Саранскоенть эйстэ аволь васоло, Кочкурбуесэ, ашти кезэрень Пакся Тавла эрзянь велесь. Тесэ ламо пингень перть эрить ломанть, конат ванстыть ды виевгавтыть эрзянь-мокшонь раськенть историянзо ды культуранзо. Истя, январень 30-це чистэ те велесэнть ютась лембе вастовома – инжетнень туртов панжинзе кенкшензэ «Кой#Юрт» музейно-культурной центрась. Проектэсь топавтовсь Культурань инициативань Президентэнь фондонь грантонть лезксэнзэ вельде.
Эряви евтамс, «Кой#Юрт» музеень-культурань куншкакурось – те аволь ансяк музей, те тарка, косо карадо-каршо вастовить ютазь ды неень шкась, тесэ эрьва инжесь содавтови эрзянь ды мокшонь раськетнень сюпав историянть марто. Весемеденть пек парсте евтнить музеенть нупальтнесэ анокстазь-теезь ниле экспозициятне.
Васенце экспозициясонть невтезь XIX пингень эрзянь раськень кудопотмось. Омбоце невтемасонть инжетненень мереви ванномс минек покштятнень-бабатнень важодемань кезэрень кедьенксост. Колмоце экспозициясонть невтезь Пакся Тавласо эрицятнень кедьсэ теезь мазычись. Ютксост – куш кодамо тюсонь суресэ викшнезь нардамотне ды тодовлангакстнэ, чувтосто керсезь налкшкетне ды истя седе тов, мезесь а кадсы киньгак вадря ежовтомо. Нилеце экспозициясь содавты инжетнень Пакся Тавла веленть историянзо марто, домкасто евтни Советской Союзонь Героенть Иван Кудашкинэнь, архитекторонть Михаил Бардинэнь ды олимпийской чемпионканть Ольга Каниськинань эрямодост.
* * *
Татьяна Чекушова, Центр культурных инициатив «Единство» АНО-нь прявтось, Саранск ошонь округонь Культурань кудонь грантонь политикань отделэнь прявтось, «Кой#Юрт» проектэнь авторось:
– Те центрась – раськень историянь покш нупаль. Тесэ ванстовить эрзятнень киньгак енов а молиця коест-кирдаст, мазый морост ды евтнемаст, ютазь шкань налксемаст, сельмень кенярдовтыця викшневксэст, оршамопелест. Музеень весе курмотнень-кармотнень велень эрицятне пурнызь сынсь. Мезень кисэ тенст покш сюкпря! Тердтяно инжетнень мельстуиця экскурсияв, конась канды эрьванть туртов а стувтовикс ежомарямот! Тесэ эйсэнк учить кши-сал марто!
Капшатано евтамс, эрьванть центрасонть учить раськень ярсамопелень, чувтосто керсемань, викшнемань ды сурень штердемань коряс мастер-класст, интерактивной куш кодат невтемат. Весементь марто вадрясто содавттадызь эсь тевень вечкицясь, «Кой#Юрт» музейно-культурной центрань прявтось Наталья Михайловна Суняйкина. Учотано весень, кинь седейсэ палы тиринь раськентень ды культурантень вечкемань толось!
Алена Артемьева
Фототне «Кой#Юрт»
куншкакуронть.