Пятница, марта 29, 2024
Важное

 

Тедедень июлень 9-це чистэ Мордовия Республикань Покш Игнатбуень Чукало велесэ юты Раськень озкс. Те кенярксчинь ютавтома койтнеде минь кортынек Эрзянь раськень этнокультурной сюпавчинь ванстомань фондонь прявтонть Татьяна Ивановна Ларина марто.



– Татьяна Ивановна, ёвтнек аламодо эрзянь раськень те кезэрень койденть.

– Васняяк эряви тешкстамс, Раськень озксось ютавтовкшны ниле иес весть, эрьва иестэ – Велень Озкс. Вельмевтезель те коесь 90-це иетнестэ. Седикеле озкстнэсэ ломантне пшкадильть Инешкипазонтень ды покштяст-бабаст туртов. Сокицятне-видицятне учильть сюронь касома (озность-вешсть сэтьме, паро пиземеть), эрзятне энялдсть апаро вийде ванстома, шумбрачи, уцяскав эрямо. Сынь аволь ансяк озность, истя жо киштсть-морсесть, налксесть.

«Раськень Озкс» национально-фольклорной кенярксчись ютавтови Покш Игнатовань Чукало веленть маласо. Тесэ, кода косояк, седе ванстовсть эрзятнень кезэрень койтне-кирдатне. Эрзятнень раськень озноматне кармить молеме «Маар» археологиянь пандыненть лангсо, косо, седикелень эрицятнень ёвтнемаст коряс, калмазь 11 тёжа воинт. Сынь тюрсть ногаецтнэнь каршо.

Коень коряс, кирвазтеви Раськень Штатолось, ловновить Инешкипазонтень озноматне, вельмевтевить эрзянь раськень историянь геройтнень образтнэ. Тей эрьва инжесь тукшны мартонзо мода, конась каяви маронть лангс. Мейле весе кедте-кедьс кундазь ютыть паксяванть вейке кирькссэ.

– Ламо инжеть учовить те покш чистэнть?

– Минь тагояк учотано, весе вейс пурнавить Россиянь эрьва кодамо ёнкссо эриця эрзятне. Покш чинтень свалшкане сакшныть Ульяновскойстэ, Самарасто, Саратовасто, Пензасто, Московсто, Татарстансто, ламо лия регионсто ды омбо масторсто.

– Мезе мельстуиця арсезь инжетнень туртов?

– Эряви ёвтамс, программась пек сюпав. Национально-фольклорной кенярксчинть лувсо ютавтови «Раськень озксось пурны ялгат» эрзянь-мокшонь моронь регионъютконь фестивалесь, конасонть ёрокчист невтьсызь Мордовия Республикань муниципальной районтнэстэ творческой коллективтне ды Российской Федерациянь лия регионтнэстэ самодеятельной артисттнэ. Карми «Моронь пиземе» – те Покш Игнатовань буень творческой коллективтнень концертэсь.
Мельстуицякс весень туртов карми «Сюлгамо» тейтерь-аватнень эрзянь-мокшонь сехте вадря оршамопелень коряс пелькстамось. Конкурссонть мереви невтемс эсь прянть весенень, кие карми мазый ды лиятнень ёнов а молиця оршамосо.

Эрямонь шумбра лувонь ветицятне невтьсызь эсь ёрокчист спортонь эрьва кодат пелькстамотнесэ ды раськень налксематнесэ. Тедеде неть пелькстамотнесэ башка мель карми явовомо эйкакштненень. Сыненст мереви невтемс эсь ёрокчинть «Тюштянь налксемат» раськень налксемань фестивальсэнть. Истя жо сынст туртов аравтовить аттракционт, кармить важодеме интерактивной площадкат.

«Раськень казне» раськень промыслань выставкасонть весенень невтевить декоративно-прикладной искусствань ламот ёнкстнэ: карксонь кодамось, гигерьстэ кедьёнксонь теемась, чувтосто керсемась, илёвсто кодамось, художественной керамикась, сёвонень налкшкесь, някань стамось ды ламо лиясь.

Истя жо кармить важодеме «Литературань кужо», «Лезэв симемапелень нупаль – инжекс Вирявантень». «Раськень озксонь» инжетне каванявить раськень ярсамопельде. Ёвтнесызь, кода панемс панжакайть ды теемс човов брага. Истя жо пидеви тантей ям.

– Татьяна Ивановна, кенярксчинтень анокстамось моли весе вийсэ. Неть читнестэ ютавтовсь «Атянь эзем». Кодамо сонзэ аравтлувозо?

– «Атянь эзем» – те минек ёроков эрзянь цёратнень промкс. Сонзэ юрс совить 22 превей, чарькодиця, куш кодамо тевс дока ды эрзянь раськенть ванстыця ломанть. Ютавтовсь сон кенярксчиденть зярыя шкадо икеле ды те промкссонть ульнесь вейке покш тев – кочкамс Инязор. Те кевкстеманть лангсо Эрзянь раськень этнокультурной сюпавчинь ванстомань фондось важодсь домкасто ды пек пштистэ. Ванновсть зярыя ломанть, кинень апак кавтолдо можна максомс те ине тевенть. Ды малав весе эсь вайгелест максызь Сергей Алексеевич Адушкинэнь кисэ. Сергей Алексеевич минек республикасо ломанесь содавикс – сон Мордовиянь народной артист, весемева ёроков ломань. Арсетяно, сон минек эрзянь раськенть туртов тейсы весементь.

Меельцекс ули пшкадемам весе эрзятненень, мокшотненень ды лия раськень ломантненень. Июлень 9-це чистэ Покш Игнатбуень Чукало веленть маласо карми «Раськень озкс» минек республикань раськень-фольклорной кенярксчись. Садо, тееведе содавиксэкс эрзянь ды минек республикань лия раськетнень лия ёнов а молиця культуратнень сюпавчинть марто. Покш мельсэ учотано весень!

Юлия Еремина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».