михаил Иванович Шулгин 2013 иестэ саезь Элеваторсо важоди прявт механикекс. Сон чачсь Отяжбуень Таразбуесэ. Школадо мейле прядызе Н.П. Огарёв лемсэ МГУ-нь Механикань ды энергетикань институтонть «инженер энергообеспечения предприятий» специальностенть коряс. Саранскоень элеваторсо весе транспортной, костямонь, ванськавтомань оборудованиясь ашти вановтонзо ало.
Башка валт эряви ёвтамс лабораториядонть. Самай тесэ вастыть сюро марто машинатнень. Ванкшнови летькечись, шукштне, иляст уле ормат-порицят. Пробоотборщиктне ванкшныть сюронть, иляст уле унжат-мезть, кодамо белокось. Ёвтыть, ков каямс сюронть седе тов. Теде мейле машинась лотки онкстамо лангс, сюрось онкстави. Лабораториясонть жо теевить эрьва кодат анализт. Прибортнэнь вельде сюрось ванкшнови седе домкасто ды парсте, кодамо качествась, кодамо клейковинась ды седе тов.
Аволь умок лабораториянь прявтокс ладязель Ольга Алексеевна Москаева. Сон важоди тесэ уш 18 иеть. Чачсь Отяжбуень Дюрькина велесэ. Школань прядомадо мейле тонавтнесь Н.П. Огарёв лемсэ МГУ-нь филологиянь факультетсэ. Специальностень коряс важодемс эзь лисе, ды тейтересь сась Элеваторов. Ушодсь роботамо лаборантокс. Шкань ютазь Аграрной институтсо ютась квалификациянь кастомань курсат. Мейле ладизь технологокс.
– Ледстнеса, васенце тевем ульнесь сюротненень анализэнь тейнемась. Эряви меремс, товзюрось ды шужось ванкшновить башка. Сестэ ускильть тенек пиянь пидемс шуж. Сёксня – рапс.
Течи лабораториясонть важодить сисем ломанть. Ды самай ней важодемась тесэ моли чинек-венек, оймсема чивтеме. Чарькодеви, сюрось чачи эрьва кодамо. Эрьва иестэ лия. Те ашти сень эйстэ, кодамо ушось, сортось ды кода нуи комбайнась. Тесэ ванстовиця костязь сюрось карми ванкшновомо ламо параметрань коряс свал, тельняяк, тундаяк. Коштось илязо полавтово, покшолмазо улевель вейке. Илязт пра сюронть лангс порицят-унжат. Кшнинь силостнэс седе сеедьстэ нолдыть кошт, чувтонсетнес седе чуросто. Ней ванстома таркатнесэ улить датчикть. Термометриясь ванкшнови компьютерсэ, – ёвтни Ольга Алексеевна.
Лаборантокс важодить Ольга Владимировна Кожевникова ды Нина Константиновна Иркаева.
– Минек тесэ трудовой династия. Элеваторсо 36 иеть важодсь тетям – Владимир Павлович Бекренев. Авам – 11 ие. Мельгаст сынек миньгак Сергей ялаксом марто. Минек мельга састь эйкакшонок. Сергеень цёразо, Владимир, роботы сушилкань операторокс. Омбоце цёразояк роботась тесэ. Ирина тейтерем – весовойсэ. Кемтядо, кодамояк лия таркав арась мель туемс. Важодемам вечкса, эрьва чи сакшнан паро мельсэ. Коллективенек вадря, теке вейке семия, теевинек паро ялгакс. Ламот эйстэнек сынек тей роботамо ве шкасто ды кадовинек. Минек эйсэ ламо тонавтсь сестэнь лабораториянь прявтось Зинаида Васильевна Мишина. Сон важодсь 40 иеть, ней уш тусь эрямосто. Неень шкане полавтовсь оборудованияськак. Икелень шканть коряс а мезть кортамскак. Важодемс седе шожда, весемесь ули. Мелявттано ансяк, од ломанть а капшить самс роботамо, бути ансяк кизна, каникулань шкасто, студентт. Паряк, маряви тенст стака, кие соды. Вана ней сменасо важодтяно, кадык а шожда, ялатеке минь свал учотано сюронь нуема шканть, – мизолдозь ёвтни Ольга Владимировна.
Сонзэ валонзо поладынзе Ольга Москаеваяк. Мирдезэяк тесэ важодсь, ней Максим цёразо роботы подъёмниксэ машинистэкс. Ды ламо лия малавиксэнзэ важодсть Элеваторсо. Предприятиясонть ней роботыть 50 ломанть. Кизна штатось келейгады, саевить нурька шкас важодицят.
Элеваторсо тенек невтизь производственной ташто корпусонть, конась стявтозель натой 1914 иестэ. Сон важоди те шкас, тов кельгить кемень тёжат тоннат сюро. Сави ансяк дивсемс, кода маштсть стявтомо-тееме кезэрень шкатнестэ!
Татьяна Маторкина
Фототне Эдуард Ретунскиень